အမေရိကန်ဝက်သားတင်သွင်းခွင့်ပြုက ထိုင်းဝက်သားထုတ်လုပ်ငန်း အရှုံးပေါ်နိုင်

ထိုင်းနိုင်ငံအနေဖြင့် အမေရိကန်နိုင်ငံမှ ဝက်သားကို တင်သွင်းခွင့်ပြုပြီး ဈေးကွက်ဖွင့်ပေးလိုက်ပါက ပြည်တွင်းဝက်သားထုတ်လုပ်မှုလုပ်ငန်းအနေ ဖြင့် အမေရိကန်ဒေါ်လာ ၃ ဒသမ ၄၆ ဘီလီယံအထိအရှုံးပေါ်လာနိုင်ကြောင်း ကာစီကွန်သုတေသနဌာနအရသိရှိရသည်။

သုတေသနဌာနအဆိုအရ ဝက်သားနှင့် အတွင်းကလီစာအမျိုးမျိုးတို့သည် အမေရိကန်နှင့်ထိုင်းနိုင်ငံကြား ကုန်သွယ်ခွန်ညှိနှိုင်းမှုတွင် အမေရိကန်၏ တွန်းအားပေးနိုင်သည့် အဓိကကုန်စည်များတွင် ပါဝင်လာနိုင်ကြောင်း သိရှိရသည်။

အမေရိကန်ဝက်သားမှာ ထုတ်လုပ်မှုကုန်ကျစရိတ်နည်းပါးသဖြင့် ထိုင်းဝက်သားအပေါ် ဈေးကွက် အသာစီးရလျက်ရှိသည်။ လက်ရှိတွင် ထိုင်းဝက်သားဈေးနှုန်းမှာ အမေရိကန်ဝက်သားထက် ၁ ဒသမ ၃ ဆ ဈေးမြင့်မားနေသည်။ ၂၀၂၃-၂၄ ခုနှစ် အမေရိကန်ဝက်သားပျမ်းမျှဈေးနှုန်းမှာ တစ်ကီလိုလျှင် ၁ ဒသမ ၇ ဒေါ်လာဖြစ်ပြီး ထိုင်းဝက်သားပျမ်းမျှဈေးနှုန်းမှာ တစ်ကီလိုလျှင် ၂ ဒသမ ၃ ဒေါ်လာဖြစ်သည်။

ဖြစ်ပေါ်လာဖွယ်ရှိသည့် ဈေးချိုသည့် အမေရိကန်ဝက်သားနှင့် ကလီစာ အမျိုးမျိုး တင်သွင်းမှုဂယက်သည် ထိုင်းဝက်သားထုတ်လုပ်မှုကွင်းဆက် တစ်လျှောက်ရှိ ဝက်မွေးတောင်သူများ၊ တိရစ္ဆာန်စာစိုက်ပျိုးသူများမှသည် သားသတ်ရုံနှင့် လက်လီဈေးများအထိ သိသိသာသာ ရိုက်ခတ်မှုရှိလာမည်ဖြစ်ကြောင်း သိရသည်။

TTP

www.asian-agribiz.com