စိုက်ပျိုးရေးဆိုင်ရာ တန်ဖိုးကွင်းဆက်တစ်လျှောက် လုပ်ကွက်ငယ်တောင်သူများကို ပံ့ပိုးပေးနိုင်ရေးအတွက် အစိုးရ-ပုဂ္ဂလိက ပူးပေါင်းဆောင်ရွက်မှုခိုင်မာလာစေရေး ဒေသတွင်းအလုပ်ရုံဆွေးနွေးပွဲကို မြန်မာနိုင်ငံက အိမ်ရှင်အဖြစ် အွန်လိုင်းစနစ်ဖြင့် လက်ခံကျင်းပ

နေပြည်တော်၊ ဖေဖော်ဝါရီ ၆

ဘင်းမ်စတက်အတွင်းရေးမှူးချုပ်ရုံးနှင့် စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန၊ စီမံကိန်းဦးစီးဌာနတို့ ပူးပေါင်း၍ ဘင်းမ်စတက်အဖွဲ့ဝင်နိုင်ငံများအကြား စိုက်ပျိုးရေးဆိုင်ရာ တန်ဖိုးကွင်းဆက်တစ်လျှောက် လုပ်ကွက်ငယ်တောင်သူများကို ပံ့ပိုးပေးနိုင်ရေး အတွက် အစိုးရ-ပုဂ္ဂလိက ပူးပေါင်းဆောင်ရွက်မှု ခိုင်မာလာစေရေး ဒေသတွင်းအလုပ်ရုံဆွေးနွေးပွဲ (Regional Workshop on Strengthening Public–Private Partnerships for Agricultural Value Chain Management among BIMSTEC Member States: How PPPs can support smallholder farmers in the value chain) ကို ဖေဖော်ဝါရီ ၅ ရက်နေ့ က အွန်လိုင်း စနစ်ဖြင့် ကျင်းပခဲ့ကြောင်း သိရသည်။

မြန်မာနိုင်ငံအနေဖြင့် ဘင်းမ်စတက် ပူးပေါင်းဆောင်ရွက်မှု ကဏ္ဍများအနက် စိုက်ပျိုးရေးနှင့် စားရေရိက္ခာဖူလုံရေးကဏ္ဍအား ဦးဆောင်နိုင်ငံအဖြစ် တာဝန်ယူထားသည်နှင့်အညီ ဘင်းမ်စတက် စိုက်ပျိုးရေး ပူးပေါင်းဆောင်ရွက်မှု အားကောင်းလာစေရေး ဆိုင်ရာလုပ်ငန်း အစီ အစဉ် (၂၀၂၃-၂၀၂၇) အရ ယနေ့ ဆွေးနွေးပွဲအား အိမ်ရှင်အဖြစ် လက်ခံကျင်းပခြင်းဖြစ်သည်။

