ရန်ကုန်ဈေးကွက်

(၂၆-၃-၂၀၂၆ ရက်နေ့ ကောက်ယူဈေးနှုန်းများဖြစ်ပါသည်။)

ဆန်ဈေးကွက်

ယခုရက်သတ္တပတ်အတွင်း ဆန်စပါးကုန်စည်ဒိုင်(ဝါးတန်းလမ်း)တွင် ထုတ်ပြန်ထားသည့် ဆန်ဈေးနှုန်းများအရ ရွှေဘိုပေါ်ဆန်းဆန် အလတ်စ တစ်တင်းခွဲ တစ်အိတ်လျှင် ၁၈၀၀၀၀ ကျပ်နှုန်းနှင့် အောက်စတစ်အိတ်လျှင် ၁၇၀၀၀၀ ကျပ်နှုန်းဖြင့်လည်းကောင်း၊ ဖျာပုံပေါ်ဆန်း ဆန်ဟောင်း အလတ်စတစ်တင်းခွဲ တစ်အိတ်လျှင် ၁၃၀၀၀၀ကျပ်နှုန်းနှင့် အောက်စတစ်အိတ်လျှင် ၁၂၅၀၀၀ ဖြင့်လည်းကောင်း၊ ဖျာပုံပေါ်ဆန်း ဆန်သစ် အလတ်စတစ်တင်းခွဲ တစ်အိတ်လျှင် ၁၂၀၀၀၀ကျပ်နှုန်းနှင့် အောက်စတစ်အိတ်လျှင် ၁၁၅၀၀၀ ဖြင့်လည်းကောင်း၊ ဇီယာဆန်အလတ်စတစ်တင်းခွဲ တစ်အိတ်လျှင် ၅၅၀၀၀ ကျပ်နှုန်းနှင့် အောက်စတစ်အိတ်လျှင် ၅၄၀၀၀ ကျပ်နှုန်းဖြင့် လည်းကောင်း၊ ဧည့်မထဆန်ကြမ်း ၁၅ ရာခိုင်နှုန်း အလတ်စတစ်တင်းခွဲ တစ်အိတ်လျှင် ၅၂၀၀၀ကျပ်နှုန်း နှင့်အောက်စတစ်အိတ်လျှင် ၅၁၅၀၀ ကျပ်နှုန်းဖြင့်လည်းကောင်း၊ ငစိန်ဆန်အလတ်စတစ်တင်းခွဲ တစ်အိတ်လျှင် ၅၂၀၀၀ ကျပ်နှုန်းနှင့် အောက်စတစ်အိတ်လျှင် ၅၁၅၀၀ ကျပ်နှုန်းဖြင့်  ရောင်းဝယ် လျက်ရှိကြောင်းသိရသည်။ ယခင်အပတ် ဈေးနှုန်းများနှင့် နှိုင်းယှဉ်ပါက ဇီယာဆန်အမျိုးအစားမှလွဲ၍ ဆန်ချော၊ ဆန်ကြမ်းများ အားလုံးအနည်း ငယ်စီဈေးမြင့်လာခဲ့ကြောင်းသိရသည်။ ကမ္ဘာ့လောင်စာဆီဈေးနှုန်းများ ဈေးမြင့်လာခြင်းနှင့်အတူ မြန်မာပြည်တွင်း၌လည်း လောင်စာဆီအခက်အခဲများကြောင့် ထုတ်လုပ်မှုသယ်ယူ ပို့ဆောင်စရိတ်များ ဈေးမြင့်လာခဲ့သည်။ ထို့ကြောင့် ပြည်တွင်းစားသုံးမှုများသော ဆန်ချော၊ ဆန်ကြမ်းများအားလုံး ယခင်အပတ်ထက် ဆန်တစ်အိတ်လျှင် ၅၀၀ ကျပ်မှ ၁၅၀၀၀ ကျပ်ခန့်အထိဈေးမြင့်လာခဲ့သည်။ ရွှေဘိုပေါ်ဆန်း အောက်စမှာ ဈေးနှုန်း ပြောင်းလဲမှုမရှိခဲ့သော်လည်း အလတ်စမှာ ဆန်တစ်အိတ်လျှင် ၁၅၀၀၀ ကျပ်ခန့်ဈေးမြင့်ခဲ့သည်။ ဖျာပုံ ပေါ်ဆန်းမှာ ဆန်သစ် အရည်အသွေးခြောက်သွေ့ ကောင်းမွန် လာခြင်းနှင့်စားသုံးသူများက ပိုမိုဝယ်ယူမှုရှိခြင်းကြောင့် ဆန်တစ်အိတ်လျှင် ၅၀၀၀ ကျပ်ဝန်းကျင် ဈေးမြင့်ခဲ့သည်။ ဧည့်မထဆန်ကြမ်း ၁၅ ရာခိုင်နှုန်းနှင့် ငစိန်ဆန်များမှာ ဆန်တစ်အိတ်လျှင် ၅၀၀ ကျပ်ခန့်ဈေးမြင့်ခဲ့သည်။ အရှေ့အလယ်ပိုင်းစစ်ရေးပဋိပက္ခများကြောင့် ဖြစ်ပေါ်နေသော ကမ္ဘာအနှံ့မှ စက်သုံးဆီ အခက်အခဲများနည်းတူ မြန်မာပြည်တွင်း၌လည်း နွေစပါးရိတ်သိမ်းချိန် စက်သုံးဆီ လိုသလောက် ဝယ်ယူရရှိရန် ခက်ခဲလျက်ရှိသည်။ တောင်သူများမှာ ရိတ်သိမ်းဆဲ စပါးများ ပျက်စီးမည်ကို စိုးရိမ်ခြင်းကြောင့် စက်သုံးဆီများအား ဈေးကြီးပေးကာ ဝယ်ယူရိတ်သိမ်းမှုများလည်းရှိခဲ့သည်။ ယခုကဲ့သို့ စက်သုံးဆီရရှိရန် ခက်ခဲခြင်းကြောင့် မိုးစပါးစိုက်ပျိုးချိန်တွင်လည်း စိုက်ပျိုးထုတ်လုပ်မှုများ လျော့ကျနိုင်ကြောင်း ခန့်မှန်းမှုများလည်းရှိသည်။ ပြည်ပပို့ ဆန်ဈေးကွက်တွင်လည်း ကမ္ဘာ့ရေနံဈေးမြင့်တက်နေခြင်း၊ နိုင်ငံတကာ ရွှေဈေးမတည်ငြိမ်ခြင်း၊ ပြည်ပငွေလဲနှုန်းများ လှုပ်ခတ်မှုများနေခြင်းတို့ကြောင့် ကုန်သည်ဝယ်လက်များမှ စောင့်ကြည့်မှုများရှိကာ အရောင်းအဝယ်အေးလျက် ရှိကြောင်း သိရသည်။ ရန်ကုန် ဈေးကွက်သို့ ဖျာပုံ၊ မော်ကျွန်း၊ ဘိုကလေး၊ ကွမ်းခြံကုန်း၊ ဒေးဒရဲ၊ ကော့မှူး၊ တွံတေး၊ ဝါးခယ်မ၊ မြောင်းမြ၊ ကျိုက်လတ်၊လပွတ္တာဒေသများမှ ဆန်ဝင်ရောက်မှု ရှိခဲ့ကြောင်းသိရသည်။

