စိုက်ပျိုးမွေးမြူရေးပညာနှင့် နိုင်ငံတကာစိုက်ပျိုးမွေးမြူရေးတက္ကသိုလ်များ(အပိုင်း-၄၅)

(ယခင်အပတ်မှအဆက်)

Plant Science, Agriculture Theory and Practical Experience at Sydney University 

ဩစတေးလျနိုင်ငံ စိုက်ပျိုးမွေးမြူရေး နိုင်ငံတကာတွင် ထိပ်တန်းရောက်နေရခြင်း သည်  စိုက်ပျိုးမွေးမြူရေးပညာ အဆင့်မြင့်ပညာရေး (HE-Higher Education/Tertiary Education) နှင့် အသက်မွေး ဝမ်းကျောင်းလုပ်ငန်း ပညာရေး (TVET-Technical & Vocational Education and Training) တို့ နှစ်စဉ် တိုးတက်ပြောင်းလဲလာမှုအပေါ်မူ တည်ပါသည်။ ပါမောက္ခဒင်နီယယ်တန် (Professor Daniel Tan) ၏ ဖိတ်ကြားမှုကြောင့် စာရေးသူ ဆစ်ဒနီတက္ကသိုလ် ခေတ္တရောက်ရှိနေစဉ် စိုက်ပျိုးရေးပညာ သင်ကြား၊ သုတေသန (Australian Agricultural Research and Education) ပြုနေမှုများကို အမိနိုင်ငံ အတွက် အုတ်တစ်ချပ်၊ သဲတစ်ပွင့်ပမာ ဆက်လက်ဆွေးနွေးလိုပါသည်။

ဆစ်ဒနီတက္ကသိုလ်ရောက်ရှိပြီးနောက်စာရေးသူအနေနှင့်စိုက်ပျိုးရေး ကျောင်းသားများ တက်ရောက်သင်ကြားနေသော ဘာသာရပ်တစ်ချို့ စာတွေ့၊ လက်တွေ့ သင်ကြားနေပုံများကို တစ်စေ့တစ်စောင်း လေ့လာကြည့်ခဲ့မိပါသည်။ ပထမဆုံးအနေနှင့် ဥယျာဉ်ခြံသီးနှံစိုက်ပျိုးထုတ်လုပ်ရေး စာတွေ့၊ လက်တွေ့ သင်ကြားပုံ ကို ဆွေးနွေးပါမည်။

(က) ဥယျာဉ်ခြံသီးနှံစိုက်ပျိုးထုတ်လုပ်ရေး (HORT 3005 Production Horticulture and AFNR5210 Sustainable Horticultural Cropping) ဘွဲ့ကြိုကျောင်းသား/သူများအတွက် ကုဒ် (HORT 3005 Production Horticulture တတိယနှစ် ဥယျာဉ်ခြံ သီးနှံများထုတ်လုပ်ခြင်း-၃၀၀၅) ဘွဲ့လွန်ကျောင်းသား/သူများ အတွက်ကုဒ် (Agriculture, Food and Natural Resources - AFNR5210 Sustainable Horticultural Cropping ရေရှည်တည်တံ့ စေသောဥယျာဉ်ခြံသီးနှံများစိုက်ပျိုးခြင်း)

၂၀၂၆-ခုနှစ် စာသင်နှစ် ပထမနှစ်ဝက်ကို ဖေဖော်ဝါရီလ ၂၃ ရက်တွင် စတင် စာသင်ကြား သော်လည်း ကျောင်းသား၊ ကျောင်းသူများက တစ်ပတ် ကြိုတင်၍ သင်ခန်းစာ အစီအစဉ်များကို ကြိုတင်လေ့လာ၍ရရှိနေပါသည်။ (ဘွဲ့ကြိုကျောင်းသား၊ ကျောင်းသူများနှင့် မဟာသိပ္ပံဘွဲ့လွန် သင်တန်းသား/သူများ ရောနှောသင်ကြားပေးပါသည်) 

