ပြီးခဲ့သည့်နှစ်က ပြည်တွင်းထုတ်လုပ်မှု ကျဆင်းခဲ့သဖြင့် စင်ကာပူ၏ စားနပ် ရိက္ခာဖူလုံရေး စိန်ခေါ်မှုများ ရှိနေသည်။ ကမ္ဘာ့ကပ်ရောဂါဆက်နွယ်သည့် ကြန့်ကြာမှုများ၊ ငွေကြေးဖောင်းပွမှု၊ စွမ်းအင်ဈေးနှုန်းများ ကြီးမြင့်လာမှု၊ လုပ်ခများ မြင့်တက်လာမှုတို့ကြောင့် ပြည်တွင်းထုတ်လုပ်ရေးလုပ်ငန်းများ 
စိန်ခေါ်မှုရှိနေကြောင်း စင်ကာပူ စားနပ်ရိက္ခာအေဂျင်စီက ဆိုသည်။

မဲခေါင်မြစ်ဝှမ်းတစ်လျှောက်ရှိ နိုင်ငံများမှ တရုတ်နိုင်ငံသို့ သစ်သီးဝလံ တင်သွင်းမှုပမာဏ သည် ၂၀၂၃ ခုနှစ်တွင် အမေရိကန်ဒေါ်လာ ၁၀ ဒသမ ၆၈ဘီလီယံရှိပြီး နိုင်ငံ၏ သစ်သီးတင်သွင်းမှု စုစုပေါင်း၏ ၆၀ ရာခိုင်နှုန်းနီးပါးရှိကြောင်း ကွမ်ကျိုးမြို့တွင် မေ ၁၀ ရက်နေ့က ကျင်းပခဲ့သည့် လန်ချန်း-မဲခေါင် သစ်သီးလုပ်ငန်းဖွံ့ဖြိုးတိုးတက်ရေးအလုပ်ရုံဆွေးနွေးပွဲ၌ စိုက်ပျိုးရေးနှင့် ကျေးလက်ရေးရာဝန်ကြီးဌာန လက်အောက်ရှိ နိုင်ငံခြားစီးပွားရေးပူး ပေါင်းဆောင်ရွက်မှုဗဟိုဌာန၏ အကြီးအကဲ Guo Libin က ပြောကြားခဲ့ကြောင်း သိရှိရသည်။

ပြီးခဲ့သည့် ရက်သတ္တပတ်များတွင် တောင်နှင့် အရှေ့တောင်အာရှနိုင်ငံများသို့ လွန်ကဲပြင်းထန်သော အပူ ချိန် သက်ရောက်မှုကြောင့် လူသေဆုံးမှုများ၊ ပညာသင်ကြားမှုဆိုင်ရာ အနှောင့်အယှက်များ၊ စိုက်ပျိုးရေးဆိုင်ရာ ဆုံးရှုံးပျက်စီးမှုများ ဖြစ်ပေါ်ခဲ့ကြောင်း သိရှိရသည်။ ဖိလစ်ပိုင်နှင့် ဘင်္ဂလားဒေ့ရှ်တို့တွင် ပြီးခဲ့သည့်လမှစ၍ ကျောင်းများ ပိတ်ခဲ့ရပြီး ထိုင်းနိုင်ငံတွင် အပူဒဏ်ကြောင့် အနည်း ဆုံး လူ ၃၀ ဦး သေဆုံးခဲ့ကာ ဒူးရင်းခြံများလည်း အပူဒဏ်ကြောင့် ပျက် စီးခဲ့ရသည်ဟု ဆိုသည်။

မတ်ပဲကို ဘရာဇီးနှင့် အာဂျင်တီးနားနိုင်ငံတို့တွင် ပိုမိုတိုးချဲ့စိုက်ပျိုးလာနေသည့်အတွက် အိန္ဒိယနိုင်ငံသည် အဆိုပါနိုင်ငံများမှ ပိုမိုတင်သွင်းလာဖွယ်ရှိကြောင်း The Hindu Businessline သတင်းဌာနက ယခုလ ၉ ရက်နေ့က ဖော်ပြသည်။ လက်ရှိတွင် မြန်မာနိုင်ငံသည် အိန္ဒိယနိုင်ငံသို့ မတ်ပဲ အဓိကတင်သွင်းသော နိုင်ငံတစ်ခုဖြစ်ကြောင်း သိရသည်။