ရှမ်းပြည်နယ်အတွင်း လယ်ယာကဏ္ဍဆိုင်ရာလုပ်ငန်းများ ဖွံ့ဖြိုးတိုးတက်ရေး စီမံဆောင်ရွက်

နေပြည်တော်၊ ဖေဖော်ဝါရီ ၈

ရှမ်းပြည်နယ်အတွင်း လယ်ယာကဏ္ဍဆိုင်ရာလုပ်ငန်းများဖွံ့ဖြိုးတိုးတက်ရေးအတွက် လိုအပ်ချက်များ စီမံဆောင်ရွက်ပေးရန် တောင်ကြီးမြို့တွင် ရောက်ရှိနေသော  စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ပြည်ထောင်စုဝန်ကြီး ဦးမင်းနောင်သည် ဖေဖော်ဝါရီလ ၇ ရက်နေ့ နေ့လယ်ပိုင်းတွင် စိုက်ပျိုးရေးသုတေသနဦးစီးဌာန တာယောစိုက်ပျိုးရေးသုတေသနခြံ၊ စိုက်ပျိုးရေးဦးစီးဌာန တာယောမျိုးသန့်ခြံနှင့် ထုံးဖို စိုက်ပျိုးရေးသုတေသနခြံ  တို့အား ကြည့်ရှုစစ်ဆေးခဲ့ကြောင်း သိရသည်။ 

ရှေးဦးစွာ ပြည်ထောင်စုဝန်ကြီးသည် စိုက်ပျိုးရေးသုတေသနဦးစီးဌာန တာယောစိုက်ပျိုးရေးသုတေသနခြံသို့ရောက်ရှိပြီး ပဲပုတ်နှင့် နေကြာသုတေသနပြု စိုက်ကွင်းအား ကြည့်ရှုစစ်ဆေး၍ စိုက်ခင်းအတွင်း မိုးရာသီ ရေကြီးရေလျှံမဖြစ်ပွားစေရေးအတွက် ရေကာတမံတည်ဆောက်မည့် အစီအမံနှင့် ဆိုလာရေတင်စနစ်ဖြင့် စိုက်ပျိုးရေရရှိရေးဆောင်ရွက်နေမှုအပေါ် လိုအပ်သည်များ ညွှန်ကြားဖြည့်ဆည်းပေးခဲ့သည်။

၎င်းနောက် ပြည်ထောင်စုဝန်ကြီးသည် စိုက်ပျိုးရေးဦးစီးဌာန တာယောမျိုးသန့်ခြံ သို့ ရောက်ရှိပြီး စိုက်ကွင်းအတွင်း ဆိုလာရေတင်စနစ်ဖြင့် ရေတင်ဆောင်ရွက်နိုင်မှုနှင့် နေကြာမျိုးစေ့ထုတ်ရန် မြေပြုပြင်ထားရှိမှုအား ကြည့်ရှုစစ်ဆေး၍ ခြံစည်းရိုးပတ်လည် တစ်လျှောက် အရိပ်ရ မန်ကျည်းပင်များစိုက်ပျိုးရေး၊ ခြံအတွင်း နှစ်ရှည်သီးနှံပင်များ စိုက်ပျိုးရေးမှာကြားသည်။

ထို့နောက် ပြည်ထောင်စုဝန်ကြီးသည် ထုံးဖို စိုက်ပျိုးရေးသုတေသနခြံသို့ရောက်ရှိ၍ သစ်ခွနှင့်သဇင်ပန်းဥများအား တစ်သျှူးကာချ(Tissue culture)နည်းဖြင့် မျိုးမွေးမြူ သုတေသနပြု ထုတ်လုပ်နိုင်ရေးဆောင်ရွက်နေမှုကို ကြည့်ရှု၍ လိုအပ်ချက်များ မှာကြားကာ ခြံအတွင်းဆောင်ရွက်လျက်ရှိသော ကြက်သွန်နီမျိုးစေ့ထုတ်စိုက်ပျိုးခြင်းလုပ်ငန်းနှင့် နှစ်ရှည်ပင် စိုက်ပျိုးသုတေသနပြုရန် ဆောင်ရွက်နေမှုများကို ကြည့်ရှုစစ်ဆေးခဲ့ကြောင်း သတင်း ရရှိသည်။

MOALI