မျိုးအတွက် ကွန်ချက်

မျိုးလို့ ပြောလိုက်တာနဲ့ မျိုးကောင်းမျိုးသန့်မျိုးစေ့ကို ဆိုလိုတယ်လို့ တောင်သူလယ်သမားတွေရော၊ မျိုးစေ့ ထုတ်လုပ်သူတွေရော၊ မျိုးစေ့ဖြန့်ဖြူးရောင်းချသူတွေရော သိကြပါတယ်။

ဒါဆို မျိုးကောင်းဆိုတာဘာလဲ? - 

မျိုးကောင်းဆိုတာ သူ့ရဲ့မူလဗီဇကိုက အထွက်ကောင်းမယ် (သို့မဟုတ်) အရည်အသွေးကောင်းမယ် (သို့ မဟုတ်) ပိုးမွှားရောဂါဒဏ်၊ ရာသီ ဥတုဒဏ်ခံနိုင်မယ် (သို့မဟုတ်) ဓာတ်မြေဩဇာကို တုန့်ပြန်မှုကောင်းမယ် (သို့မဟုတ်) ယိုင်လဲမှုဒဏ်ခံနိုင်မယ် (သို့မဟုတ်) အဲဒီအချက်တွေ တစ်ခုထက်မကပါမယ် စတဲ့ သီးနှံတစ်ခုအတွက် ကောင်းတဲ့လက္ခဏာတွေ ပါဝင်နေတဲ့ မျိုးတစ်မျိုးကို မျိုးကောင်းလို့ ခေါ်ရပါမယ်။

မျိုးသန့်ဆိုတာကရော? - 

မျိုးတစ်မျိုးရဲ့ မျိုးစေ့ထဲမှာ အခြားမျိုးကွဲတွေ ရောပါနေတာ၊ (ဥပမာ - ဧရာမင်းမျိုးထဲမှာ ပေါ်ဆန်းစေ့တွေ ပါနေတာ၊ မနောသုခစေ့တွေပါနေတာ) ပေါင်းမြက်စေ့တွေ ပါနေတာ၊ အဖျင်း အမှော် ဖုန်ခဲ သဲတွေ ရောပါနေတာမရှိဘဲ သန့်တဲ့မျိုးစေ့ကို မျိုးသန့်လို့ပြောတာပါ။

မျိုးကောင်းမျိုးသန့်တစ်မျိုးရဖို့မှာ မျိုးကောင်းရဖို့အတွက်ကတော့ မျိုးစေ့နဲ့ဆိုင်တဲ့ ပညာရပ်ပိုင်း လိုအပ်ပါတယ်။ မျိုးတစ်မျိုးရဲ့ မူလ ဗီဇမှာကိုက အထွက်ကောင်းတဲ့၊ အရည်အသွေးကောင်းတဲ့၊ ပိုးဒဏ် ရာသီဒဏ် ခံနိုင်တဲ့ လက္ခဏာတွေပါတဲ့ မျိုးတစ်မျိုးရဖို့ မျိုးစပ်တာ၊ မျိုးထွန်းအောင် ဖန်တီးတာ၊ ဇီဝနည်းတွေနဲ့ ပြုပြင်တာတွေ လုပ်ဖို့လိုအပ်တာဖြစ်တဲ့အတွက် မျိုးစေ့ပညာရှင်တွေကဘဲ ဆောင်ရွက်နိုင်မှာ ဖြစ်ပါတယ်။

ဒါဆို ရှင်းပြီလေ - ကျွန်တော်တို့လက်ထဲမှာရှိနေတဲ့မျိုး၊ ကောင်းနေတဲ့မျိုးကို သန့်အောင်လုပ်ဖို့ အတွက်တော့၊ တစ်နည်းအားဖြင့် မျိုးသန့်ရဖို့ကတော့ တောင်သူလယ်သမားတွေ၊ မျိုးစေ့ထုတ်လုပ်သူတွေ၊ မျိုးစေ့ဖြန့်ဖြူးရောင်းချသူတွေ ဘယ်သူမဆို ဆောင်ရွက်နိုင်ပါတယ် - ကျွန်တော်တို့ လက်ထဲမှာ ရှိပြီးသား မျိုးကောင်းတစ်မျိုးကို မျိုးသန့်ဖြစ်ဖို့ စိုက်ခင်းမှာကတည်းက ဆောင်ရွက်ဖို့တော့ လိုပါတယ်၊

