(၃၃) ကြိမ်မြောက် မျိုးစေ့ဆိုင်ရာအမျိုးသားကော်မတီ အစည်းအဝေးကျင်းပ

နေပြည်တော်၊ ဧပြီ၂၈

မျိုးစေ့ဆိုင်ရာအမျိုးသားကော်မတီ ၏ ၃၃ ကြိမ်မြောက် အစည်းအဝေး ကို ဧပြီ ၂၈ ရက် နေ့ နံနက်ပိုင်းက နေပြည်တော် ရုံးအမှတ်(၄၃) အစည်းအဝေးခန်းမ၌ကျင်းပရာ မျိုးစေ့ဆိုင်ရာ အမျိုးသားကော်မတီ ဥက္ကဌ နှင့် ကော်မတီဝင်များ၊ ပညာရှင်များ နှင့် ဖိတ်ကြားထားသော ဧည့်သည်တော်များတက်ရောက်ကြသည်။

အစည်းအဝေးတွင် မျိုးစေ့ဆိုင်ရာအမျိုးသားကော်မတီ ဥက္ကဌ စိုက်ပျိုး ရေး၊မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဒေါက်တာ ရဲတင့်ထွန်း က ဆွေးနွေးပြောကြားရာ၌ စိုက်ပျိုး မွေးမြူရေးကို အခြေခံသည့် ကုန်ထုတ်လုပ်မှုကို မြှင့်တင်ပြီး နိုင်ငံတော်၏ စီးပွားရေး ဖွံ့ဖြိုးတိုးတက်အောင် ကြိုးပမ်းအကောင် အထည်ဖော်ရာတွင် မျိုးစေ့ကဏ္ဍသည် မရှိမဖြစ်လိုအပ်သည့် အခြေခံ အကျဆုံး မောင်းနှင်အားတစ်ခု ဖြစ်ကြောင်း၊ စားရေရိက္ခာဖူလုံစေရန်၊ ပြည်တွင်းဆီဖူလုံရေး အတွက် ဆီထွက်သီးနှံများ စိုက်ပျိုးထုတ်လုပ် မှု မြှင့်တင်ရန်နှင့် သွင်းကုန် အစားထိုး ပြီး ပို့ကုန် တိုးမြှင့်ရန် အတွက် အရည်အသွေးကောင်းမွန်ပြီး ပိုးမွှားရောဂါနှင့် ရာသီဥတုဒဏ်ခံနိုင်သည့် မျိုးကောင်း မျိုးသန့်များကို တောင်သူ များ သုံးစွဲနိုင်စေရန် မျိုးစေ့ဥပဒေ၊ လုပ်ထုံးလုပ်နည်းများနှင့်အညီ မျိုးစေ့ အရည်အသွေး ထိန်းချုပ်မှုကို အလေးထား ဆောင်ရွက်လျက်ရှိကြောင်း၊ 

ပြည်တွင်းမျိုးစေ့ထုတ်လုပ်မှုတိုးမြှင့်ပြီး ပြည်ပမှမျိုးစေ့တင်သွင်းအသုံးပြုမှုလျှော့ချရေး အတွက် ပြည်တွင်း မျိုးစေ့ထုတ်လုပ်မှုများတွင် အရည်အသွေးပြည့်မီသည့် ဈေးကွက်ဝယ်လိုအားရှိပြီး သက်တမ်း တိုသီးနှံမျိုးစေ့များကို ပိုမိုထုတ်လုပ်နိုင်ရေးအတွက် လိုအပ်သည့် မျိုးစေ့ထုတ်လုပ်ရေး သင်တန်းများပေးခြင်း၊ မျိုးစေ့ထုတ်လုပ်ရန်လိုအပ်သည့် မြေနေရာရရှိရေးအတွက် မြေလွတ်၊မြေလပ် နှင့်မြေရိုင်းများ လျှောက်ထားအသုံးပြုခွင့်ပေးခြင်း ၊ မျိုးစေ့ဈေးနှုန်းကြီးမြင့်မှု မဖြစ်ပေါ်စေရန် လိုအပ်သည့် အခြေခံအဆောက်အဦးများ တည်ဆောက်အသုံးပြုနိုင်ရန် စီမံဆက်စပ်ဆောင် ရွက်ပေးရန် လိုအပ်ကြောင်း၊ အလားတူ MSME များနှင့် မျိုးစေ့ထုတ်လုပ်သူတောင်သူများအကြား ပေါင်းကူး ဆက်သွယ်နိုင်ရေး ဆောင် ရွက်ရာ၌ MSME များမှ လိုအပ်သည့် သီးနှံထွက်ကုန်ကြမ်းများ စိုက်ပျိုးထုတ်လုပ်ရာတွင် လိုအပ်သည့် အရည်အသွေးနှင့်ကိုက်ညီသော သီးနှံ မျိုးကောင်း မျိုးသန့် မျိုးစေ့များ ထုတ်လုပ်ပေးနိုင်သည့်ဝန်းကျင်ကောင်းများ ဖန်တီးခြင်းလုပ်ငန်းအား ဥပဒေ၊ နည်းဥပဒေ၊ ညွှန်ကြား ချက်များနှင့်အညီ စိစစ်ထိန်းကျောင်း ဆောင်ရွက်ပေးရမည်ဖြစ်ကြောင်း၊ 