သင်ခန်းစာအနှစ်ချုပ် (Course Outline) အရ စာသင်ရက် ၁၃-ပတ်ရှိပြီး အပတ်စဉ် တနင်္လာနေ့ မနက် ၁၀ နာရီမှ ၁၂ နာရီအထိ စာတွေ့ရှိပါသည်။ 

ဤဘာသာရပ်ကို အပိုင်း-၃ ပိုင်းခွဲသင်ကြားပါသည် -

(က-၁) စပျစ်နှင့်သစ်သီးဝလံစိုက်ခင်းများ သိပ္ပံနည်းကျလေ့လာခြင်း (An Introduction to the scientific basic for the management of established orchards and vineyards)

(က-၂) ဟင်းသီးဟင်းရွက်သီးနှံများ သိပ္ပံနည်းကျလေ့လာခြင်း (An Introduction to the scientific basic for the sustainable production of vegetable crops) နှင့်

(က-၃) ဥယျာဉ်ခြံသီးနှံများရိတ်သိမ်းချိန်လွန်နည်းပညာမိတ်ဆက် (An Introduction to Horticultural Postharvest Issues) တို့ဖြစ်ပါသည်။

ဘွဲ့ကြို၊ ဘွဲ့လွန် ကျောင်းသား/သူများ ရောနှောသင်ပေးပြီး အပိုင်း ၃-ပိုင်း (Three Modules) ကိုဆရာ ၃-ဦးက ခွဲဝေသင်ပေးမည်ဖြစ်ပါသည်၊ (မှတ်ချက် - ကွင်းစလန်တက္ကသိုလ်တွင် (University of Queensland) စာရေးသူတို့ မဟာသိပ္ပံကျောင်းသား ဘဝကလည်း တစ်ချို့ ဘွဲ့ကြို ဘာသာ ရပ်များကို လိုအပ်ချက် အရ တချို့ဘွဲ့ကြိုဘာသာရပ်များ တက်ခဲ့ရတာတွေ လည်းရှိပါ သည်၊ ထူးခြားတာက စိုက်ပျိုးရေးဘွဲ့ရမှ မဟုတ်ဘဲ ကျန်အင်ဂျင်နီယာ၊ စီးပွားရေး၊ သိပ္ပံဘွဲ့ရများပါ မည်သည့် ဘွဲ့ရမဆို ဘာသာရပ်နှင့်ဆက်စပ်နေသူများဆိုပါက ပူးတွဲ တက်ရောက် နေခြင်းပါ၊ အသက်ကန့်သတ်ချက်မရှိပါ၊ မြန်မာနိုင်ငံတွင်စိုက်ပျိုးရေးဘွဲ့ရမှ မဟာစိုက်ပျိုးရေးသိပ္ပံ တက်ရောက်ရမည်ဆိုသည့် ကန့်သတ်ချက်နှင့် ကွာခြားသွားပါပြီ၊ ယခု ဥယျာဉ်ခြံသီးနှံ ဘွဲ့ကြိုဘာသာရပ်ဆိုလျှင်လည်း၊ စာရေးသူ စိုက်ပျိုးရေးဘွဲ့ရပင်လျှင် မသိသေးသည့် ပညာများ ပါဝင်နေ၍ ဘွဲ့ကြို ဘာသာများ ပြန်တက်ရောက်ရခြင်းက အကျိုးရှိပါသည်။)

ဤဘာသာရပ်ကို စာတွေ့ (Theory Class) က တပတ်တစ်ရက် ၂ နာရီ (ခေါင်းစဉ် ၂ ခု Two Lectures) ဆက်တိုက် သင်ပြီး၊ လက်တွေ့နှင့် လေ့လာရေးခရီးများ (Practicals and Study Tours/Excursions ) က   တစ်ပတ်  ၃ နာရီ မှ ၄ နာရီ သင်ကြား၊ ဆောင်ရွက်ပါသည်။

