စိုက်ပျိုးမွေးမြူရေးပညာနှင့် နိုင်ငံတကာ စိုက်ပျိုးမွေးမြူရေး တက္ကသိုလ်များ (အပိုင်း-၄၀)

မြန်မာနိုင်ငံ စိုက်ပျိုးမွေးမြူရေးတက္ကသိုလ်ဘွဲ့ရ ကျောင်းသား/သူများ အပါအဝင် ယနေ့ခေတ်အလုပ်အကိုင် ရရှိမှု/ဆက်စပ်မှုအခန်းကဏ္ဍ

The Role of University Graduates and Current Employment Opportunities in Myanmar

(ယခင်အပတ်မှအဆက်)

ထပ်မံပြီး စာရေးသူကြုံတွေ့ခဲ့ရသော စိုက်ပျိုး၊ မွေးမြူရေးဆိုင်ရာ နိုင်ငံတကာ တက္ကသိုလ်၊ ကောလိပ်၊ အသက်မွေး ပညာ သင်ကျောင်းများနှင့် ထိုနိုင်ငံများအတွင်းရှိ စက်မှု၊ စိုက်ပျိုး၊ မွေးမြူ၊ စီးပွားရေး အသက်မွေး ဝမ်းကျောင်းလုပ်ငန်းများ ဆက်စပ်ဆောင်ရွက်မှု (University-Industry Relationships in Agriculture) အခန်းကဏ္ဍကို ဆက်လက်ဆွေးနွေးပါမည်။

၁။ တက္ကသိုလ်/ကောလိပ်/သိပ္ပံ– စက်မှု၊ စိုက်ပျိုးရေး၊ စီးပွားရေး အသက်မွေး ဝမ်းကျောင်း လုပ်ငန်းများ ဆက်ဆံရေး၏ အရေးပါမှု

(၁-က) အတတ်ပညာနှင့် လုပ်ငန်းလိုအပ်ချက်အကြား ချိတ်ဆက်ပေးခြင်း (Linkage between Supply and Demand)

တက္ကသိုလ်၊ ကောလိပ်၊ သိပ္ပံများက သီအိုရီနှင့် ဗဟုသုတများစွာ ပေးသော်လည်း၊ စက်မှု၊ စိုက်ပျိုး၊ စီးပွားရေး လုပ်ငန်းများက လက်တွေ့အသုံးချနိုင်သော (Practically skills) ကိုလိုအပ်နေတတ် ပါသည်။ လုပ်ငန်း နှစ်ခုအတူပူးပေါင်းလျှင် သင်ရိုးညွှန်းတမ်း များကို တစ်နိုင်ငံချင်း၏ စီးပွားရေး ဖွံ့ဖြိုးတိုးတက်မှု လုပ်ငန်းလိုအပ်ချက်နှင့် ကိုက်ညီအောင် ပြင်ဆင်ပေးနိုင်ပါသည်။

(၁-ခ) သုတေသန နှင့်တီထွင်ဖန်တီးမှု တိုးတက်အောင်မြင်ခြင်း (Improvement in Research and Innovation)

တက္ကသိုလ်များတွင် ပညာတတ်နှင့် သုတေသနစွမ်းရည် များစွာ ရှိသော်လည်း ငွေကြေး၊ရန်ပုံငွေ အကူအညီနည်းနေတတ်ပါသည်။ နိုင်ငံတကာတွင် သုတေသန အစိုးရ ရန်ပုံငွေ အပြင်၊ ပုဂ္ဂလိကကဏ္ဍမှလည်း များပြားစွာ ကူညီမှုရနေပါသည်။ စီးပွား၊ စက်မှု လုပ်ငန်းများမှ ငွေကြေး၊ လုပ်ငန်းကိရိယာ (Research Equipment)နှင့် သတင်းအချက် အလက်များ (Required Data) ပေးခြင်းဖြင့် နှစ်ဦးအတူ ဖန်တီးတီထွင်ဆန်းသစ်မှုများပြုလုပ်ကာ နိုင်ငံဖွံ့ဖြိုး တိုးတက်နိုင်ပါသည်။

(၁-ဂ) နည်းပညာနှင့် ဗဟုသုတ ပြောင်းလဲမှု (Technology & Knowledge Transfer)

