ရန်ကုန်ဈေးကွက်

(၂၄-၂-၂၀၂၆ ရက်နေ့ ကောက်ယူဈေးနှုန်းများဖြစ်ပါသည်။)

ဆန်ဈေးကွက်

ယခုရက်သတ္တပတ်အတွင်း ဆန်စပါးကုန်စည်ဒိုင်(ဝါးတန်းလမ်း)တွင်ထုတ်ပြန်ထားသည့် ဆန်ဈေးနှုန်းများအရ ရွှေဘိုပေါ်ဆန်းဆန် အလတ်စ တစ်တင်းခွဲ တစ်အိတ်လျှင် ၁၇၀၀၀၀ ကျပ်နှုန်းနှင့် အောက်စတစ်အိတ်လျှင် ၁၆၅၀၀၀ ကျပ်နှုန်း၊ ဖျာပုံပေါ်ဆန်း ဆန်ဟောင်း အလတ်စတစ်တင်းခွဲ တစ်အိတ်လျှင် ၁၂၅၀၀၀ကျပ်နှုန်းနှင့် အောက်စတစ်အိတ်လျှင် ၁၂၀၀၀၀ ကျပ်နှုန်း၊ ဖျာပုံပေါ်ဆန်း ဆန်သစ် အလတ်စတစ်တင်းခွဲ တစ်အိတ်လျှင် ၁၀၅၀၀၀ကျပ်နှုန်းနှင့် အောက်စတစ်အိတ်လျှင် ၉၇၀၀၀ ကျပ်နှုန်း၊ ဇီယာဆန် ဆန်ဟောင်းအလတ်စတစ်တင်းခွဲ တစ်အိတ်လျှင် ၅၅၀၀၀ ကျပ်နှုန်းနှင့် အောက်စတစ်အိတ်လျှင် ၅၂၀၀၀ကျပ်နှုန်း၊ ဧည့်မထဆန်ကြမ်း ၁၅ ရာခိုင်နှုန်း အလတ်စတစ်တင်းခွဲ တစ်အိတ်လျှင် ၅၀၅၀၀ကျပ်နှုန်း နှင့်အောက်စတစ်အိတ်လျှင် ၅၀၀၀၀ ကျပ်နှုန်း၊ ငစိန်ဆန်အလတ်စတစ်တင်းခွဲ တစ်အိတ်လျှင် ၅၀၀၀၀ ကျပ်နှုန်းနှင့် အောက်စတစ်အိတ်လျှင် ၄၉၀၀၀ ကျပ်နှုန်းဖြင့်  ရောင်းဝယ်လျက်ရှိကြောင်းသိရသည်။ ယခင်အပတ်ဈေးနှုန်းများနှင့် နှိုင်းယှဉ်ပါက ဈေးနှုန်းပြောင်းလဲမှုမရှိခဲ့ပေ။ ဈေးကွက်သို့ ဆန်အဝင်ပုံမှန်ရှိခြင်း၊ ဆန်ချောနှင့် ဆန်ကြမ်းရောနှော စားသုံးမှုများခြင်း၊ သင့်တင့်မျှတသော ဈေးနှုန်းများဖြင့် ဆန်ကားများလှည့်လည် ရောင်းချပေးလျက်ရှိခြင်း၊ စားသုံးသူများက လိုအပ်သလောက်သာ ပုံမှန်ဝယ်ယူမှုရှိခြင်းတို့ကြောင့် ပြည်တွင်းစားသုံးမှုများသော ဆန်ချော၊ ဆန်လတ်အများစုဈေးငြိမ်အရောင်းအဝယ်အေးခဲ့ကြောင်းသိရသည်။  ပြည်ပပို့ဆန်ဈေးကွက်တွင်လည်း မဒါဂက်စကာ၊ ဖိလစ်ပိုင်၊တရုတ်၊ စပိန်၊ ပိုလန်၊ချက်ရီပတ်ဘလစ်၊ တူရကီ၊ ဗီယက်နမ်၊ လစ်သူရေးနီးယား၊ အီတလီ စသော နိုင်ငံပေါင်း ၂၀ ကျော်သို့ ပုံမှန်တင်ပို့လျက်ရှိကြောင်းသိရသည်။  ရန်ကုန် ဈေးကွက်သို့ ဖျာပုံ၊ မော်ကျွန်း၊ ဘိုကလေး၊ ကွမ်းခြံကုန်း၊ ဒေးဒရဲ၊ ကော့မှူး၊ တွံတေး၊ ဝါးခယ်မ၊ မြောင်းမြ၊ ကျိုက်လတ်၊လပွတ္တာဒေသများမှ ဆန်ဝင်ရောက်မှု ပုံမှန်ရှိခဲ့ကြောင်းသိရသည်။