(၁) စစ်ဆေးမှုစနစ်များ (Assessment)

စာသင်နှစ်ဝက် နောက်ဆုံးစာမေးပွဲ ၂ နာရီ (One two-hours Final exam) ရေးဖြေ ဖြေဆိုရပါမည် (စုစုပေါင်းအမှတ်၏ ၅၀ ရာခိုင်နှုန်းပေးပါသည်) လက်တွေ့ရေးသားတင်ပြချက် (Assignments) ၃ခု (စုစုပေါင်းအမှတ်၏ ၄၅ ရာခိုင်နှုန်း) နှင့် ဘာသာရပ်အပေါ် အကြံပြုချက်လုပ်ငန်း (Feedback task) ၅ ရာခိုင်နှုန်း အပါအဝင် စုစုပေါင်း ၁၀၀ ရာခိုင်နှုန်းဖြစ်ပါသည်။ တစ်ရက်နောက်ကျပါက ၅ ရာခိုင်နှုန်း အမှတ်ဖြတ်ပါမည်ဟု ဖော်ပြထားပါသည်။ ကျောင်းတက်ရောက်ချိန် (Attendance) အနည်းဆုံး ၈၀ ရာခိုင်နှုန်း ရှိရပါမည် (မြန်မာနိုင်ငံတွင် လက်ရှိကျင့်သုံးနေသော ၇၅ ရာခိုင်နှုန်းထက်ပိုပါသည်။)

(၂) လက်တွေ့အလုပ်တာဝန်များ (Assignments)

(က) တစ်ဦးချင်းရေးသားတင်ပြရသည့် အလုပ်များ (Individual Assignments) ဥပမာ - ဝိုင်အမျိုးမျိုးကို တစ်ဦးချင်းစမ်းသပ်သောက်သုံး၍ မိမိ၏ထင်မြင်ယူဆချက်ကို ရေးသား တင်ပြပါ၊

(ခ) အုပ်စုလိုက်ဟောပြောရသည့် အလုပ်များ (Group Presentation Assignments) ဥပမာ  ၅ ဦး တစ်ဖွဲ့ဖွဲ့၍ စပျစ်ခင်း စီမံခန့်ခွဲရေးနှင့်ဈေးကွက်စီမံချက် (The Vineyard Management and Marketing Plan) ကို သတ်မှတ်ရက် ရောက်လျှင် ဆွေးနွေးတင်ပြပါ၊ စသည်တို့ဖြစ်ပါသည်။

မှီငြမ်းစာအုပ် (Reference Book) – Baxter, P. (1997) Growing Fruits in Australia. MicMillan Australia.

(စာရေးသူက ဧည့်ပါမောက္ခအနေနဲ့ သူတို့စာကြည့်တိုက် (e-Library) ကိုအသုံးပြုခွင့် ရပါ သည်၊ ထိုမှီငြမ်းစာအုပ်ကို e-Book အနေနှင့် ရှာဖွေကြည့်ရာ (Search) မရှိဘဲ ပုံနှိပ်စာအုပ် (Printed Book) သာရှိနေသည်ကို တွေ့ရှိရပါသည်။ ၁၉၈၇ ခုနှစ် ကွင်းစလန်တက္ကသိုလ် စာရေးသူ မဟာစိုက်ပျိုးရေးသိပ္ပံကျောင်းသား ဘဝက အပင်ဇီဝ ကမ္မ ဗေဒပြဌာန်းစာအုပ် (Plant Physiology Text Book) ကို ပထမဦးဆုံး စာသင်မှု အပြီး တက္ကသိုလ်ဇီဝသိပ္ပံစာကြည့်တိုက် (Biological Science Library) ကိုသွားရောက် ငှားရမ်းရာ စာရေးသူအရင် ကျောင်းသား ၄ ဦးက ငှားရမ်းရန် ကြိုတင်စာရင်း သွင်းထားသဖြင့် တစ်ဦးတစ်ကြိမ်ငှား တစ်ပတ်နှုန်းဖြင့် ၄ ပတ်မြောက် (တစ်လအကြာမှ) မိမိ အလှည့် ကျရောက်ခဲ့သည်ကို ပြန်လည် သတိရနေမိပါသည်။ အောက်ပါ စာအုပ် ၂-အုပ်ကို ဝယ်ယူလိုက်ပါသည်။ (သူတို့ ပညာသင်ဆုငွေ၊ စာအုပ်တန်ဖိုးသီးသန့်ပေးငွေ အရဈေးမကြီးပါ)၊