တက္ကသိုလ်တွင် ဖန်တီးခဲ့သည့် သုတေသနရလဒ်များကို စီးပွား ရေး၊ အသေးစား၊ အလတ်စား၊ အကြီးစားစက်မှုလုပ်ငန်းများက ထုတ်ကုန်သို့ ပြောင်းလဲနိုင်သည်။ ဤနည်းဖြင့် တက္ကသိုလ်ရှိ သုတေသနများသည် လူ့ဘောင်အကျိုးရှိအောင် အသုံးချနိုင်ပါသည်။

(၁-ဃ) ကျောင်းသားများအတွက် လုပ်ငန်းအတွေ့အကြုံရရှိခြင်း (Experiential Learning)

နောက်ဆုံးနှစ် လုပ်ငန်းခွင်အကြို လက်တွေ့လုပ်ငန်းများ (Internship၊ Apprenticeship) စသည်ဖြင့် ကျောင်းသားများကို လုပ်ငန်းခွင်တွင် တက်ကြွစွာ လေ့ကျင့်ခွင့်ပေးခြင်းဖြင့် လက်တွေ့အတွေ့အကြုံရရှိစေပါသည်။ ဤအတွေ့အကြုံသည် ဘွဲ့ရပြီးနောက် အလုပ်အကိုင်ရှာဖွေရာတွင် အထောက်အကူဖြစ်သည်။

(၁-င) နှစ်ဖက်စလုံးအတွက် တိုးတက်မှုနှင့် အားသာချက် (Improvement and Advantages of Both Organizations)

တက္ကသိုလ်များအတွက် သင်ရိုးသစ်၊လုပ်ငန်းအခြေခံသင်ကြားမှုများ တိုးတက်လာသည်။ စက်မှု၊ စီးပွားလုပ်ငန်းများအတွက် လေ့ကျင့်ထားသော အင်ဂျင်နီယာ၊ စီးပွားရေး၊ စိုက်ပျိုး မွေးမြူရေးပညာများနှင့် အသုံးချနိုင်သော လူ့စွမ်းအားရရှိလာသည်။

ဤစနစ်ကို စင်ကာပူနိုင်ငံတက္ကသိုလ်များတွင် နှစ်စဉ်လက်တွေ့ကျင့်သုံးလျက်ရှိနေပြီး မိမိ နိုင်ငံဖွံ့ဖြိုးတိုးတက်ရေးအတွက် ချက်ချင်းလိုအပ်နေသော ဘာသာရပ် အသစ်များကို နှစ်စဉ် တက္ကသိုလ်များ၏ သင်ရိုးညွန်းတန်း၊ သင်ရိုးမာတိကာများနှင့် ဆက်စပ်မှုရှိအောင် ပြောင်းလဲ၊ ပြင်ဆင်သင်ကြား၊ သုတေသနပြုနေပါသည်။ တက္ကသိုလ်များ၏ ဘာသာရပ်၊ သင်ရိုးညွန်းတမ်းများကို အစိုးရမှ ဗဟိုချုပ်ကိုင်မှု (Centralization)၊ တိုက်ရိုက်လွှမ်းမိုးမှုမရှိဘဲ တက္ကသိုလ်ကောင်စီ (University Council)၊ တက္ကသိုလ်ပညာရေး၊ စီမံခန့်ခွဲရေးအဖွဲ့ (Academic Board/Board of Study/Senate/Board of Trustees) တို့က အတည် ပြုပြီး လွတ်လပ်စွာ စီမံခန့်ခွဲနိုင်မှု (Autonomous Authority) ရှိနေသည်ကလည်း တစ်ပန်းသာနေပါသည်။

၂။ အထက်ပါ နှစ်ဖွဲ့တို့ဆက်ဆံရေးသည် နိုင်ငံအဆင့် စီးပွားရေးတိုးတက်မှုအတွက် လိုအပ်နေသည့်အကြောင်းများ

(၂-က) လူ့စွမ်းအား ဖွံ့ဖြိုးခြင်း (HRD - Human Resources/Capital Development)

နိုင်ငံတစ်နိုင်ငံ၏ စီးပွားရေးသည် အလုပ်အကိုင် လုပ်အားလိုအပ် ချက်အရ ရှိနေသော လူ့စွမ်းအား အရင်းအမြစ်အပေါ် မူတည်သည်။ တက္ကသိုလ်ပညာနှင့် စက်မှု၊ စီးပွား လိုအပ်ချက်များကို ကိုက်ညီအောင် လေ့ကျင့်၊ သင်ကြားပေးနိုင်လျှင် နိုင်ငံ၏ ကုန်ထုတ်လုပ်မှုစွမ်းအား တိုးတက်လာသည်။

