၇၉ကြိမ်မြောက် ပြည်ထောင်စုနေ့ကို ဂုဏ်ပြုသည့်အနေဖြင့် လူသိနည်းမျိုးစိတ်များအပေါ် အခြေခံသည့် အပင်မျိုးဗီဇအရင်းအမြစ်ထိန်းသိမ်းခြင်း အလုပ်ရုံဆွေးနွေးပွဲ ကျင်းပ

နေပြည်တော်၊ ဖေဖော်ဝါရီ ၉

လူသိနည်းပါးသော(လျစ်လျူရှုခံ)မျိုးစိတ်များအပေါ် အခြေခံသည့် အပင်မျိုးဗီဇအရင်းအမြစ်များ ထိန်းသိမ်းခြင်း" အလုပ်ရုံ ဆွေးနွေးပွဲကို ဖေဖော်ဝါရီ ၈ ရက် နံနက် ၉ နာရီက ရေဆင်းစိုက်ပျိုးရေး တက္ကသိုလ်၌ ကျင်းပသည်။  

ဒုတိယဝန်ကြီး ဒေါက်တာတင်ထွဋ်က အဖွင့်အမှာစကား ပြောကြားရာတွင် ယခုအလုပ်ရုံ ဆွေးနွေးပွဲကို (၇၉) ကြိမ်မြောက် ပြည်ထောင်စုနေ့ကို ကြိုဆိုဂုဏ်ပြုသည့်အနေဖြင့် ကျင်းပခြင်းဖြစ်ပါကြောင်း၊ တိုင်းရင်းသားအားလုံး စည်းလုံးညီညွတ်စွာ နေထိုင်ခြင်းသာမက မိမိတို့၏ ပြည်ထောင်စုအတွင်းနေထိုင်ကြသော သားစဉ်မြေးဆက်  ရှေးဟောင်းအမွေ အနှစ်ဖြစ်သော သဘာဝဇီဝအရင်း အမြစ်များကိုလည်း အတူတကွ ထိန်းသိမ်းရမည်ဖြစ်ပါကြောင်း၊ မြန်မာနိုင်ငံတွင်  တိုင်းဒေသကြီးများနှင့် ပြည်နယ်များအလိုက် စားရေ ရိက္ခာနှင့်ဆေးဖက်ဝင်အပင်၊ ထူးခြားသော အပင်မျိုးစိတ်များ ကြွယ်ဝစွာရှိပါသဖြင့်  မြန်မာနိုင်ငံ၏ ဇီဝမျိုးစုံမျိုးကွဲ ကြွယ်ဝမှုကို ကိုယ်စားပြုပါကြောင်း၊ စီးပွားဖြစ် စိုက်ပျိုးဖြစ် ထွန်းမှုမရှိသေးဘဲ လျစ်လျူရှုခံနေရသော အပင်မျိုးစိတ်များကို ပျောက်ဆုံးမှုမရှိရန် ထိန်းသိမ်းခြင်းသည် ပြည်ထောင်စုကြီး၏ သဘာဝအမွေ အနှစ်ကို ထိန်းသိမ်းခြင်းပင်ဖြစ်ပါကြောင်း ၊  