စိုက်ခင်းထဲမှာ မညီမညာဖြစ်နေတဲ့အပင်တွေ၊ ပုံသဏ္ဍာန်ကွဲပြားနေတဲ့အပင်တွေ၊ အရောင်ကွဲပြား နေတဲ့အပင်တွေ၊ ပန်းပွင့်ချိန်၊ ရင့်မှည့်ချိန် မတူညီတဲ့အပင်တွေကို နှုတ်ပစ် (ဒါမှမဟုတ်) အဲဒီအပင်တွေကို မရွေးဘဲ၊ ညီညာမှုရှိတဲ့၊ ပုံသဏ္ဍာန်တူတဲ့၊ အပင်အရပ်၊ အရွယ်တူတဲ့၊ ပန်းပွင့်ချိန်တူတဲ့၊ ရင့်မှည့်ချိန်တူတဲ့ အပင်တွေ၊ အရုံတွေထဲက အနှံ၊ အသီးတွေကို ရွေးပြီး မျိုးအဖြစ် သီးသန့်ရိတ်သိမ်းရမှာ ဖြစ်ပါတယ်။ ရိတ်သိမ်းပြီးရင်လည်း ပေါင်းမြက်တွေ၊ အဖျင်းအမှော် ဖုန်ခဲသဲတွေ ပြောင်စင်အောင် ပြာတီးသန့်စင်ရမှာပေါ့။ ဒါဆို မျိုးကောင်းမျိုးသန့်မျိုးစေ့တွေကို ဈေးကြီးကြီးပေးပြီး ဝယ်စရာမလို၊ အချိန်ကုန်၊ လူပန်း၊ ငွေကုန်ခံပြီး လိုက်ရှာနေစရာမလိုဘဲ ကိုယ့်လယ်မှာဘဲ ထုတ်လုပ်နိုင်ပြီပေါ့။

တောင်သူကြီးတွေအနေနဲ့ မျိုးကောင်းမျိုးသန့်မျိုးစေ့ထုတ်လုပ်တဲ့ ကုမ္ပဏီကြီးတွေဆိုပြီး အထင်ကြီးနေစရာမဟုတ်ပါ၊ သူတို့လည်း ဒီနည်းကိုဘဲ အသုံးပြုပြီး ထုတ်လုပ်ကြတာဖြစ်ပါတယ်။ သူတို့ကတော့ ဧရိယာ ကျယ်ကျယ်ပြန့်ပြန့်ထုတ်တဲ့အတွက် အခြောက်ခံစက်တွေ၊ မျိုးစေ့သန့်စင်စက်တွေ သုံးကြတာနဲ့ တောင်သူများကတော့ နေလှန်းတယ်၊ ဇကောဇကာတွေနဲ့ ပြာတီးသန့်စင်တယ် ဒါဘဲ ကွာခြားတာဖြစ်ပါတယ်။ 