Doley, David and Rimmington, G.M. (1986) Modelling Plant Growth and Development. Academic Press. (29 Aus. $)
Milthorpe, F.L. and Moorby, J. (1980) An Introduction to Crop Physiology. Cambridge University Press (37 Aus. $)

ထိုစာအုပ် ၂-အုပ်မှာ ရေဆင်းစိုက်ပျိုးရေးတက္ကသိုလ် စာကြည့် တိုက်သို့ လှူဒါန်းထား ခဲ့ပါသည်။ ယနေ့ခေတ်တွင်တော့ စာအုပ် အသစ်များစွာ ထွက်နေပါပြီ။

(၃) စာသင်နည်းစနစ်များ (Teaching Methods)

စာသင်ခန်းမထဲမှာသင်သလို မိမိနေရာမှ Online ဖြင့် တက်ရောက်နိုင်သောစနစ်ဖြစ်ပါသည်၊ စာသင်သော လင့်များမှာ ကြိုတင်ပေးထားပြီး အင်တာနက်နှင့်လည်းချိတ်ဆက်ထားသဖြင့် YouTube နှင့်အခြား ဗီဒီယို (Video) များ လွယ်ကူစွာ ပြသရှင်းလင်းနိုင်ပါသည်။ 

(ပုံတွင် စာရေးသူအပါအဝင် ကျောင်းသား/သူ ၃-ဦး Online မှတက်ရောက်နေ ပါသည်။)

မြန်မာနိုင်ငံတွင် ပြည်တွင်း၊ ပြည်ပမဟာစိုက်ပျိုးရေးသိပ္ပံနှင့်ပါရဂူဘွဲ့ရသူ အစိုးရဝန်ထမ်း မဟုတ်သူ၊ အငြိမ်းစားပညာရှင်ကြီးများအပါအဝင် ဝန်ထမ်းလောက ပြင်ပတွင်ရှိနေသူ များစွာရှိပါသည်။

သီးနှံအလိုက် ဥပမာ  စပါး၊ မြေပဲ၊ ဝါ၊ ပဲတီစိမ်း၊ အာလူး၊ သရက်၊ ထောပတ်သီး၊ နှင်းဆီပန်း၊ ဘာသာရပ် အလိုက် - ဥပမာ - အပင်မျိုးမွေးမြူ (Plant Breeding)၊ အပင်ဇီဝကမ္မဗေဒ (Plant Physiology)၊ မြေဆီလွှာ (Soil)၊ အပင်ကာကွယ်ရေး (Plant Protection)၊ စိုက်ပျိုးစီးပွားရေးပညာ (Agricultural Economics) စသည်ဖြင့် အုပ်စုလိုက် ဝန်ထမ်း၊ ပုဂ္ဂလိက၊ လက်ရှိလုပ်နေသူ၊ အငြိမ်းစားလူကြီးများဟူ၍ မခွဲဘဲ အပတ်စဉ်အစည်း အဝေးမှ ပြုလုပ်သော Online Zoom Meeting လေးများပြုလုပ်ပြီး စုစည်းအကြံဉာဏ် ယူကြပါက တစ်ခုခုများထူးခြားသွားမလားလို့ တွေးနေမိပါသည်။

ဒေါက်တာမျိုးကြွယ်