အစေ့ထုတ်ပြောင်းဈေးကွက်

အစေ့ထုတ်ပြောင်းများအား ထိုင်းနိုင်ငံသို့ အကောက်ခွန်လွတ်တင်ပို့သော ကာလဖြစ်ခြင်း၊ ပို့ကုန်ရငွေအပေါ်ဖြေလျော့မှုများရှိလာခြင်းကြောင့် ကုန်သည် ဝယ်လက်များက ဈေးမြှင့် ဝယ်ယူမှုရှိခြင်း၊ ယခင်နှစ်များက အစေ့ထုတ်ပြောင်း အကောက်ခွန်လွတ်တင်သွင်းခွင့်ကာလမှာ ၇ လ ရှိခဲ့သော်လည်း ယခုနှစ်အတွက် အကောက်ခွန်လွတ်တင်သွင်းခွင့်ကာလမှ ၅ လသာရှိခြင်းကြောင့် အပြိုင်အဆိုင်ဝယ်ယူမှုများရှိခြင်း၊ ရှမ်းပြောင်းများလက်ကျန်နည်းလာခြင်းတို့ကြောင့် အစေ့ထုတ် ပြောင်း ၅၄ ပိဿာလျှင် ယခင် အပတ် ပျမ်းမျှ ဈေးနှုန်းမှာ ၈၁၅၄၀ ကျပ်ဖြစ်ပြီး ယခုအပတ်ဈေးနှုန်းမှာ ၈၂၆၂၀ ကျပ်သို့ ရောက်ရှိဈေးမြင့်ခဲ့သည်။ အခြားသော အာဆီယံနိုင်ငံများသို့ ပြောင်းတန်ချိန်ပမာဏတိုးမြှင့် တင်ပို့ရောင်းချနိုင်ရန် မြန်မာ နိုင်ငံပြောင်းလုပ်ငန်းအသင်းက စီစဉ်လျက်ရှိကြောင်းသိရသည်။