တစ်ခုပဲရှိတယ် - ကိုယ့်မှာရှိနေတဲ့ မျိုးကတော့ မျိုးရဲ့အရင်းအမြစ် မှန်ဖို့တော့လိုတာပေါ့၊ ဒီမျိုးကို ကိုယ်ဘယ်ကရလဲ၊ စိုက်ပျိုးရေးသုတေ သနခြံတွေကလား၊ စိုက်ပျိုးရေး မျိုးစေ့ခြံတွေကလား၊ ဒီလိုခြံတွေမှာတော့ မျိုးစေ့ပညာရှင်တွေလည်းရှိတော့ မျိုးကောင်းဖို့အတွက် စိတ်ချရမှာပေါ့၊ အဲလိုမျိုးတစ်မျိုးရပြီးရင် ကိုယ့်လယ်မှာပဲ ၃ နှစ်လောက် မျိုးသန့်အောင် ထိန်းပြီး ပြန်လည်အသုံးပြု စိုက်ပျိုးနိုင်တဲ့အတွက် မျိုးစေ့ဖိုး အပိုငွေ မသုံးရဘဲ၊ မျိုးကလည်း ကိုယ်ကိုယ်တိုင် လုပ်ထားတဲ့အတွက် စိတ်ချရတဲ့ မျိုးကောင်းမျိုးသန့်မျိုးစေ့ ရရှိနိုင်မှာဖြစ်ပါတယ်။

ဒီလိုစဉ်းစားကြည့်ကြပါစို့ - လယ်(၅)ဧကရှိတဲ့ တောင်သူတစ်ယောက်က စပါးမျိုးကောင်းမျိုးသန့် မျိုးစေ့ကို ဒဿမ ၁၀ (သုညဒသမ ၁၀)ဧကစာဘဲ ဝယ်ယူစိုက်ပျိုးပြီး အဲဒီ သုညဒသမ ၁၀ ဧကကို မျိုးသန့်အောင်ထိန်း၊ နောက်ရာသီမှာ ကိုယ့်လယ် ၅ ဧကအတွက်အသုံးပြုလိုက်၊ နောက် ၂ ရာသီ၊ ၃ ရာသီလောက် မျိုးသန့်အောင်လုပ်ပြီး ဆက်သုံးနိုင်မယ်ဆိုရင် မျိုးစေ့ဖိုးအတွက် ကုန်ကျစရိတ် များစွာသက်သာသွားမှာဖြစ်သလို မျိုးကောင်းမျိုးသန့်မျိုးစေ့ကို အသုံးပြုစိုက်ပျိုးရတဲ့အတွက် အထွက်ကောင်း၊ အရည်အသွေးကောင်း၊ ပိုးမွှားရောဂါဒဏ်ခံနိုင်ပြီး၊ ဈေးကောင်းလည်းရမယ့် ထွက်ကုန်တွေကို ထုတ်လုပ်နိုင်မှာ ဖြစ်ပါကြောင်း မျိုးကောင်းမျိုးသန့်မျိုးစေ့ သုံးစွဲနိုင်မယ့် ကွန်ချက်လေးအဖြစ် တင်ပြလိုက်ပါတယ်။

 (အပေါ်မှာ ပြောပြထားတာတွေထက် ထပ်ပြီး အသေးစိတ်သိချင်သေးရင်တော့ ပြောပြပေးပါမယ်၊ ထပ်ရှင်းပြမှ ပိုရှုပ်သွားမှာလည်း စိုးပါတယ်ခင်ဗျာ။)

