အင်ဒိုနီးရှားနိုင်ငံ၊ ကုန်သွယ်ရေးဝန်ကြီးဌာနက စားအုန်းဆီပြည်တွင်းရောင်းချမှုဆိုင်ရာ လုပ်ထုံး လုပ်နည်းများကို ပြန်လည်ပြင်ဆင်မည်ဟု ပြောကြားခဲ့ကြောင်း အင်ဒိုနီးရှား စားအုန်းဆီအသင်း (Indonesian Palm Oil Association) က ဩဂုတ် ၂ ရက်နေ့တွင် သတင်းထုတ်ပြန်ခဲ့သည်။ အဆိုပါပြင်ဆင်မှုသည် ပြည်တွင်းဈေးကွက်တွင် ရောင်းချမည့် စားအုန်းဆီအမျိုးအစားနှင့် ဈေးနှုန်းတို့တွင် ပြောင်းလဲမှုများ ရှိလာနိုင်မည်ဖြစ်သည်။ 

အမေရိကန်ပြည်ထောင်စုတွင် ကြက်ငှက်တုပ်ကွေးရောဂါ ဖြစ်ပွားမှုတိုးလာခြင်းကြောင့် ရုရှားနိုင်ငံသို့ တင်သွင်းမှုနှင့် အမေရိကန်၏ ကြက်ထွက်ကုန်အားလုံး၏ နိုင်ငံအတွင်း ဖြတ်သန်း သွားလာမှု(Transit)အပေါ် ကန့်သတ် ချက်များ ထုတ်ပြန်ခဲ့ကြောင်း ရုရှားစိုက်ပျိုးရေးဝန်ကြီးဌာန၊ တိရစ္ဆာန်နှင့် အပင်ပိုးမွှားရောဂါ ကင်းရှင်းရေးကြီးကြပ်ကွပ်ကဲမှု ဖက်ဒရယ်အစိုးရဌာန (Rosselk- hoznadzor)က ဖော်ပြခဲ့သည်။

နီပေါမှ သန့်ရှင်းသော လယ်ယာထွက်ကုန်များကို တရုတ်နိုင်ငံ Xizang ကိုယ်ပိုင် အုပ်ချုပ်ခွင့်ရဒေသသို့တင်ပို့ခြင်းသည် ကျေးလက် တောင်သူ ထောင်ပေါင်းများစွာကို အကျိုးဖြစ်ထွန်းစေမည်ဟု မျှော်လင့်ထားကြောင်း နီပေါအရာရှိတစ်ဦးက မကြာသေးမီက ပြုလုပ်သည့် ဖိုရမ်တွင် ပြောကြားခဲ့သည်။

နီပေါနိုင်ငံ အမျိုးသားလွှတ်တော် ဥက္ကဋ္ဌဟောင်း Ganesh Prasad Timilsina သည် Xizang ဒေသ Nyingchi ၌ကျင်းပသော ၄ ကြိမ်မြောက် China Xizang Trans-Himalaya နိုင်ငံတကာ ပူးပေါင်း ဆောင်ရွက်ရေးဖိုရမ်၌ ဧည့်သည်အဖြစ် မိန့်ခွန်းပြောကြားခဲ့သည်။

ယခုနှစ် မိုးရာသီအတွင်း အိန္ဒိယနိုင်ငံ၏ စုစုပေါင်း စိုက်ပျိုးဧရိယာမှာ ဟက်တာ ၇၀၄ သိန်း ကျော်သွားပြီဖြစ်ကြောင်း၊  ယင်းသည် ပြီးခဲ့သည့်ရာသီတွင် စိုက်ပျိုးခဲ့သည့် ဟက်တာ ၆၈၀ ဒသမ ၃၆ သိန်း မှ သိသိသာ သာမြင့်တက်လာခြင်းဖြစ်သည်ဟု စိုက်ပျိုးရေးနှင့် တောင်သူလယ်သမားများလူမှုဖူလုံရေးဝန်ကြီးဌာနမှ ထုတ်ပြန်သောအချက်အလက်များတွင် အဓိကဖော်ပြထားကြောင်း သိရှိရသည်။