Rice Export Zone အကောင်အထည်ဖော်ရေး လုပ်ငန်းရှင်များ၊ တောင်သူများနှင့် တွေ့ဆုံဆွေးနွေး

နေပြည်တော်၊ မေ ၁၁

လယ်ယာစိုက်ပျိုးရေးကဏ္ဍတွင် တောင်သူများစိုက်ပျိုးထုတ်လုပ်မှုဖွံ့ဖြိုးတိုးတက်ပြီး တစ်ဦးချင်းဝင်ငွေတိုးတက်စေရန်၊ အရည်အသွေးကောင်းမွန်သောဆန်များ ပြည်ပသို့တင်ပို့ခြင်းဖြင့် နိုင်ငံခြားဝင်ငွေတိုးမြင့်ရရှိစေရန်နှင့် စပါးစိုက်တောင်သူဦးကြီးများအတွက် အခွင့်အလမ်းကောင်းများ ရရှိစေရန်ရည်ရွယ်၍ နိုင်ငံတော်က “နိုင်ငံ့စီးပွားမြှင့်တင်ရေးရန်ပုံငွေ” ဖြင့် Rice Export Zone (REZ)များ အကောင်အထည်ဖော် ဆောင်ရွက်ပေးလျက်ရှိသည်။

စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီး ဒေါက်တာရဲတင့်ထွန်းသည် မေ ၉ ရက်နေ့ နံနက်ပိုင်းတွင် ရန်ကုန်တိုင်းဒေသကြီး၊ မှော်ဘီမြို့နယ်၊ မြန်မာ့ဆန်စပါး သုတေသနဌာန အစည်းအဝေးခန်းမတွင် လွှတ်တော်ကိုယ်စားလှယ်များ၊ ဌာနဆိုင်ရာ တာဝန်ရှိသူများ၊ လုပ်ငန်းရှင်များ၊ စပါးတောင်သူများ နှင့် တွေ့ဆုံ၍ Rice Export Zone (REZ)များ ထူထောင်ဆောင်ရွက်ခြင်းနှင့်ပတ်သက်၍ ရှင်းလင်း ဆွေးနွေးသည်။