အစေ့ထုတ်ပြောင်းဈေးကွက်

အစေ့ထုတ်ပြောင်းများအား ထိုင်းနိုင်ငံသို့ သွင်းကုန် ကင်းလွတ်ခွင့်ဖြင့် တင်ပို့ နိုင်သော ကာလ တိုတောင်းခြင်း၊ သယ်ယူပို့ဆောင်စရိတ်များ ဈေးမြင့်လာခြင်း၊ ထိုင်းနိုင်ငံသို့ တင်ပို့မည့် ပြောင်းများ အတွက် မီးခိုးမြူကင်းစင်ကြောင်း ထောက်ခံချက်များ စိစစ်ခွင့်ပြုထုတ်ပေးလျက်ရှိခြင်းတို့ကြောင့် အစေ့ထုတ်ပြောင်းများအား ပုံမှန်တင်ပို့မှုများရှိလာခဲ့ခြင်းဖြစ်သည်။ အစေ့ထုတ်ပြောင်းများအား ကုန်သည်ဝယ်လက်များက ဈေးမြှင့်ပေးကာ ဝယ်ယူမှုများရှိလာခဲ့ခြင်းကြောင့် အစေ့ထုတ်ပြောင်း ဈေးနှုန်းများ ယခင်အပတ်ထက်ဈေးမြင့်လာခဲ့သည်။  အစေ့ထုတ်ပြောင်း ၅၄ ပိဿာလျှင် ယခင် အပတ် ပျမ်းမျှ ဈေးနှုန်းမှာ ၈၂၀၈၀ ကျပ်ဖြစ်ပြီး ယခုအပတ်ဈေးနှုန်းမှာ ၈၄၂၄၀ ကျပ်သို့ ရောက်ရှိဈေးမြင့်ခဲ့ သည်။