(၂-ခ) ဖန်တီးမှုအခြေပြု စီးပွားရေးတိုးတက်မှု (Innovation-Driven Economy)

တက္ကသိုလ်နှင့် စက်မှုလုပ်ငန်းပူးပေါင်းမှုက ခေတ်မီနည်းပညာများ၊ စွမ်းအင်၊ ထုတ်ကုန် အသစ်များ ဖန်တီးနိုင်စေသည်။ ဤအရာက နိုင်ငံအချင်းချင်း၏ ပြိုင်ဆိုင်နိုင်မှု တိုးတက်စေနိုင်ပါသည်။

(၂-ဂ) စီးပွားရေးလုပ်ငန်းအသစ်များ ဖန်တီးခြင်း (Entrepreneurship & Job Creation)

တက္ကသိုလ် စက်မှု၊ စီးပွားလုပ်ငန်း ပူးပေါင်းမှုများမှ ကနဦးပျိုးထောင်မှု (Startup)၊ စတင် တီထွင်ဖန်တီးသောနေရာ (Innovation Hub) စသည်တို့ ဖြစ်လာနိုင်ပြီး၊ နိုင်ငံအတွက် အလုပ်အကိုင် အသစ်များ ဖန်တီးနိုင်သည်။

(၂-ဃ) နိုင်ငံခြားရင်းနှီးမြှုပ်နှံမှုများ ဆွဲဆောင်နိုင်မှု တိုးတက်ခြင်း  (FDI - Foreign Direct investment Attraction)

ပညာတတ်၊ပညာရှင်၊ကျွမ်းကျင်သူ အလုပ်သမားများနှင့် သုတေ သနစွမ်းရည်ရှိသော နိုင်ငံများတွင် နိုင်ငံခြားကုမ္ပဏီများက ရင်းနှီးမြှုပ်နှံလိုကြသည်။ ထို့ကြောင့် ပညာရေးနှင့် စက်မှုခိုင်မာမှုသည် စီးပွားရေးစနစ်တစ်ခုလုံးကို မြှင့်တင်ပေးနိုင်ပါသည်။

(၂-င) တည်တံ့သော ဖွံ့ဖြိုးတိုးတက်မှု (Sustainable Development)

နှစ်ဦးနှစ်ဖက်အတူပူးပေါင်း၍ သဘာဝပတ်ဝန်းကျင်ထိန်းသိမ်းရေး၊ စိုက်ပျိုးမွေးမြူ ရေး၊ စွမ်းအင်သုံးစွဲမှုစသည့် အမျိုးအစားဆိုင်ရာ ပြဿနာများစွာကို ဖြေရှင်းပေးနိုင် ပါသည်။

ဂျာမနီနိုင်ငံရှိ တက္ကသိုလ်အမျိုးအစားနှစ်မျိုး၏ ကွာခြားချက်များ (Universität vs Fachhochschule – FH / HAW)

ဂျာမနီနိုင်ငံတွင်တက္ကသိုလ်များကို အဓိကအားဖြင့် အဆင့်မြင့် ပညာသင်တက္ကသိုလ် (Academic Universities - Universitäten) နှင့် အသုံးချသိပ္ပံပညာသင်တက္ကသိုလ် (Universities of Applied Sciences - Fachhochschule – FH / HAW) ဟူ၍ ခွဲခြား ထားပါသည်။ နိုင်ငံခြားကျောင်းသားများ၊ သုတေသနလုပ်ကိုင်လိုသူများနှင့် အလုပ် အကိုင် ရည်ရွယ်သူများအတွက် အရေးကြီးသော ကွာခြားချက်ဖြစ်ပါသည်။