ဆွေးနွေးပွဲသဘာပတိ စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန၊ စီမံကိန်းဦးစီးဌာန ညွှန်ကြားရေးမှူးချုပ် ဒေါက်တာသန္တာကြည်က အဖွင့်အမှာစကားပြောကြားရာတွင် ဘင်းမ်စတက်အဖွဲ့ဝင်နိုင်ငံများ၏ စီးပွားရေးဖွံ့ဖြိုးတိုးတက်ရန်အတွက် စိုက်ပျိုးရေးကဏ္ဍသည် အဓိကအခန်းကဏ္ဍမှပါဝင်နေပါကြောင်း၊ စားရေရိက္ခာဖူလုံမှု၊ အလုပ်အကိုင်အခွင့်အလမ်းနှင့် သန်းပေါင်းများစွာသော ကျေးလက်နေပြည်သူများနှင့် လုပ်ကွက်ငယ်တောင်သူတို့၏ အသက်မွေးဝမ်းကျောင်းအတွက် အဓိကကျောရိုးဖြစ်ပါကြောင်း၊ လုပ်ကွက်ငယ်တောင်သူများအနေ ဖြင့် ထုတ်လုပ်မှု တန်ဖိုးကွင်းဆက်တစ်လျှောက်တွင် ရာသီဥတုပြောင်း လဲမှု၊ အခြေခံအဆောက်အအုံ များ မပြည့်စုံမှု၊ ဈေးကွက်မတည်ငြိမ်မှု၊ ထောက်ပံ့ရေးကွင်းဆက် ပြတ်တောက်မှုနှင့် စိုက်ပျိုးရေး ထွက်ကုန်များ၏ အရည်အသွေး၊ ဘေးကင်းမှုစသည့်များစွာသောစိန်ခေါ်မှုများကိုရင်ဆိုင်နေရဆဲ ဖြစ်ပါကြောင်း၊ အဆိုပါစိန်ခေါ် မှုများကို ဖြေရှင်းရန်အတွက် ဆန်းသစ်ပြီး အားလုံးပါဝင်နိုင်သော အစိုးရ-ပုဂ္ဂလိကပူးပေါင်း ဆောင်ရွက်မှုလိုအပ်ပါကြောင်း၊ အစည်းအဝေးသို့ တက်ရောက်လာသည့် ကိုယ်စား လှယ်များအနေဖြင့် မိမိတို့နိုင်ငံအလိုက်တွေ့ကြုံခဲ့ရသည့် အခက်အခဲများ၊ ဖြေရှင်းခဲ့သည့်နည်းလမ်းများ၊ အောင်မြင်မှုရလဒ်များအား အမြင်ချင်း ဖလှယ်ဆွေးနွေးပေးပါရန် တိုက်တွန်းပြောကြားသည်။ 

၎င်းနောက် အပြည်ပြည်ဆိုင်ရာ စားရေရိက္ခာမူဝါဒသုတေသနအဖွဲ့၏ ကိုယ်စားလှယ်က ဆွေးနွေးပြောကြားရာတွင် ဘင်းမ်စတက်ဒေသတွင်းရှိ လုပ်ကွက်ငယ်တောင်သူ ၈၅ ရာခိုင်နှုန်းသည် ၂ ဟက်တာအောက် ပိုင်ဆိုင်ပြီး စိုက်ပျိုးမြေဧရိယာအားလုံး၏ ၄၄ ရာခိုင်နှုန်း တွင် စိုက်ပျိုးလုပ်ကိုင်နေပါကြောင်း၊ ဈေး ကွက်၊ နည်းပညာ၊ ဘဏ္ဍာရေးအခက်အခဲများကို ဖြေရှင်းရန်၊ ဈေးကွက်အာမခံမှုရှိရန်နှင့် လုပ်ကွက် ငယ်တောင်သူများ၏ လူမှုစီးပွားဘဝ မြှင့်တင်ရန်တို့အတွက်အား ကောင်းသော တောင်သူအဖွဲ့အစည်းများရှိရန် လိုအပ်သကဲ့သို့ ပူးပေါင်းပါဝင်သူများအကြား တာဝန်ယူမှုနှင့် စွန့်စားရမှုများကို မျှတစွာခွဲဝေရန် လိုအပ်ပါကြောင်းပြောကြားသည်။ 