ပဲမျိုးစုံဈေးကွက်

ပဲမျိုးစုံအဓိကဝယ်လက်ဖြစ်သော အိန္ဒိယနိုင်ငံတွင် မတ်ပဲဟောင်းလက်ကျန်နည်းကာ ပဲလိုအပ် ချက်ရှိသော်လည်း ပဲသစ်ပေါ်ချိန်နီးလာခြင်းကြောင့် အိန္ဒိယပြည်တွင်း မတ်ပဲဈေးကျဆင်းလာခြင်း၊ မြန်မာပြည်တွင်း ၌လည်း ပဲသစ်အဝင်လှိုင်ချိန်ဖြစ်ခြင်း၊ နိုင်ငံခြားငွေ တန်ဖိုးကျဆင်းလာခြင်းတို့ကြောင့် မတ်ပဲ(သင်္ဘောတင်) ဈေးနှုန်းများ ယခင်အပတ်ထက် ဈေးနိမ့်လာခဲ့ သည်။ မတ်ပဲ(သင်္ဘောတင်)တစ်တန်လျှင် ယခင်အပတ်ပျမ်းမျှဈေးနှုန်းမှာ ၃၀၆၄၀၀၀ ကျပ်ဖြစ်ပြီး ယခု အပတ်ဈေးနှုန်းမှာ ၃၀၁၈၀၀၀ ကျပ်သို့ ရောက်ရှိဈေးနိမ့်ခဲ့သည်။ အလားတူပင် အိန္ဒိယနိုင်ငံ၌ ပြည်တွင်း သို့ ဆူဒန်၊ မိုဇမ်ဘစ်၊ နိုင်ဂျီရီးယားနိုင်ငံများမှ ပဲစင်းငုံများ ဝင်ရောက်မှုရှိချိန်ဖြစ်ခြင်းကြောင့် ပဲစင်းငုံ ဈေးနှုန်းများ ကျဆင်းလာချိန်ဖြစ်ခြင်း၊ မြန်မာပြည်တွင်း ငွေကြေးဈေးကွက်တွင် နိုင်ငံခြားငွေ တန်ဖိုးကျ ဆင်းလာခြင်းတို့ကြောင့် ပဲစင်းငုံ(သင်္ဘောတင်)တစ်တန်လျှင် ယခင်အပတ်ဈေးနှုန်းမှာ ၃၁၆၃၀၀၀ ကျပ်ဖြစ်ပြီး ယခုအပတ် ဈေးနှုန်းမှာ ၃၁၃၅၀၀၀ ကျပ်သို့ ရောက်ရှိဈေးနိမ့်ခဲ့သည်။ ယခုရက်သတ္တပတ်အတွင်း ကုန်စည်ဒိုင် ဖွင့်ရက် ၆ ရက်ရှိခဲ့ပြီး မတ်ပဲ(သင်္ဘောတင်) ကုန်သေတ္တာ ၂၀၅ လုံးခန့်အရောင်းအဝယ်ဖြစ်ခဲ့ပြီး ပဲစင်းငုံ(သင်္ဘောတင်)မှာ ကုန်သေတ္တာ ၇၅ လုံးခန့် အရောင်းအဝယ်ဖြစ်ခဲ့ကြောင်းသိရသည်။ ပဲတီရွှေဝါဈေးနှုန်းများမှာ ပဲသစ်ပေါ်ချိန်ဖြစ်ခြင်း၊ ပြည်တွင်း ပြည်ပ ဝယ်လက်များမှ ဝယ်လိုအားနည်း ခြင်းတို့ကြောင့် ပဲတီရွှေဝါ ၃ တင်း/ ၆၀ ပိဿာလျှင် ယခင်အပတ် ပျမ်းမျှဈေးနှုန်းမှာ ၃၆၅၅၅၀ ကျပ်ဖြစ်ပြီး ယခုအပတ်ဈေးနှုန်းမှာ ၃၃၃၀၀၀ကျပ်သို့ ရောက်ရှိဈေးနိမ့်ခဲ့ သည်။ ကုလားပဲ၊ ပဲလွမ်းဖြူ၊ ဘိုကိတ်ပဲများမှာ ပဲသစ်အဝင်ရှိလာချိန်ဖြစ်ခြင်း၊ ပြည်ပပို့ကုန်ပဲမာများ ဈေးနိမ့်လာချိန်ဖြစ်ခြင်းနှင့် အရောင်းအဝယ်အေးခြင်းတို့ကြောင့် ကုလားပဲ တစ်ပိဿာလျှင် ယခင်အပတ်ပျမ်းမျှ ဈေးနှုန်း ၄၂၅၅ ကျပ်မှ ယခုအပတ်ဈေးနှုန်း ၄၀၈၀ ကျပ်သို့လည်းကောင်း၊ ပဲလွမ်းဖြူ ၃ တင်း/ ၆၀ ပိဿာလျှင် ယခင်အပတ် ပျမ်းမျှဈေးနှုန်းမှာ ၂၄၄၀၅၀ကျပ်မှ ယခုအပတ်ဈေးနှုန်း ၂၃၅၀၅၀ ကျပ်သို့လည်းကောင်း၊ ဘိုကိတ်ပဲ ၃ တင်း/ ၆၀ ပိဿာလျှင် ယခင်အပတ် ပျမ်းမျှဈေးနှုန်းမှာ ၂၀၈၅၀၀ ကျပ်မှ ယခုအပတ်ဈေးနှုန်းမှာ ၂၀၆၅၅၀ကျပ်သို့ လည်းကောင်း အသီးသီးရောက်ရှိဈေးနိမ့်ခဲ့ကြသည်။ ထောပတ်ပဲမှာ ပဲသစ်အချို့ အဝင်ရှိသော်လည်း အရောင်းအဝယ်အေးခြင်းကြောင့် ရောင်းလိုအား၊ ဝယ်လိုအားမျှကာ ဈေးငြိမ်လျက်ရှိသည်။ ထောပတ်ပဲ ၃ တင်း/ ၆၀ ပိဿာလျှင် ယခင်အပတ်နှင့်ယခုအပတ် ပျမ်းမျှဈေးနှုန်းမှာ၂၂၀၈၀၀ ကျပ်ဖြစ်သည်။ ပဲပုပ် ပဲမှာ ပဲဟောင်းလက်ကျန်ပစ္စည်းပြတ်ချိန်တွင်ပဲသစ်အဝင်ရှိလာခြင်း၊ ကုန်အဝင်နည်းနေသေးခြင်းနှင့် အရည်အသွေးကောင်းခြင်းတို့ကြောင့် ယခင်အပတ်ထက် ဈေးမြင့်ခဲ့သည်။ ပဲပုပ်ပဲ ၃ တင်း/ ၆၀ ပိဿာလျှင် ယခင်အပတ် ပျမ်းမျှဈေးနှုန်းမှာ ၄၀၇၅၅၀ ကျပ်ဖြစ်ပြီး ယခုအပတ်ဈေးနှုန်းမှာ ၄၁၄၀၀၀ ကျပ်သို့ ရောက်ရှိဈေးမြင့်ခဲ့သည်။