စာရေးသူ၏အတွေးတစ်စ

ဤစနစ်များက မိမိနိုင်ငံအတွင်း လုပ်ငန်းလိုအပ်ချက် (Job Demand) နဲ့ စိုက်ပျိုး မွေးမြူရေး တက္ကသိုလ်များ အပါအဝင် တက္ကသိုလ်များအားလုံးက မွေးထုတ်ပေးတဲ့ ကျောင်းသား/သူ အရေအတွက်/ဘာသာရပ် မကိုက်ညီမှု (Mismatch) ကို ရှာဖွေ၊ ဖော်ထုတ်နိုင်ပါသည်။ ကျောင်းသား/သူများကိုလည်း ဒါရေး၊ ဒါဖတ်၊ အလွတ်ကျက်၊ ဒါဖြေ (Rote Learning and Memorizing) ကိုလျှော့ချပြီး အတွေးအခေါ်ကို ဦးစား ပေးသော သင်ကြား၊ သင်ယူခြင်းစနစ် (Critical Thinking Methods) များ တိုးတက် လာနိုင်ခြင်း၊ ဥပမာ - သတင်းအချက်အလက်နည်းပညာခေတ် (ICT Era - Digital Education _Education 4.0) တွင် စာသင်သည်မှအစ လက်တွေ့လုပ်ခိုင်း (Assignments)၊ တတ် မြောက်မှု စစ်ဆေးခြင်း  (Assessments and Exams) တို့အား သင်ယူမှုစီမံခန့်ခွဲမှု စနစ် (LMS – Learning Management System) ဖြင့်လည်းကောင်း၊ အင်တာ နက် နည်းပညာခေတ် (Internet of Things - IoT)၊ စမတ်ဖုန်းနည်းပညာခေတ် (Smart Phone Technology) စနစ်တွင် ဂူဂဲ စာသင်ခန်း (Google Classrooms) နှင့် အခြား ဆော့လ်ဝဲ/ပရိုဂရမ်များ (Other Sofwares/Programs – Canvas, Moodles, Nearpods, Blackboard Learn, Quizlet, Mentimeter, etc.) အသုံးပြုခြင်းကိုလည်းကောင်း၊ သမားရိုးကျ မျက်နှာချင်းဆိုင်သင်ကြား၊ သင်ယူခြင်း (Face-to-Face Learning) ထက် အွန်လိုင်းသင်ယူခြင်း (Online learning) ပါတွဲဖက်ကာ ၂-မျိုးစလုံး (Blended Learning) အသုံးပြုချိန် ကျရောက်နေပါပြီလို့ ဆွေးနွေး လိုပါသည်။

မြန်မာနိုင်ငံတက္ကသိုလ်များရှိ တစ်ချို့ဘာသာရပ်များ၏ ဘွဲ့ရများ နှစ်စဉ်လိုအပ်သည်ထက် ပိုမိုထုပ်လုပ်ပေးနေခြင်း (Over Productions of some Graduates) ကို လျှော့ချပေးခြင်း ဖြင့် မိဘများ၊ နိုင်ငံတော်၊ တက္ကသိုလ်များ၏ ဘတ်ဂျက်၊ ငွေကြေးများကို အကျိုးရှိစွာ (Efficient Utilization of Budgets and Money)  အသုံးပြုနိုင်ပါလိမ့်မည်။

ဩစတြေးလျ၊ ဂျာမနီ၊ နယ်သာလန် စသည့်နိုင်ငံများတွင် ကျောင်းတက်နေစဉ် ကတည်းက အလုပ်အကိုင်နှင့်ထိတွေ့စေသော အသက်မွေး ဝမ်းကျောင်း စနစ် (Worked-based Vocational Learning Systems) က သမားရိုးကျ ပညာရပ်သင်တက္ကသိုလ်များနှင့် အပြိုင် အလွန်အောင်မြင်နေပြီး သူတို့အတွက် သီးသန့် အသုံးချတက္ကသိုလ်စနစ် (University of Applied Sciences) က ရှိပြီး ဖြစ်နေပါသည်။

ပညာရပ်ကို လေ့လာသော တက္ကသိုလ်များ (Academic Universities) နှင့် သုတေသန ဦးစားပေး တက္ကသိုလ်များ (Research-based Universities) ကတော့ သီးခြားလမ်း ကြောင်းဖြင့် သွားနေပါသည်။ စိုက်ပျိုး၊ မွေးမြူရေးအဓိကဖြစ်သော စာရေးသူတို့နိုင်ငံတွင် သုတေသန အခြေပြု တက္ကသိုလ်များတွင်သာမက လုပ်ငန်းခွင် အတွက် တိုက်ရိုက် အသုံး ဝင်နိုင်သော စိုက်ပျိုးမွေးမြူရေး ဆိုင်ရာ လက်တွေ့အသုံးချ တက္ကသိုလ်၊ ကောလိပ်များ လည်း လိုအပ်နေပါပြီ ဟူ၍ မှတ်တမ်းတင် ရေးသားလိုက်ပါသည်။ 

ဒေါက်တာမျိုးကြွယ်

(ဆက်လက်ဖော်ပြပါမည်)