မျိုးစေ့ထုတ်လုပ်ငန်းများဆောင် ရွက်လျက်ရှိသည့် Seed  Growers များအား နည်းမှန်လမ်းမှန် ဆောင် ရွက်ရန် လေ့ကျင့်ပေးပြီး အရင်းအနှီးရရှိရေးနှင့် စုပေါင်းဆောင်ရွက်သည့် အလေ့အကျင့် ဖြစ်စေရေးအတွက် မျိုးစေ့အစု အဖွဲ့များ ဖွဲ့စည်းဆောင် ရွက်ပေးနိုင်ရန် သက်ဆိုင်ရာတိုင်းဒေသကြီး ပြည်နယ် အစိုးရအဖွဲ့များနှင့် ပေါင်းစပ်ညှိနှိုင်းပေးခြင်းကို အလေးထားဆောင်ရွက်သွားရန် ဖြစ်ကြောင်း ပြောကြားသည်။

မျိုးစေ့ဆိုင်ရာအမျိုးသားကော်မတီ ၏ ၃၂ ကြိမ်မြောက် ကော်မတီအစည်းအဝေးအထိ လယ်ယာသီးနှံ ၇၆၂ မျိုး၊ ဥယျာဉ်ခြံသီးနှံ ၉၈၄ မျိုး၊ စက်မှုသီးနှံ ၁၃၇ မျိုး နှင့် မိဘမျိုးလိုင်း ၂၅၂ စုံ စုစုပေါင်း မျိုးသစ်မျိုးဖျား ၂၁၃၅ မျိုးကို အသိအမှတ်ပြုလက်မှတ်ထုတ်ပေးခဲ့ပြီးဖြစ်ကြောင်း၊ ယနေ့ကျင်းပသည့် ၃၃ ကြိမ်မြောက် အစည်းအဝေးတွင် သက်ဆိုင်ရာ သီးနှံကျွမ်းကျင်မှု ဆိုင် ရာလုပ်ငန်းအဖွဲ့များနှင့် မျိုးစေ့ကျွမ်းကျင်မှုဆိုင်ရာကော်မတီတို့က အဆင့်ဆင့် စိစစ်တင်ပြလာ သည့် အသိအမှတ်ပြုလက်မှတ်၏ သက် တမ်း ၁၀ နှစ်ပြည့် မြောက်၍ သက်တမ်းထပ်တိုးမည့် သီးနှံမျိုးဖျား ၁၄ မျိုး၊ မျိုး အသစ်အဖြစ် လျှောက် ထားလာသည့် လယ်ယာသီးနှံ ၃၀ မျိုး၊ စက်မှုသီးနှံ ၁ မျိုး၊ ဥယျာဉ်ခြံသီးနှံ ၁၁ မျိုးနှင့် မိဘမျိုးလိုင်း ၁၂ စုံ၊ စုစုပေါင်း မျိုးသစ် မျိုးဖျား ၆၈ မျိုးတို့အပေါ်  အသိအမှတ်ပြုလက်မှတ်ထုတ်ပေးနိုင်ရေး သုံးသပ်ဆောင် ရွက်ခဲ့ကြကြောင်း သတင်း ရရှိသည်။

MOALI