စားဖိုဆောင်သီးနှံဈေးကွက်

ငရုတ်ခြောက်(ရှည်)နှင့် (ပွ)မှာ ဈေးကွက်သို့ ကုန်အဝင်နည်းခြင်းနှင့် အရည်အသွေးကောင်းခြင်းကြောင့် ယခင်အပတ်ထက်ဈေးမြင့်ခဲ့ပြီး ငရုတ်ခြောက်(လတ်)မှာ ကုန်အဝင် ပုံမှန်ရှိလာခြင်းနှင့် ရောင်းလိုအားမျှနေခြင်းကြောင့် ဈေးငြိမ်လျက်ရှိသည်။ ငရုတ်ခြောက် (ရှည်၊လတ်၊ပွ) တစ်ပိဿာလျှင် ယခင်အပတ်ပျမ်းမျှဈေးနှုန်းမှာ ၁၅၅၀၀-၁၄၇၅၀-၂၂၇၅၀ ကျပ်ဖြစ်ပြီး ယခုအပတ်ဈေးနှုန်းမှာ ၁၆၂၅၀-၁၄၇၅၀-၂၃၅၀၀ ကျပ်ဖြစ်သည်။ ဈေးကွက်သို့ ပန်းရဲ၊ မြားနီ အအေးခန်းလှောင် ငရုတ်ခြောက်ရှည်များ၊ ဟင်္သာတ မိုးထောင် ငရုတ်ခြောက်လတ်နှင့် စက ဆင်ဖြူကျွန်းငရုတ်ခြောက်ပွများ ကုန်ဝင်ရောက်မှုရှိခဲ့ သည်။ ကြက်သွန်နီ(ထူး၊လတ်၊သေး)မှာ ဈေးကွက်သို့ ကုန်အဝင်လှိုင်ချိန်ဖြစ်ခြင်း၊ ပြည်တွင်းပြည်ပမှ ဝယ်လိုအားနည်းခြင်းတို့ကြောင့် (ထူး၊ လတ်၊သေး)တစ်ပိဿာလျှင် ယခင်အပတ်ပျမ်းမျှဈေးနှုန်းမှာ ၂၁၂၅-၂၀၇၅-၁၇၀၀ကျပ်ဖြစ်ပြီး ယခု အပတ်ဈေးနှုန်းမှာ ၁၆၀၀-၁၆၀၀-၁၂၅၀ကျပ်သို့ ရောက်ရှိဈေးနိမ့်ခဲ့သည်။ ရန်ကုန်ဈေးကွက်သို့ မြင်းခြံ၊ မုံရွာ၊ မြစ်သား၊ ဆိတ်ဖြူ၊ တောင်တွင်း၊ မိတ္ထီလာ၊ မင်းဘူးဒေသများမှ ကုန်ဝင်ရောက်မှုများခဲ့ကြောင်း သိရသည်။ကြက်သွန်ဖြူ(ရှမ်း)မှာ အသစ်ပေါ်ချိန်နီးလာခြင်းကြောင့် အဟောင်းလက်ကျန်များ ကုန်အဝင်များခြင်း၊ ရောင်းလိုအားများခြင်းတို့ဖြစ်ပေါ်ခဲ့ပြီး ယခင်အပတ်ထက် ဈေးနိမ့်ခဲ့သည်။ ထို့ကြောင့် ကြက်သွန်ဖြူ(ကြူကုတ်)မှာလည်း ရောင်းလိုအားများကာ ဈေးနိမ့်လာခဲ့သည်။ ကြက်သွန်ဖြူ (ရှမ်း) တစ်ပိဿာလျှင် ယခင်အပတ်ပျမ်းမျှဈေးနှုန်းမှာ ၇၀၀၀ ကျပ်ဖြစ်ပြီး ယခုအပတ်ဈေးနှုန်းမှာ ၆၅၀၀ ကျပ်သို့လည်းကောင်း၊ ကြက်သွန်ဖြူ(ကြူကုတ်) တစ်ပိဿာလျှင် ယခင်အပတ်ပျမ်းမျှဈေးနှုန်းမှာ ၁၂၀၀၀ ကျပ်ဖြစ်ပြီး ယခုအပတ်ဈေးနှုန်းမှာ ၁၁၅၀၀ ကျပ်သို့လည်းကောင်း အသီးသီးရောက်ရှိဈေးနိမ့် ခဲ့သည်။ အောင်ပန်းနှင့် ပခုက္ကူဒေသများမှ ဈေးကွက်သို့ ကုန်အဝင်နည်းလာခြင်း၊ လတ်တလောတွင် တရုတ်အာလူးများ ကုန်အဝင်မရှိသေးခြင်း၊ အာလူး (အက်စ်ဝမ်းနှင့် အိုကေ၊ )စများ အား စားသုံးသူများမှ ဝယ်ယူမှုများခြင်းတို့ကြောင့် အာလူး (အက်စ်ဝမ်းနှင့် အိုကေ)ဈေးနှုန်းများ ယခင် အပတ်ထက် ဈေးမြင့်ခဲ့သည်။ အာလူး(အေဝမ်း)မှာ အသေးစများခြင်းနှင့် စားသုံးသူများမှ ဝယ်လိုအား နည်းခြင်းတို့ကြောင့် အာလူး (အက်စ်ဝမ်းနှင့် အိုကေ၊ အေဝမ်း)တစ်ပိဿာလျှင် ယခင်အပတ်ပျမ်းမျှ ဈေးနှုန်းမှာ ၃၄၀၀-၃၄၀၀-၃၄၀၀ ကျပ်ဖြစ်ပြီး ယခုအပတ်ဈေးနှုန်းမှာ ၃၅၅၀-၃၆၀၀-၃၁၀၀ကျပ် ဖြစ်သည်။