စားဖိုဆောင်သီးနှံဈေးကွက်

ကြက်သွန်နီ(ထူး၊လတ်၊ သေး) ဈေးနှုန်းများမှာ ဆိပ်ဖြူ၊ မြင်းခြံ၊ မြစ်သား၊ မုံရွာ၊ တောင်တွင်း၊ မင်းလှ၊ မင်းဘူး၊ အောင်လံ၊ ပခုက္ကူ၊ မိတ္ထီလာ၊ မြစ်သား၊ ကျောက်ဆည်စသော ဒေသများမှ ကုန်အဝင် ပုံမှန်ရှိသော်လည်း သယ်ယူပို့ဆောင်စရိတ်များ ဈေးမြင့်လာခြင်း၊ သင်္ကြန်ကာလနီးလာခြင်းကြောင့် စားသုံးသူများမှ ပိုမိုဝယ်ယူမှုရှိခြင်းတို့ကြောင့် ယခင်အပတ်ထက် ဈေးမြင့်လာခဲ့သည်။ ကြက်သွန်နီ (ထူး၊လတ်၊သေး)တစ်ပိဿာလျှင် ယခင်အပတ်ပျမ်းမျှဈေးနှုန်းမှာ ၂၀၇၅-၂၀၀၀-၁၃၂၅ ကျပ်ဖြစ်ပြီး ယခု အပတ်ဈေးနှုန်းမှာ ၂၃၀၀-၂၁၅၀-၁၅၂၅ ကျပ်သို့ ရောက်ရှိဈေးမြင့်ခဲ့ခြင်းဖြစ်သည်။ ကြက် သွန်ဖြူ(ရှမ်း)မှာ ဈေးကွက်သို့ ကုန်အဝင်ပိုလာချိန်ဖြစ်ခြင်း၊ ဗမာကြက်သွန်ဖြူများလည်း အသစ်ပေါ်ချိန်ဖြစ်ခြင်း၊ ဈေးကွက်အတွင်း ကုန်အဝင်လှိုင်ချိန်တွင် စားသုံးသူများမှ ပုံမှန်ဝယ်ယူမှုသာရှိခြင်းကြောင့် ကြက်သွန်ဖြူ (ရှမ်း)များ ဈေးငြိမ်အရောင်းအဝယ်အေးခဲ့သည်။ ကြက်သွန်ဖြူ (ရှမ်း) တစ်ပိဿာလျှင် ယခင်အပတ်နှင့် ယခုအပတ်ဈေးနှုန်းမှာ ၆၅၀၀ ကျပ်ဖြစ်သည်။ ကြက်သွန် ဖြူ(ကြူကုတ်)မှာ တင်သွင်းဈေးမြင့်ခြင်းနှင့် ကုန်အဝင်နည်းခြင်းကြောင့်ယခင်အပတ်ထက်ဈေးမြင့်လာခဲ့သည်။ ကြက်သွန်ဖြူ (ကြူကုတ်)တစ်ပိဿာလျှင် ယခင်အပတ်ပျမ်းမျှဈေးနှုန်းမှာ ၁၁၈၀၀ ကျပ်ဖြစ်ပြီး ယခုအပတ်ဈေးနှုန်းမှာ ၁၄၅၀၀ ကျပ်သို့ ရောက်ရှိဈေးမြင့်ခဲ့သည်။ ငရုတ်ခြောက်(ရှည်နှင့်လတ်)မှာ ဈေးကွက်သို့ ကုန်အဝင်ပို လာချိန်ဖြစ်ခြင်း, အအေးခန်း လှောင်စများဖြစ်၍ အရည်အသွေးကောင်းခြင်း၊ရာသီပူလာချိန်ဖြစ်ခြင်း ကြောင့်  ဝယ်လိုအားနည်းခြင်းတို့ကြောင့် ယခင်အပတ်ထက် ဈေးနိမ့်လာခဲ့သည်။ ငရုတ်ခြောက်(ရှည်)မှာ ပန်းရဲ၊ မြားနီ အအေးခန်းလှောင် ငရုတ်များဈေးကွက်သို့ ကုန်အဝင်ရှိပြီး ငရုတ်ခြောက်(လတ်)မှာ ဟင်္သာတ မိုးထောင်တစ်မျိုးသာ ကုန်ဝင်ရောက်မှုရှိခဲ့သည်။ ငရုတ်ခြောက်(ပွ)မှာ ဆက၊ ဆင်ဖြူကျွန်းပုနှင့် မြစ်ဝ ပုငရုတ်များ အဝင်ပုံမှန်ရှိခြင်း၊ ရောင်းလိုအား၊ ဝယ်လိုအားမျှနေခြင်း တို့ကြောင့် ယခင်အပတ်ဈေးနှုန်း များဖြင့်သာ ဈေးငြိမ်အရောင်းအဝယ်အေးခဲ့သည်။ ငရုတ်ခြောက်(ရှည်၊လတ်၊ပွ) တစ်ပိဿာလျှင် ယခင်အပတ်ပျမ်းမျှဈေးနှုန်းမှာ ၁၅၇၅၀-၁၅၂၅၀-၂၂၀၀၀ ကျပ်ဖြစ်သည်။ အာလူးဈေးနှုန်းများမှာ ကုန်အဝင်ပုံမှန်ရှိသော်လည်း ရောင်းလိုအားများခြင်းကြောင့် (အက်စ်ဝမ်းနှင့် အိုကေ၊ )အာလူးများမှာ အနည်းငယ်ဈေးနိမ့်လာခဲ့သည်။ အာလူး(အေဝမ်း)မှာ ရောင်းလိုအား၊ ဝယ်လိုအား မျှနေခြင်းကြောင့် ဈေးငြိမ်လျက်ရှိသည်။ အာလူး (အက်စ်ဝမ်းနှင့် အိုကေ၊ အေဝမ်း)တစ်ပိဿာလျှင် ယခင်အပတ်ပျမ်းမျှ ဈေးနှုန်းမှာ ၃၀၀၀-၃၃၀၀-၂၅၀၀ ကျပ်ဖြစ်ပြီး ယခုအပတ်ဈေးနှုန်းမှာ ၂၈၀၀-၂၈၀၀-၂၅၀၀ကျပ် ဖြစ်သည်။