မျိုးကောင်းအသစ်တစ်မျိုး ရဖို့ဆိုရင် သီးနှံပေါ်မူတည်ပြီး ၁၀ နှစ်ကြာမလား၊ ၁၅ နှစ်ကြာမလား မပြောနိုင်ပါဘူး၊ သားဆက်တစ်ခုရဖို့အတွက် အရင်ဦးဆုံး မိဘတွေ လိုတာပေါ့၊ မိဘပင်တွေမှာ ကျွန်တော်တို့ လိုချင်တဲ့ လက္ခဏာတွေ (ဥပမာ - အထွက်ကောင်းတာ၊ အရည်အသွေးကောင်းတာ၊ ပိုးမွှာရောဂါဒဏ်ခံနိုင်တာ၊ ရာသီဥတုဒဏ်ခံနိုင်တာ၊ ရေငတ်ခံနိုင်တာ၊ ဆားငံဒဏ်ခံနိုင်တာ၊ အရပ်ပုတာ၊ အရပ်ရှည်တာစသဖြင့်)ပါအောင် အရင်ဆုံး စုဆောင်းလို့ရသမျှ မျိုးတွေကို စိုက်ကြည့် ရတာက စရပါမယ်။ ပြီးမှ ကိုယ်လိုချင်တဲ့ လက္ခဏာပါတဲ့ မျိုးလိုင်းတွေကို ရွေးချယ်ရမယ်။ ပြီးမှ မျိုးစပ်ရမယ်။ မျိုးစပ်ပြီး ရလာတဲ့ မျိုးလိုင်းအသစ်တွေကို ပြန်စမ်းသပ်စိုက်ကြည့်ရမယ်။ ကိုယ်လိုချင်တဲ့ လက္ခဏာတွေ မပါရင် အစကပြန်လုပ်ရမယ်။ တစ်ခါလုပ်ရင် အနည်းဆုံး သီးနှံတစ်ရာသီဆိုတော့ စဉ်းစားသာကြည့်ဗျို့ ဘယ် လောက်ကြာမလဲဆိုတာ။ ဒါကြောင့် များသောအားဖြင့် မျိုးစပ်ပညာရှင် တွေဟာ မျိုး ၂ မျိုး၊ ၃ မျိုး ရဖို့အတွက် သူတို့ တစ်ဘဝလုံးရဲ့ အချိန်အများစုကို စတေးရတာပေါ့။ မျိုးကောင်းတစ်မျိုးရဲ့ တန်ဖိုးကို သိစေချင်လို့ တင်ပြတာပါ။

ပြီးတော့ - အားလုံးသိကြတဲ့အတိုင်းဘဲ မျိုးစေ့မှာ စပ်မျိုးနဲ့ သဘာဝ ဝတ်မှုန်ကူးမျိုးဆိုပြီး ယေဘူယျအားဖြင့် ၂ မျိုးရှိပါတယ်။ သဘာဝ ဝတ်မှုန်ကူးမျိုးဆိုတာကတော့ အကြမ်းအားဖြင့် ကိုယ့်မျိုးကိုယ် ပြန်ထားလို့ရတဲ့ မျိုးတွေကိုဆိုလိုတာပါ၊ ကျွန်တော်တို့နိုင်ငံက စပါးမျိုးအများစုဟာ အဲလိုမျိုးတွေ ဖြစ်ပါတယ်။ ကျွန်တော်အပေါ်မှာ တင်ပြခဲ့တဲ့ ကိုယ့်လယ်မှာ ကိုယ့်မျိုးသန့်ထိန်းတာက ဒီလို သဘာဝ ဝတ်မှုန်ကူးမျိုးတွေကိုဘဲ လုပ်လို့ရမှာဖြစ်ပါတယ်။ စပ်မျိုးတွေမှာတော့ ကိုယ့်မျိုးကိုယ်ထား၊ ကိုယ့်လယ်မှာ ကိုယ့်မျိုးသန့်ထိန်းလို့မရဘူးဆိုတာကိုတော့ သေချာသိထားဖို့လိုပါတယ်။ 

စပ်မျိုးတွေကို စိုက်ပျိုးပြီး ရရှိလာတဲ့ မျိုးစေ့ (ဒုတိယသားဆက်) တွေကို ပြန်လည် စိုက်ပျိုးမယ်ဆိုရင် - အပင်များ ညီညာမှုမရှိခြင်း၊ အသီးအရွယ်များ မညီညာခြင်း၊ ပိုးမွှားရောဂါဒဏ်ခံနိုင်စွမ်း နည်းပါးလာခြင်းနဲ့ နောက်ဆုံး အထွက်နှုန်းရော၊ အရည်အသွေးပါ လျော့နည်းကျဆင်းခြင်းတို့ကို ကြုံတွေ့ရမှာ ဖြစ်ပါတယ်။ တောင်သူတွေအနေနဲ့ ဒီလို ဒုတိယသားဆက်တွေကို စိုက်ပျိုးမယ်ဆိုရင် ကြီးမားတဲ့ ဆုံးရှုံးမှုတွေကို ကြုံတွေ့ရမှာဖြစ်ပါကြောင်းကိုတော့ လေးလေးနက်နက် အသိပေးချင်ပါတယ်။

