သုတေသနနှင့်နည်းပညာဖွံ့ဖြိုးတိုးတက်ရေးကို အခြေခံသည့် စိုက်ပျိုးရေးကဏ္ဍ အသွင်ကူးပြောင်းရန်လိုအပ်

နေပြည်တော် ဖေဖော်ဝါရီ ၂၄

စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီး ဒေါက်တာတင်ထွဋ်သည် ဖေဖော်ဝါရီ ၂၃ ရက်နေ့ ညနေပိုင်းတွင် ရန်ကုန်တိုင်းဒေသကြီး အင်းစိန်မြို့နယ် အနောက်ကြို့ကုန်းရှိ စိုက်ပျိုးရေးဦးစီးဌာန သီးနှံကာကွယ်ရေးဌာနခွဲ ၌ သီးနှံကာကွယ်ရေး ပညာရှင်များအား တွေ့ဆုံ၍ စိုက်ပျိုးရေး သွင်းအားစုဆိုင်ရာ တောင်သူပညာပေးလုပ်ငန်းများ တိုးချဲ့ လုပ်ကိုင်နိုင်ရေး ဆွေးနွေးမှာကြားသည်။ 

ဒုတိယဝန်ကြီးက ဆွေးနွေးပြောကြားရာတွင် စိုက်ပျိုးရေးကဏ္ဍ၌ အလွန်အရေးကြီးသည့် မျိုး၊ မြေ၊ ရေ၊ နည်းပညာလုပ်ငန်းများ ဆောင်ရွက်ရာတွင် မျိုးစေ့ဆိုင်ရာ နည်းပညာများ၊ မြေဆီလွှာဆိုင်ရာ နည်းပညာများ၊ ရေစီမံခန့်ခွဲမှု နည်းပညာများ အား တောင်သူလယ်သမားများ စနစ်တကျလိုက်ပါအသုံးပြုလာစေရေး ဆောင်ရွက်ပေးရန် လိုအပ်ကြောင်း၊ မျိုးစေ့ကဏ္ဍ တွင်လည်း တောင်သူလယ်သမားကိုယ်တိုင် အရည်အသွေးပြည့်မီသော မျိုးစေ့များကို ကိုယ်တိုင် ထုတ်လုပ် သုံးစွဲလာနိုင်ကြရန် ဌာနမှ ပညာရှင်များက တောင်သူများ၏ အခက်အခဲများကို အတူတကွဖြေရှင်းပေးခြင်းနှင့် တောင်သူလယ်သမားများအား လက်တွေ့ နည်းပညာပေးခြင်း မျိုးစေ့ ထုတ်အဖွဲ့များ ဖွဲ့စည်းလုပ်ကိုင်နိုင်ရေးအတွက် လိုအပ်သည်များ ညှိနှိုင်း ပေါင်းစပ်ပေးခြင်း တို့ကို စနစ်တကျဆောင်ရွက်ကြရန်လိုအပ်ကြောင်း၊ 

တိုးတက်ပြောင်းလဲလာသော ခေတ်နှင့်အညီ လယ်ယာကဏ္ဍဖွံ့ဖြိုး ရေးဆိုင်ရာ လုပ်ငန်းများ ထိရောက်အောင်မြင်စွာ အကောင်အထည် ဖော် ဆောင်ရွက်နိုင်ရန်နှင့် တိုင်းဒေသကြီး ပြည်နယ်များရှိ တောင်သူများ၏ ဒေသန္တရ အခက်အခဲများကို ထိရောက် လျင်မြန်စွာ ဖြေရှင်းနိုင်ရန် အတွက် SMS Mobile နည်းပညာ၊ AI နည်းပညာရပ်များကို အသုံးပြု၍ အချိန်မီမျှဝေပေးကြစေလိုကြောင်း၊ သုတေသနနှင့် နည်းပညာဖွံ့ဖြိုးတိုးတက်ရေးကို အခြေခံသည့် စိုက်ပျိုးရေးကဏ္ဍ အသွင်ကူးပြောင်းရန်လိုအပ်လျက်ရှိကြောင်း၊ သီးနှံကာကွယ်ရေးဌာနနှင့် မြေအသုံး ချရေးဌာနတို့ အချင်းချင်း အပြန် အလှန်ပူးပေါင်း ဆောင်ရွက်၍ ရည်ရှည် တည်တံ့သောစိုက်ပျိုးထုတ်လုပ် မှုဘဝ ရရှိရေးအတွက် ကျန်းမာသော‌ ဂေဟစနစ်နှင့် စိုက်ပျိုး ထုတ်လုပ်မှုဆိုင်ရာ နည်းပညာအတွေ့အကြုံများကို သုတေသီပညာရှင်များနှင့် တောင်သူ အချင်းချင်း ဖလှယ်၍ အသုံးပြုနိုင်ရေးကို အထူးအလေး ထား ဆောင်ရွက်ကြရန် ၊ ဂေဟစနစ် အမျိုးမျိုးအလိုက် သင့်လျော်သော မျိုးများကိုမွေးမြူရွေးချယ်၍ တောင်သူလယ်သမားများ လုပ်ငန်းရှင်များ ပါဝင်သော မျိုးမွေးမြူရွေးချယ်ခြင်း မျိုးသန့်ပွားများခြင်းများ ကျယ်ကျယ်ပြန့်ပြန့် ဆောင်ရွက်ပြီး အရည်သွေးအကောင်း မျိုးစေ့သုံးစွဲမှုဖွံ့ဖြိုးတိုးတက်လာရေးကြိုးပမ်းသွားကြရန် ဆွေးနွေးမှာကြားခဲ့ကြောင်းသတင်းရရှိသည်။

MOALI