ဒုတိယဝန်ကြီးက အမှာစကားပြောကြားရာတွင် Rice Export Zone အကောင်အထည်ဖော်ဆောင်ရွက်ခြင်းဖြင့် ပြည်တွင်း ပြည်ပဈေးကွက်များတွင် စားသုံးမှုအရည်အသွေး တည်ငြိမ်၍ ထုတ်လုပ်မှုမြင့်မားရေးအတွက် လုပ်ငန်းရှင်များမှ ဈေးကွက်ဝယ်လိုအား ကောင်းသည့် မျိုးများအား တောင်သူများသို့အသိပေးပြီး လိုအပ်သည့်ဆန်ပမာဏထုတ်လုပ်ရရှိရေးအတွက် ထုတ်လုပ်သူအစုအဖွဲ့နှင့် တောင်သူအစုအဖွဲ့များ အချိတ်အဆက်မိမိ ပူးပေါင်းဆောင်ရွက်ရန်၊ စိုက်ပျိုးရေးပညာရှင်များက zone အတွင်း စိုက်ပျိုးရေးနည်းပညာများအား ပြန့်ပွားရေးအတွက် အနီးပေါင်းစပ်ဆောင်ရွက်ပေးနိုင်ရန် ရည်ရွယ်ဆောင်ရွက်ရခြင်းဖြစ်ပါကြောင်း၊ နိုင်ငံတော်မှ ကူညီထောက်ပံ့ပေးလျက်ရှိသည့် Rice Export Zone (REZ) ရန်ပုံငွေကိုလည်း တောင်သူများ လက်ဝယ်ရောက်ရှိအသုံးပြုနိုင်ရေး စီမံခန့်ခွဲပေးရန် လိုအပ်ပါကြောင်း၊ ပေါ်ဆန်းမွှေးဆန်ကိုလည်း ပြည်ပတိုးမြှင့်တင်ပို့ နိုင်ရေးအတွက် ဇုန်အတွင်း တိုးချဲ့စိုက်ပျိုးနိုင်ရေး၊ ဇုန်ဧရိယာအတွင်း စိုက်ပျိုးထုတ် လုပ်မှု တိုးတက်စေရန်နှင့် အရည် အသွေးအာမခံချက်ရှိပြီး ပို့ကုန်ဈေးကွက် လိုအပ်ချက်နှင့်ကိုက်ညီသော မျိုးကောင်း၊မျိုးသန့်များကို ပန်းတိုင်အထွက်ရရှိစေရန်၊ စပါးစိုက် တောင်သူအတွက် လိုအပ်သည့်သွင်းအားစုများနှင့် စိုက်ပျိုးစရိတ်ချေးငွေ၊ စိုက်ပျိုးနည်းစနစ်များ စသည်တို့ကို ထိရောက်စွာကူညီထောက်ပံ့ပေးနိုင်ရန်နှင့် အခြေခံသီးနှံစိုက်ပျိုးမှုစနစ်ကို နိုင်ငံတကာအဆင့်မီ အကောင် အထည်ဖော် ဆောင်ရွက်နိုင်မည်ဖြစ်ပါကြောင်း၊ ဇုန်ဧရိယာအတွင်း GAP စနစ်၊ IPM စနစ်နှင့် သဘာဝနှင့်ဇီဝမြေဩဇာများသုံးစွဲခြင်း၊ လယ်ယာကုန်ထုတ် စွမ်းအားမြှင့်တင်နိုင်မည့်လုပ်ငန်းစဉ်များကို ထိရောက်စွာအကောင်အထည်ဖော် ဆောင်ရွက်နိုင် မည် ဖြစ်သည့်အပြင် ဆန်စပါးအထူးပြုကုမ္ပဏီများ၊ ဆန်စက်လုပ် ငန်းရှင်များနှင့် တောင်သူ လယ်သမား တို့အကြား ပူးပေါင်းဆောင်ရွက်မှု အရှိန်မြှင့်တင်နိုင်စေမည်ဖြစ်ကြောင်း၊ အလားတူ အစားအစာဘေးကင်းလုံခြုံမှု ( Food Safety )ကို အာမခံနိုင်သော ရေရှည်တည်တံ့ ကောင်းမွန်သည့် ( Sustainable Rice Production ) အကောင်ထည်ဖော် ဆောင်ရွက်နိုင်မည် ဖြစ်ပါကြောင်း ပြောကြားသည်။

ဆက်လက်၍ လုပ်ငန်းရှင်များ၊ တောင်သူများ၏ တင်ပြချက်များအပေါ် ဒုတိယဝန်ကြီးက သက်ဆိုင် ရာတာဝန်ရှိသူများနှင့်ပေါင်းစပ်ညှိ နှိုင်းဆောင်ရွက်ပေးသည်။ ထို့နောက် မြန်မာနိုင်ငံ ဆန်စပါးအသင်းချုပ်မှ ထောက်ပံ့လှူဒါန်းသည့် Drum Seeder ၅၀ နှင့် ရန်ကုန်တိုင်းဒေသကြီး၊ စိုက်ပျိုးရေးဦးစီးဌာနမှ ထောက် ပံ့သည့် သဘာဝမြေဩဇာများကို တောင်သူများထံ ပေးအပ်သည်။

အခမ်းအနားအပြီးတွင် ဒုတိယဝန်ကြီးနှင့်အဖွဲ့သည် မြန်မာ့ဆန်စပါး သုတေသနဌာနတွင် စိုက်ပျိုးထားရှိသည့် ဆင်းသုခ၊ မှော်ဘီ-၃ စပါးမျိုးများကို နွေစပါး ဧက ၁၀၀ စိုက်ပျိုး၍ မျိုးသန့် မျိုးပွား မျိုးစေ့ထုတ်စိုက်ကွင်းနှင့် တောင်သူများအား လက်တွေ့သရုပ်ပြသပေးလျက်ရှိသည့် သဘာဝမြေဩဇာပြုလုပ်ပုံအဆင့်ဆင့်၊ တီကျစ်စာ ထုတ်လုပ်ရန် တီမွေးမြူပုံနည်းများကို ကြည့်ရှုအားပေးခဲ့ကြောင်းသတင်းရရှိသည်။

MOALI