ရေရှည်တည်တံ့သော မွေးမြူရေးလုပ်ငန်းများ ဖွံ့ဖြိုးလာရေး အားပေးမြှင့်တင်

နေပြည်တော်၊ ဇန်နဝါရီ ၂၅

သဘာဝရေသယံဇာတများ ထိန်းသိမ်းရန်နှင့် ရေရှည်တည်တံ့သော ထုတ်လုပ်မှုဖြစ်စေရန် ရေချိုရေငန် ငါးပုစွန်မွေးမြူရေးလုပ်ငန်းများ ပိုမိုဖွံ့ဖြိုးလာရေးအတွက် စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာနက ကြိုးပမ်းဆောင်ရွက်လျက်ရှိရာ ဇန်နဝါရီ ၂၅ ရက်၊ နံနက်ပိုင်းတွင် ဒုတိယဝန်ကြီး ဒေါက်တာအောင်ကြီးသည် ဧရာဝတီတိုင်းဒေသကြီး၊ ညောင်တုန်းမြို့နယ်၊ သဇင်ရေကျော်ကျေးရွာရှိ အာရှသားအင်တာနေရှင်နယ် ရေချို ငါးပုစွန် ဘက်စုံမွေးမြူရေးလုပ်ငန်း၏ ငါးမြစ်ချင်း၊ ငါးခေါင်းပွ၊ ငါးဒန်၊ ငါးမုတ်၊ ရွှေဝါငါးကြင်းများ မွေးမြူထားရှိမှုကို ကြည့်ရှုစစ်ဆေးပြီး ဒုတိယဝန်ကြီးက ငါး ပုစွန် ရောဂါများကာကွယ်ထိန်းချုပ်နိုင်ရေးအတွက် နိုင်ငံတကာ၊ ဒေသတွင်း အဖွဲ့အစည်းများနှင့် ပူးပေါင်းဆောင်ရွက်ရန်လိုအပ်ချက်များ၊ ပုစွန်ရောဂါ ကျရောက်ပျံ့နှံ့မှုမရှိရေး အတွက် ဇီဝလုံခြုံရေးကို စနစ်တကျလိုက်နာ ကျင့်သုံးရန်နှင့် ပုစွန်မွေးမြူရေးလုပ်ငန်းများ ရေရှည်ဖွံ့ဖြိုးတိုးတက်လာရေး အလေးထားဆောင်ရွက်ရန် လုပ်ငန်းတာဝန်ရှိသူများအား ဆွေးနွေးမှာကြားသည်။

၎င်းနောက် ဒုတိယဝန်ကြီးသည် ရန်ကုန်းတိုင်းဒေသကြီး၊ လှိုင်သာယာမြို့နယ်၊ ပဒေသာပင်မြို့တော်ရှိ (BAHO VET ANIMAL HEALTH CARE) တိရစ္ဆာန်ကျန်းမာရေး စောင့်ရှောက်ရေးသို့ ရောက်ရှိပြီး ကာကွယ်ဆေးထိုးခြင်း၊ ခွေးလှေးကုသခြင်း၊ သွားသန့်ရှင်းရေး၊ အာထရာဆောင်း၊ ဓာတ်မှန်၊ သွေးစစ်ဆေးမှု၊ အရိုးအကြော ခွဲစိတ်ကုသမှု၊ အရေပြားရောင်ရမ်းခြင်းကုသမှု၊ အိမ်မွေးတိရစ္ဆာန် ဟိုတယ်/ဝင်ခွင့် ပိုးသတ်ခြင်းနှင့် ခွဲစိတ်ကုသမှုဝန်ဆောင် ပေးနေမှုများကို ကြည့်ရှုစစ်ဆေးပြီး တိရစ္ဆာန်ဆေးကု ဆရာဝန်များအားတွေ့ဆုံ၍ တိရစ္ဆာန်ဆေးကုဆရာဝန် ကျင့်ဝတ်ကို လေးစားလိုက်နာပြီး နိုင်ငံတော်အပေါ်သစ္စာစောင့်သိကြရန်၊ တိရစ္ဆာန် ကူးစက်ရောဂါ ကာကွယ်ရေးနှင့် ထိန်းချုပ်ရေးလုပ်ငန်းများနှင့် တိရစ္ဆာန်မှ လူသို့ကူးစက်တတ်သည့် ရောဂါများ မဖြစ်ပွားစေရေး ပညာပေးဆောင်ရွက်ကြရန် မှာကြားသည်။ 

ထိုမှတဆင့် ဒုတိယဝန်ကြီးသည် ရန်ကုန်-မန္တလေး အမြန်လမ်း မိုင်တိုင် ၂၆ ရှိ ဘက်စုံစိုက်ပျိုးမွေးမြူရေးဇုန်သို့ ရောက်ရှိပြီး ဇုန်အတွင်း နို့စားနွား (ဖရီရှန်) ၁၇၉ ကောင် နှင့် အသားစားနွား (ဘရာမင်၊ ဖရီရှန်၊ ပြာစိမ်းနှင့် ရွှေနီ) ၂၄၉ ကောင်မွေးမြူထားရှိမှု၊ ရော်ဘာပင် ၆၇၀၄ ဒသမ ၆၁ ဧက နှင့် မန်ဂျန်ရှားပင်စိုက်ပျိုးထားရှိမှု ၊ တိရစ္ဆာန်အစာပင်များ စိုက်ပျိုးထားရှိမှုများကိုကြည့်ရှုစစ်ဆေးပြီး တာဝန်ရှိသူများအား ဇီဝလုံခြုံရေး အလေးထား ဆောင်ရွက်ရန်၊ ကာကွယ်ဆေးများ စနစ်တကျ ထိုးနှံကြရန် မှာကြားသည်။ ထို့နောက် တိရစ္ဆာန်အစာ နှင့် မွေးမြူရေးအထောက်အကူပြု ဆေးဝါးပစ္စည်းများ ထောက်ပံ့ပေးအပ်ခဲ့ကြောင်း သတင်းရရှိသည်။

MOALI