စားသုံးဆီဈေးကွက်

ကမ္ဘာ့စားအုန်းဆီ အများဆုံးထုတ်လုပ်တင်ပို့သော အင်ဒိုနီးရှားနိုင်ငံနှင့် မလေးရှားနိုင်ငံများတွင် ဇန်နဝါရီမှ မတ် အထိ ကာလသည် စားအုန်းဆီထုတ်လုပ်မှုလျော့ကျသောကာလဖြစ်ခြင်း၊ စားအုန်းဆီ အများဆုံးထုတ်လုပ်သော အင်ဒိုနီးရှားနိုင်ငံတွင်လည်း စားအုန်းဆီပို့ကုန်အပေါ် အခွန်ကောက်ခံရာတွင် မတ် ၁ ရက်နေ့မှစတင်ကာ လက်ရှိအခွန်ရာခိုင်နှုန်းထက် ၂ ဒသမ ၅ ရာခိုင်နှုန်းတိုးမြှင့်ပြီး ၁၂ ဒသမ ၅ ရာခိုင်နှုန်းအထိ ကောက်ခံရန် အတည်ပြုထားပြီးဖြစ်ခြင်း၊ အရှေ့အလယ်ပိုင်းပဋိပက္ခများ ဖြစ်ပွားလာ ခြင်းကြောင့် လောင်စာဆီဈေးနှုန်းများ မြင့်တက်နေခြင်း၊ နိုင်ငံတကာ ကုန်သွယ်ရေးလုပ်ငန်းများတွင် လောင်စာဆီ အကျပ်အတည်များအပေါ် စိုးရိမ်မှုများ မြင့်တက်နေချိန်ဖြစ်ခြင်း စသည့်အခြေအနေ များကြောင့် စားအုန်းဆီတင်သွင်းရသော ဈေးနှုန်းများအား ထပ်မံမြင့်တက်စေခဲ့သည်။ ထို့ကြောင့် ကမ္ဘာ့စားအုန်းဆီထုတ်လုပ်တင်ပို့သော နိုင်ငံများတွင် ဖြစ်ပေါ်လျက်ရှိသော ဈေးကွက်ဈေးနှုန်း များအပေါ်အခြေခံ၍ စားအုန်းဆီတင်သွင်း သိုလှောင်ဖြန့်ဖြူးခြင်း၊ လုပ်ငန်းကြီးကြပ်မှု ကော်မတီ၏ ၂၀၂၆ ခုနှစ်၊ မတ် ၂၀ ရက်မှ  ၂၆ ရက်အထိ ကုန်ဆုံးသော ကာလအတွက် ထုတ်ပြန်ထားသော ရန်ကုန် အထိုင်လက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင် ၆၆၀၀ ကျပ်ဖြစ်သည်။ ယခင် အပတ် ဈေးနှုန်းနှင့် နှိုင်းယှဉ်ပါက တစ်ပိဿာလျှင် ၂၅ ကျပ်နှုန်းဈေးမြင့်လာခဲ့ခြင်းဖြစ်သည်။  ပြင်ပရှိ လက်လီဈေးကွက်တွင် သတ်မှတ် ထားသော ဆီဆိုင်အချို့၌ ရည်ညွှန်းဈေးနှုန်းထက် များစွာမကွာသော ဈေးနှုန်းများဖြင့် တစ်အိမ်ထောင်လျှင် စားအုန်းဆီ ၅၀ ကျပ်သားနှုန်းရောင်းချပေးလျက်ရှိသည်။ သင်္ကြန်ကာလနှင့် အလှူပွဲများအတွက် လည်း ဝယ်လိုအားမြင့်တက်လျက်ရှိကြောင်းသိရသည်။

အေးသန္တာဝင်း