ဗီယက်နမ် အလယ်ပိုင်းဒေသတွင် ပရိုတင်းဓာတ် ဖူလုံစေရန် ရွှေရောင်ငါးမုတ် မွေးမြူမှု မြှင့်တင်ဆောင်ရွက်လျက်ရှိ
ဗီယက်နမ်အလယ်ပိုင်း ကမ်းရိုးတန်းပြည်နယ်များသည် ပြည်တွင်းပရိုတင်းဓာတ် လိုအပ်ချက်ကို ဖြည့်ဆည်းပေးနိုင်ရန် ရွှေရောင်ငါးမုတ် (Golden Pompano) မွေးမြူထုတ်လုပ်မှုကို တိုးချဲ့ဆောင်ရွက်လျက်ရှိကြောင်း သိရသည်။
Quang Tri နှင့် Ha Tinh ပြည်နယ်များရှိ ဒေသန္တရအာဏာပိုင်များသည် VietGAP စံနှုန်းနှင့်အညီ မွေးမြူသည့်ပုံစံများနှင့် ဈေးကွက်ချိတ်ဆက်မှု အစီအစဉ်များကို မြှင့်တင်ပေးနေကြသည်။ ယင်းမှာ ဝက်သားဈေးနှုန်း မတည်ငြိမ်မှုနှင့် အမဲသားဈေးနှုန်း မြင့်တက်နေမှုများအကြား ပင်လယ်ငါးကို အစားထိုး ပရိုတင်းတစ်မျိုးအဖြစ် ရည်ရွယ်လုပ်ဆောင်ခြင်းဖြစ်သည်။
Ha Tinh ပြည်နယ်ရှိ စမ်းသပ်မွေးမြူရေးခြံများတွင် တစ်ဟက်တာလျှင် ၉ တန်မှ ၁၁ တန်အထိ ထွက်ရှိကြောင်း သိရပြီး ခြံဖမ်းဈေးမှာ တစ်ကီလိုဂရမ်လျှင် အမေရိကန်ဒေါ်လာ ၅ ဒသမ ၅ ခန့် ရှိသည်။ လက်ရှိတွင် ဟက်တာ ၅၀ ကျော်တွင် မွေးမြူထုတ်လုပ်လျက်ရှိသည်။
အဆိုပါ တိုးချဲ့မှုအများစုမှာ အကျိုးအမြတ်နည်းပါးသော ပုစွန်ကန်များကို ပြန်လည်အသုံးချခြင်းဖြစ်ပြီး ကမ်းရိုးတန်း အခြေခံအဆောက်အအုံများကို ပြုပြင်ပြောင်းလဲခြင်းဖြင့် ပုစွန်ရောဂါနှင့် ရာသီဥတုဆိုင်ရာ အန္တရာယ်များမှ ရှောင်လွှဲနိုင်ရန် ဆောင်ရွက်ခြင်း ဖြစ်သည်။
လုပ်ငန်းစောင့်ကြည့်လေ့လာသူများ၏ အဆိုအရ ယခုဖြစ်ထွန်းမှုသည် စားသုံးသူများက ရေထွက်ကုန်များဆီသို့ ပိုမိုအာရုံစိုက်လာခြင်းနှင့် သမရိုးကျ မွေးမြူရေးလုပ်ငန်းများအပြင် အခြားအသားကဏ္ဍများကို ချဲ့ထွင်ရန် ပြည်နယ်အာဏာပိုင်များ၏ ကြိုးပမ်းမှုကို ထင်ဟပ်စေကြောင်း သိရသည်။
TTP
www.asian-agribiz.com
(9 March 2026)