၂၀၂၅ ခုနှစ် ၁၁ လအတွင်း ရုရှား၏ နိုင်ငံခြားကုန်သွယ်မှုပိုငွေ အမေရိကန်ဒေါ်လာ ၁၂၄ ဒသမ ၇ ဘီလီယံရှိ

၂၀၂၅ ခုနှစ်၊ ဇန်နဝါရီမှ နိုဝင်ဘာအထိ ရုရှား၏ နိုင်ငံခြားကုန်သွယ်မှု ပိုငွေသည် အမေရိကန်ဒေါ်လာ ၁၂၄ ဒသမ ၇ ဘီလီယံ ရရှိခဲ့ပြီး ယခင်နှစ် အလားတူကာလနှင့် နှိုင်းယှဉ်ပါက ၁၀ ဒသမ ၄၈ ရာခိုင်နှုန်း ကျဆင်းခဲ့ကြောင်း ရုရှားဖက်ဒရယ်အကောက်ခွန် ဝန်ဆောင်မှုဌာန (Federal Customs Service - FCS) ၏ အချက်အလက်များအရ သိရသည်။

အစီရင်ခံကာလအတွင်း ပို့ကုန်ပမာဏသည် တန်ဖိုးအမေရိကန်ဒေါ်လာ ၃၇၃ ဒသမ ၇ ဘီလီယံ ရှိခဲ့ပြီး ယခင်နှစ်နှင့် နှိုင်းယှဉ်ပါက ဒေါ်လာ ၂၀ ဒသမ ၈ ဘီလီယံသို့ ကျဆင်းခဲ့သည်။ သွင်းကုန်ပမာဏသည် တန်ဖိုး ဒေါ်လာ ၂၄၉ ဘီလီယံရှိခဲ့ပြီး ယခင်နှစ်နှင့် နှိုင်းယှဉ်ပါက ဒေါ်လာ ၆ ဒသမ ၂ ဘီလီယံ ကျဆင်းခဲ့သည်။ ယင်းကြောင့် ရုရှားနိုင်ငံ၏ နိုင်ငံခြားကုန်သွယ်မှု ပမာဏ သည် ဒေါ်လာ ၆၂၂ ဒသမ ၇ ဘီလီယံ ရှိခဲ့ပြီး ၂၀၂၄ ခုနှစ် အလားတူကာလနှင့် နှိုင်းယှဉ်ပါက ၄ ဒသမ ၁၆ ရာခိုင်နှုန်း ကျဆင်းခဲ့သည်။

ရုရှားမှ ဥရောပနိုင်ငံများသို့ တင်ပို့မှုသည် တန်ဖိုးဒေါ်လာ ၅၂ ဒသမ ၂ ဘီလီယံရှိကာ ၁၆ ဒသမ ၃ ရာခိုင်နှုန်း ကျဆင်းခဲ့ပြီး ဥရောပနိုင်ငံများမှ တင်သွင်းမှုသည် ဒေါ်လာ ၆၄ ဒသမ ၅ ဘီလီယံ ရှိကာ ၃ ဒသမ ၃ ရာခိုင်နှုန်း ကျဆင်းခဲ့သည်။ 

အာရှနိုင်ငံများသို့ တင်ပို့မှုသည် ဒေါ်လာ ၂၉၀ ဒသမ ၈ ဘီလီယံရှိကာ ၂ ဒသမ ၆ ရာခိုင်နှုန်း ကျဆင်းလာခဲ့ပြီး တင်သွင်းမှုသည် ဒေါ်လာ ၁၆၅ ဒသမ ၈ ဘီလီယံရှိကာ ၃ ဒသမ ၃ ရာခိုင်နှုန်း ကျဆင်းခဲ့သည်။

တစ်ချိန်တည်းတွင် ရုရှား၏ အာဖရိကနိုင်ငံများသို့ တင်ပို့မှုမှာ ဒေါ်လာ ၁၉ ဒသမ ၆ ဘီလီယံ ရှိကာ ၁၃ ဒသမ ၂ ရာခိုင်နှုန်း ကျဆင်းလာခဲ့ပြီး ယင်းနိုင်ငံများမှ တင်သွင်းမှုမှာ ဒေါ်လာ ၄ ဘီလီယံ ရှိကာ ၂၈ ဒသမ ၇ ရာခိုင်နှုန်း တိုးတက်ခဲ့သည်။ 

မြောက်နှင့် တောင်အမေရိကနိုင်ငံများသို့ ရုရှားတင်ပို့မှုသည် ဒေါ်လာ ၁၀ ဒသမ ၉ ဘီလီယံ ရှိကာ ၁.၃ ရာခိုင်နှုန်း တိုးတက်ခဲ့ပြီး ယင်းနိုင်ငံများမှ တင်သွင်းမှုသည် ဒေါ်လာ ၁၄ ဒသမ ၅ ဘီလီယံ ရှိကာ ၈ ဒသမ ၈ ရာခိုင်နှုန်း မြင့်တက်ခဲ့သည်။

ရုရှား၏ အဓိကပို့ကုန်မှာ တွင်း ထွက်ပစ္စည်း၊ သတ္တုနှင့် သတ္တုထုတ်ကုန်၊ စိုက်ပျိုးရေးထုတ် ကုန်များဖြစ်ပြီး အဓိကသွင်းကုန်မှာ စက် ယန္တရား၊ စက်ကိရိယာ၊ မော်တော် ယာဉ်များ၊ ဓာတုဗေဒစက် မှုလုပ်ငန်းသုံးထုတ်ကုန်များ၊ စိုက်ပျိုးရေးထုတ် ကုန်များ ဖြစ်သည်။ 

၂၀၂၄ ခုနှစ်တွင် ရုရှားနိုင်ငံ၏ နိုင်ငံခြားကုန်သွယ်မှုတွင် ပို့ကုန်ပမာဏသည် တန်ဖိုး အမေရိ ကန် ဒေါ်လာ ၄၃၃ ဒသမ ၉ ဘီလီယံ  ရှိခဲ့ပြီး သွင်းကုန်သည် ဒေါ်လာ ၂၈၃ ဘီလီယံ ရှိခဲ့သဖြင့် ကုန် သွယ်မှုပိုငွေသည် ၁၅၀ ဒသမ ၉ ဘီလီယံအထိ ရရှိခဲ့ကြောင်း သိရသည်။ 

FCS ၏ အချက်အလက်များအရ ရုရှားနိုင်ငံ၏ ဥရောပနိုင်ငံများနှင့် ကုန်သွယ်မှုပမာဏသည် သိသာစွာ ကျဆင်းလျက်ရှိပြီး အာရှနိုင်ငံများနှင့် ကုန်သွယ်မှုသည် တိုးတက်လျက်ရှိကြောင်း သိရသည်။ 

ခွန်မျိုးသူ

https://www.interfax.ru/business/1067747