စားသုံးဆီဈေးကွက်

ကမ္ဘာ့စားအုန်းဆီ ထုတ်လုပ်တင်ပို့သော နိုင်ငံများတွင် ဖြစ်ပေါ်လျက်ရှိသော ဈေးကွက် ဈေးနှုန်း များအပေါ် အခြေခံ၍ စားအုန်းဆီတင်သွင်း သိုလှောင်ဖြန့်ဖြူးခြင်း၊ လုပ်ငန်းကြီးကြပ်မှု ကော်မတီ၏ ၂၀၂၆ ခုနှစ်၊ ဖေဖော်ဝါရီ ၂၀ ရက်မှ  ၂၆ ရက်အထိ ကုန်ဆုံးသော ကာလအတွက် ထုတ်ပြန်ထားသော ရန်ကုန် အထိုင်လက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင် ၆၂၅၀ ကျပ်ဖြစ်သည်။ ယခင် အပတ် ဈေးနှုန်း မှာလည်း ၆၂၅၀ ကျပ်ပင်ဖြစ်သည်။ ပြင်ပရှိ လက်လီဈေးကွက်တွင် သတ်မှတ် ထားသော ဆီဆိုင်အချို့၌ ရည်ညွှန်းဈေးနှုန်းထက် များစွာမကွာသော ဈေးနှုန်းများဖြင့် တစ်အိမ်ထောင် လျှင် စားအုန်းဆီ ၅၀ ကျပ်သားနှုန်းရောင်းချပေး လျက်ရှိသည်။ အချို့သော မြို့နယ်များတွင်စားအုန်းဆီ တစ်ပိဿာ၏ ပြင်ပပေါက်ဈေးမှာ ၁၀၀၀၀ ကျပ်ဝန်းကျင်ဖြစ်သည်။

အေးသန္တာဝင်း