ယနေ့စိုက်ပျိုးအသုံးပြုနေသည့် သီးနှံမျိုးများသည် မျိုးရိုင်းများမှ ခေတ်အဆက်ဆက် မျိုးစပ်မွေးမြူရွေးချယ်၍ ဆင့်ကဲပြောင်းလဲမှုဖြင့် ဆင်းသက်လာခြင်းဖြစ်ကြောင်း၊ မျိုးရိုင်းများတွင်ရှိသော ထူးကဲသည့် လက္ခဏာများကို အသုံးပြု၍ အထွက်ကောင်း မျိုးများထုတ်လုပ်ခဲ့ခြင်းဖြစ်ကြောင်း၊ ဥပမာအနေဖြင့် “ဆင်းသုခ” စပါးမျိုးဖြစ်ပါကြောင်း၊ သို့ဖြစ်၍ မိမိတို့နိုင်ငံ၏ ကြွယ်ဝချမ်းသာမှုကိုသိရှိနိုင်ရန် ဈေးကွက်အတွင်း စီးပွားဖြစ် ရောင်း ဝယ်ဖောက်ကားမှု မရှိသေးသော ဒေသခံသီးနှံမျိုးစိတ်များကို ပြန်လည် ဖော်ထုတ် စာရင်းပြုစုရန် လိုအပ်လာကြောင်း၊ အဆိုပါသီးနှံမျိုးများကို လျစ်လျူရှုခံမျိုးစိတ် (neglected species)များဟု ခေါ်ဆိုကြောင်းနှင့် ယင်းမျိုးများကို ပျောက်ကွယ်မျိုးသုဉ်းမှုမရှိစေရန် ပြန်လည် ထိန်းသိမ်း ကာကွယ်ခြင်းဖြင့် မိမိတို့နိုင်ငံတွင် အပင်မျိုးစိတ်များ၏ ကြွယ်ဝမှုကို မှတ်တမ်းတင်နိုင်မည် ဖြစ်ကြောင်း၊ အဆိုပါမျိုးစိတ်များတွင်ပါဝင်သည့် ဓာတုဒြပ်ပေါင်းများကိုရှာဖွေဖော် ထုတ်ပြီး လူသားများ၏ကျန်းမာရေး၊ စိုက်ပျိုးရေးနှင့် မွေးမြူရေးနယ်ပယ်များတွင် အသုံးပြုနိုင်မည် ဖြစ်ကြောင်း၊ လူသားအကျိုးပြု တန်ဖိုးမြင့်ထုတ် ကုန်များကိုလည်း ထုတ်လုပ်နိုင်မည် ဖြစ်ကြောင်း၊ ယင်းအပင်များကို ထိန်းသိမ်း စောင့်ရှောက်ရာတွင် အိမ်ခြံဝန်းဥယျာဉ်များသည် အရေးပါ သောကြောင့် ဤသို့ဆောင်ရွက်ခြင်းဖြင့် အိမ်ခြံဝန်းဥယျာဉ်ဆီမှ ကမ္ဘာ့ဈေးကွက်ဆီသို့ (Home farming to global market) သို့ သွားရောက် နိုင်မည်ဖြစ်ကြောင်း၊ သုတေသနဌာနများတွင်လည်း စိုက်ခင်းအတွင်း သရုပ်ပြစိုက်ပျိုး ထိန်းသိမ်းခြင်းဖြင့် အပင်မျိုးစိတ်များကိုမျိုးသုဉ်းပျောက် ကွယ်မှုအန္တရာယ်မှ ကာကွယ်ပေးနိုင်မည်ဖြစ်ကြောင်း၊ အဆိုပါ မျိုး စိတ်များကို အစားအစာ (Food)၊ တိရစ္ဆာန်စာ (Feed, Forage, Fordder)၊ လျှော်မျှင် (Fibre)နှင့် စွမ်းအင်လောင်စာ (Fuel) အပင်များအဖြစ် စိုက်ပျိုးထုတ်လုပ် ရောင်းချ နိုင်ခြင်းနှင့် ယင်းတို့ကို အသုံးပြုပြီးတန်ဖိုးမြှင့် ထုတ်ကုန်များ ရရှိလာအောင်ရှာဖွေဖော်ထုတ်ခြင်း (Bioprospecting) ဖြင့်လည်း ဒေသအတွက် ထွက်ကုန်အမယ်သစ်များရရှိလာစေပြီး ဝင်ငွေများ ပိုမိုတိုး လာစေမည်ဖြစ်ကြောင်း ပြောကြား သည်။ 

အလုပ်ရုံ ဆွေးနွေးပွဲတွင် ရေဆင်းစိုက်ပျိုးရေးတက္ကသိုလ်မှ ဘွဲ့ကြို၊ ဘွဲ့လွန် ကျောင်းသား၊ ကျောင်းသူများအား ကြီးကြပ်သူ ဆရာ၊ ဆရာမ များနှင့်အတူ တိုင်းဒေသကြီး ပြည်နယ် အလိုက် အုပ်စုများဖွဲ့၍ “လူသိနည်းပါးသော (လျစ်လျူရှုခံ) မျိုးစိတ်များ အပေါ်အခြေခံသည့် အပင်မျိုးဗီဇအရင်း အမြစ်ထိန်းသိမ်းခြင်း” ခေါင်းစဉ်ဖြင့် ဆွေးနွေးခြင်း နှင့် စာရင်းပြုစုခြင်းများဆောင်ရွက်ခဲ့ပြီး  နိုင်ငံတစ်ဝှမ်းရှိ မျိုးစိတ်စုစုပေါင်း ၂၈၉ ကို စာရင်းပြုစုနိုင်ခဲ့ကြောင်း၊ ဆက်လက် ဆောင်ရွက်နိုင်ပါက အမည်သစ်များ ပိုမိုပေါ်ထွက်လာနိုင်မည်ဖြစ်ကြောင်း သိရှိရသည်။

အဆိုပါ အလုပ်ရုံဆွေးနွေးပွဲသို့ စိုက်ပျိုးရေး၊ မွေးမြူရေးနှင့် ဆည် မြောင်းဝန်ကြီးဌာန၊ ဒုတိယဝန်ကြီး ဒေါက်တာတင်ထွဋ်နှင့် ရေဆင်းစိုက်ပျိုးရေးတက္ကသိုလ်မှ ပါမောက္ခ ချုပ်၊ ဒုတိယပါမောက္ခချုပ်များ၊ ပါမောက္ခများ၊ ဌာနမှူးများ၊ ဆရာဆရာမများနှင့် ပြည်နယ်နှင့်တိုင်းဒေသကြီးအသီးသီးမှ ကိုယ်စားပြု ကျောင်းသား/ ကျောင်းသူများ စုစု ပေါင်း ၂၀၀  ဦး ပါဝင်တက်ရောက်ကြကြောင်းသတင်း ရရှိသည်။ 

MOALI