အမြဲတမ်းအတွင်းဝန် ဦးကျော်ဆွေလင်းက ဆွေးနွေးပြောကြားရာတွင် စိုက်ပျိုးရေးကဏ္ဍသည် ဘင်းစတက်ဒေသတွင်း စီးပွားရေး ဖွံ့ဖြိုး တိုးတက်မှုနှင့် စားရေရိက္ခာ ဖူလုံမှုအတွက် အဓိကမဏ္ဍိုင်ဖြစ်ပြီး လုပ်ကွက်ငယ်တောင်သူများသည် ထုတ်လုပ်မှုကဏ္ဍ၏ ကျောရိုးဖြစ် သော်လည်း ငွေကြေး၊ နည်းပညာနှင့် ဈေးကွက်ရရှိရန် ခက်ခဲခြင်းများအပြင် ကုန်သွယ်မှုဆိုင်ရာ အခွန်အတားအဆီးများနှင့် ပထဝီနိုင်ငံရေး အပြောင်းအလဲများကဲ့သို့သော စိန်ခေါ်မှုများကို ရင်ဆိုင်နေရပါကြောင်း၊ အိန္ဒိယနိုင်ငံသည် လုပ်ကွက် ငယ်တောင်သူများကို အစုအဖွဲ့လိုက် စုစည်း၍ ဈေးကွက်အတွင်း ဈေးကောင်းရရှိနိုင်ရေး ထုတ်လုပ်သူ တောင်သူ အဖွဲ့အစည်းများဖွဲ့စည်းပြီး အစိုးရမှ ချေးငွေအာမခံရန်ပုံငွေနှင့် အရင်းအနှီး ထောက်ပံ့ငွေများ ပံ့ပိုးပေး ခြင်းဖြင့် တောင်သူများကို ကုန်ကြမ်းထုတ်လုပ်သူအဆင့်မှ စိုက်ပျိုးရေးထုတ်ကုန် ပြုပြင် မွမ်းမံထုတ်လုပ်သူများအဖြစ် ပြောင်းလဲပေးနိုင်ခဲ့ပါကြောင်း၊ ထိုင်းနိုင်ငံသည် ဘဏ်များနှင့် တောင်သူများအကြား သတင်းအချက် အလက် ကွာဟမှုကို လျှော့ချရန် Agri-Map ဒေတာစနစ်ကို အသုံးပြု၍  BAAC ဘဏ်မှတစ်ဆင့် အဆင့်မြင့်နည်းပညာသုံး "Smart Farmer" ချေးငွေများထုတ်ပေးခြင်းကြောင့် ဒူးရင်းနှင့် မန်ကျည်းကဲ့သို့သော ထိုင်းသစ်သီး ဝလံများ၏ ပို့ကုန်တန်ဖိုးကို သိသိသာသာ မြှင့်တင်နိုင်ခဲ့ပါကြောင်း၊ အိန္ဒိယနိုင်ငံနှင့် ထိုင်းနိုင်ငံတို့မှ အောင်မြင်ခဲ့သည့် အစိုးရ-ပုဂ္ဂလိက ပူးပေါင်းဆောင်ရွက်မှု နည်းလမ်းများအား နမူနာယူ ဆောင်ရွက်သင့်ပါကြောင်းဆွေးနွေးပြောကြားသည်။ 

ဆက်လက်၍ အပြည်ပြည်ဆိုင်ရာ စိုက်ပျိုးရေး၊ စားရေရိက္ခာစနစ်နှင့် အာဟာရဆိုင်ရာ ကျွမ်းကျင်ပညာရှင်၊ ဒေါက်တာခင်မာချိုက ဆွေးနွေးပြောကြားရာတွင် လုပ်ကွက်ငယ် တောင်သူများသည် အရင်းအနှီး၊ နည်းပညာနှင့် ဈေးကွက်ရရှိရန် ခက်ခဲပါကြောင်း၊ တောင်သူများ နှင့် ပုဂ္ဂလိကလုပ်ငန်းရှင်များအကြား ယုံကြည်မှုတည်ဆောက် ရန်နှင့် ပုဂ္ဂလိက ရင်းနှီးမြှုပ်နှံမှုများ ဆွဲဆောင်ရန်အတွက် ကောင်းမွန်သည့် မူဝါဒများရှိရန် လိုအပ်ပါကြောင်း၊ အစိုးရနှင့်ပုဂ္ဂလိက ပူးပေါင်း ဆောင်ရွက်ခြင်းဖြင့် မမျှော်လင့်သော စွန့်စားမှုများကို မျှဝေနိုင်ပြီး လုပ်ကွက်တောင်သူများကို ကုန်ကြမ်းထုတ်သူအဆင့်မှ တန်ဖိုးမြှင့်ထုတ်လုပ်သူ မိတ်ဖက်များအဖြစ်သို့ ပြောင်းလဲနိုင်မှာ ဖြစ်ပါကြောင်း တင်ပြဆွေးနွေးသည်။