ဒါကတစ်ပိုင်းပေါ့၊ နောက်တစ်ပိုင်းက - သဘာဝ ဝတ်မှုန်ကူးမျိုးတွေကို ကိုယ့်မျိုးကိုယ် မျိုးသန့်အဖြစ် ထိန်းသိမ်းမယ်ဆိုရင်လည်း သတိထားသင့်တဲ့ အချက်လေးတွေရှိပါသေးတယ်။ 

ဥပမာ - စပါးမျိုး(၂)မျိုး စိုက်ပျိုးထုတ်လုပ်တဲ့ တောင်သူတွေအနေနဲ့ အခြောက်လှန်းချိန်မှာ မိုးကာ တစ်ချပ်တည်းကို သုံးမယ်ဆိုရင် တစ်မျိုးလှန်းပြီး၊ နောက်တစ်မျိုးလှန်းချိန်မှာ မိုးကာကို သေသေချာချာ သန့်ရှင်းပြီးမှ အသုံးပြုရန် လိုအပ်ပါတယ်။ ဒီလိုပဲ ဇကောဇကာတွေကိုလည်း တစ်မျိုးပြီးရင် နောက်တစ်မျိုးမသုံးခင် သေချာစွာ သန့်ရှင်းဖို့လိုပါတယ်။ မျိုးရောနိုင်ပြီး၊ မျိုးသန့်စင်ဖို့အတွက် အန္တရာယ်အကြီးဆုံး လုပ်ငန်းအဆင့်တွေဖြစ်ပါတယ်။ ရိတ်သိမ်းချိန်မှာလည်း ရိတ်သိမ်းခြွေလှေ့စက် တစ်စီးဘဲသုံးမယ်ဆိုရင် သေချာပြောင်စင်အောင် သန့်ရှင်းဖို့လိုမှာဖြစ်ပါတယ်။

စီးပွားဖြစ် မျိုးစေ့ထုတ်လုပ်နေကြတဲ့ တောင်သူကြီးတွေ၊ မျိုးစေ့ထုတ်သမအသင်းတွေ၊ ပုဂ္ဂလိက မျိုးစေ့ထုတ်လုပ်ငန်းတွေအနေနဲ့ကတော့ မျိုးသန့်ထုတ်လုပ်တဲ့ စိုက်ခင်းတွေမှာ မျိုးရောတွေကို ပယ်နိုင်ဖို့ အဓိကအရေးကြီးပါတယ်။ ဒီလိုမျိုး စီးပွားဖြစ်မျိုးစေ့ထုတ်လုပ်နေကြတဲ့သူတွေရော၊ ကိုယ့်မျိုးကိုယ် မျိုးသန့်ထိန်းသိမ်းတဲ့သူတွေရော ကျန်တဲ့လုပ်ငန်းတွေမှာ လွယ်ကူနိုင်ပေမယ့် စိုက်ခင်းအတွင်း မျိုးရောပယ်တဲ့ လုပ်ငန်းကို ဆောင်ရွက်ဖို့ အခက် အခဲရှိခဲ့ရင် စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန လက်အောက်ရှိ နီးစပ်ရာ ဌာနပိုင် မျိုးသန့်ခြံများ၊ မျိုးစေ့ရုံးများနဲ့လည်းကောင်း၊ စိုက်ခင်းမှ ထွက်ရှိလာတဲ့ မျိုးစေ့များ စံချိန်စံညွှန်းပြည့်မီမှုရှိ/မရှိ စစ်ဆေးဖို့အတွက် မျိုးစေ့စစ်ဆေးရေးဓာတ်ခွဲခန်းများနဲ့လည်းကောင်း ဆက်သွယ်ပေါင်းစပ်ဆောင်ရွက်နိုင်ပါကြောင်းကိုလည်း ဌာနမှ တာဝန်ရှိသူများနဲ့ တွေ့ဆုံဆွေးနွေးမှုအရ သိရှိရပါတယ်။