အစည်းအဝေးသို့ အွန်လိုင်းစနစ်ဖြင့် ပါဝင်တက်ရောက်လာသည့်  ဘင်းမ်စတက် အဖွဲ့ဝင်နိုင်ငံအသီးသီး၏ ကိုယ်စားလှယ် အသီးသီးမှ “စိုက်ပျိုးရေးဆိုင်ရာ တန်ဖိုးကွင်း ဆက်တစ်လျှောက် အစိုးရ-ပုဂ္ဂလိကပူးပေါင်းဆောင်ရွက်မှု နည်းလမ်းများနှင့် လုပ်ကွက်ငယ် တောင်သူ များအား ပံ့ပိုးကူညီပေးသည့် အလေ့ အကျင့်ကောင်းများ” ခေါင်းစဉ်ဖြင့် မိမိတို့နိုင်ငံ အလိုက် ဆောင်ရွက်နေမှုများ၊ အတွေ့အကြုံများကို  အသီးသီး မျှဝေ တင်ပြကြသည်။ မြန်မာနိုင်ငံ ကုန်သည် များနှင့် စက်မှုလက်မှုလုပ်ငန်းရှင်များအသင်း မှ တောင်သူများဈေးကွက် လက်လှမ်းမီရေး၊ တန်ဖိုးမြှင့် ထုတ်ကုန်များထုတ်လုပ်နိုင်ရေး၊ ဘဏ္ဍာရေးနည်းစနစ်များ၊ ခေတ်မီဒီဂျစ်တယ်နည်းပညာများ၊ အစိုးရ-ပုဂ္ဂလိက ပူးပေါင်းဆောင် ရွက်မှုဆိုင်ရာ အခွင့်အလမ်းများနှင့် စပ်လျဉ်း၍ ပုဂ္ဂလိကကဏ္ဍနှင့် စိုက်ပျိုးစီးပွားရေး လုပ်ငန်းရှင်များ၏ အတွေးအမြင်များနှင့် သက်ဆိုင်သည့် ရှေ့ဆက်လက် ဆောင်ရွက်ရမည့် လုပ်ငန်းများကို သတ်မှတ်ဖော်ထုတ်ခဲ့သည်။ 

အဆိုပါဆွေးနွေးပွဲသို့ အပြည်ပြည်ဆိုင်ရာစားရေရိက္ခာနှင့်မူဝါဒသုတေ သနမှ ကျွမ်းကျင်ပညာရှင်၊  မြန်မာ နိုင်ငံကုန်သည်များနှင့်စက်မှုလက်မှုလုပ်ငန်းရှင်များအသင်းချုပ်၊ နိုင်ငံခြားရေး ဝန်ကြီးဌာန၊ စိုက်ပျိုး ရေး၊မွေးမြူရေးနှင့်ဆည်မြောင်းဝန်ကြီးဌာနအောက်ရှိ စီမံကိန်းဦးစီး ဌာန၊ စိုက်ပျိုးရေးဦးစီးဌာန၊ မွေးမြူ ရေးနှင့်ကုသရေးဦးစီးဌာနနှင့် ငါးလုပ်ငန်းဦးစီးဌာနတို့မှ ကိုယ်စားလှယ် များ၊ ဘင်းမ်စတက်အဖွဲ့ဝင်နိုင်ငံများမှ  ကိုယ်စားလှယ်များနှင့် ဘင်းမ်စတက် အတွင်းရေးမှူးရုံးမှ တာဝန်ရှိသူများ စုစုပေါင်း ကိုယ်စားလှယ် ၄၀ ဦးခန့် ပါဝင် တက်ရောက်ခဲ့ကြကြောင်း သတင်း ရရှိသည်။

MOALI