မျိုးစေ့ဌာနမှ တာဝန်ရှိသူများနဲ့ ဆွေးနွေးမှုအရ - စီးပွားဖြစ်မျိုးစေ့ထုတ်လုပ်ဖြန့်ဖြူး ရောင်းချနေကြတဲ့ ပုဂ္ဂလိကနဲ့ အဖွဲ့အစည်းများအနေနဲ့ နိုင်ငံတော်က ပြည်တွင်း မျိုးစေ့ထုတ်လုပ်ငန်းများ ဖွံ့ဖြိုးတိုးတက်ရေးကို အထူးအားပေးဆောင်ရွက်နေတဲ့ကာလဖြစ်ပြီး၊ သီးနှံစိုက်ပျိုးထုတ်လုပ်သူ တောင်သူများအနေနဲ့လည်း မျိုးကောင်းမျိုးသန့်မျိုးစေ့ သုံးစွဲခြင်းရဲ့ အကျိုးကျေးဇူးများကို တစ်စတစ်စ သိရှိလာတာနဲ့အမျှ ပြည်တွင်းမျိုးကောင်းမျိုးသန့်မျိုးစေ့ သုံးစွဲလာနိုင်မယ့်အခွင့်အလမ်းနဲ့ ကြီးမားတဲ့ ဈေးကွက်ရှိလာနိုင်တာကြောင့် မျိုးစေ့စီးပွားရေးမှာ ခုထက်ပိုပြီး ရင်းနှီးမြှုပ်နှံကြဖို့ကိုလည်း အကြံပြု တိုက်တွန်းလိုပါတယ်။

 ဒါ့အပြင် ပြည်တွင်းမှာ နည်းမှန်လမ်းမှန်နဲ့ စီးပွားဖြစ်မျိုးစေ့ထုတ်လုပ်ဖြန့်ဖြူး ရောင်းချနေကြတဲ့ ပုဂ္ဂလိက၊ အဖွဲ့အစည်းများနဲ့ သုံးစွဲသူ တောင်သူများကို ကာကွယ်ပေးနိုင်ဖို့နဲ့ စံချိန်စံညွှန်းမပြည့်မီတဲ့ မျိုးစေ့တွေကို ဖြန့်ဖြူးရောင်းချနေသူတွေ၊ မသမာတဲ့နည်းနဲ့ အတုအပတွေကို ရောင်းချနေသူတွေကို အရေးယူနိုင်ဖို့ကိုလည်း မျိုးစေ့ဥပဒေပါ ပြဌာန်းချက်များနဲ့အညီ စိစစ်ဆောင်ရွက်လျက်ရှိကြောင်း သိရှိရတဲ့အတွက် ပြည်တွင်း မျိုးစေ့ထုတ်လုပ်ငန်းဆောင်ရွက်နေကြသူတွေအတွက် ပိုပြီးစိတ်ချလုံခြုံတဲ့ စီးပွားရေးရပ်ဝန်းတစ်ခု ဖြစ်လာဖို့ရှိနေကြောင်းကိုလည်း အသိပေးလိုပါတယ်။

ဒီဆောင်းပါးလေးမှာတော့ အဓိက - တောင်သူများအနေနဲ့ မျိုးကောင်းမျိုးသန့်မျိုးစေ့ကို လွယ်ကူစွာ ရရှိစေပြီး၊ ကုန်ကျစရိတ်လည်း နည်းပါးစေတဲ့ မျိုးစေ့အတွက်ကွန်ချက်လေးကို မျှဝေပေးချင်တာဖြစ်ပြီး၊ တောင်သူတစ်ဦးတစ်ယောက်အတွက် အကျိုးရှိသွားမယ်ဆိုလျှင်ကို များစွာ ကျေနပ်အားရမိမည် ဖြစ်ပါကြောင်း တင်ပြလိုက်ရပါတယ်။                      

ငပို