ဗီယက်နမ်၏ ဟင်းသီးဟင်းရွက်နှင့် သစ်သီးဝလံတင်ပို့မှုမှ ဝင်ငွေ အမေရိကန်ဒေါ်လာ ၁၀ ဘီလီယံခန့် ရရှိ

ဗီယက်နမ် သစ်သီးဝလံနှင့် ဟင်းသီးဟင်းရွက်တင်ပို့မှုသည် ၂၀၂၅ ခုနှစ်တွင် ဆက်လက် တိုးတက်ခဲ့ရာ  VINAFRUIT (ဗီယက်နမ်သစ်သီးဝလံအသင်းချုပ်) ၏ ခန့်မှန်းချက်အရ စုစုပေါင်း တင်ပို့ငွေမှာ အမေရိကန်ဒေါ်လာ ၈ ဘီလီယံမှ ၈ ဒသမ ၄ ဘီလီယံ အထိ ရှိမည်ဟုဆိုသည်။ ဤပမာဏသည် ၂၀၂၄ ခုနှစ်နှင့်နှိုင်းယှဉ်ပါက ခန့်မှန်းခြေ ၁၈ ရာခိုင်နှုန်းခန့် တိုးတက်မှုကိုကိုယ်စားပြုပါသည်။ လက်ရှိ အခြေအနေများအတိုင်းဆက်လက်ရှိနေပြီး အခြေခံ ပြဿနာများကိုဖြေရှင်းနိုင်ပါက ဤလုပ်ငန်းကဏ္ဍ၏ တင်ပို့မှုတန်ဖိုးသည် ၂၀၂၆ ခုနှစ် အစောပိုင်းကပင် အမေရိကန်ဒေါ်လာ ၁၀ ဘီလီယံအထိ ရောက်ရှိနိုင်သည်ဟုဆိုသည်။

တင်ပို့မှု တိုးတက်လာခြင်းသည် တရုတ်၊ အမေရိကန်၊ တောင်ကိုရီးယားသမ္မတနိုင်ငံ၊ ဂျပန်နှင့် EU အပါအဝင် အဓိကဈေးကွက်များတွင် ဝယ်လိုအား ပြန်လည်ကောင်းမွန်လာခြင်း နှင့် ဗီယက်နမ် သစ်သီးမျိုးစုံကို တရားဝင်ဈေးကွက်ဝင်ရောက်ခွင့် ပိုမိုရရှိလာခြင်းတို့ကြောင့် ဖြစ်ပါသည်။ VINAFRUIT ၏ ဥက္ကဋ္ဌ မစ္စတာ Nguyen Thanh Binh က ယခုကဲ့သို့ တိုးတက်လာမှုသည် ရေတိုရာသီအလိုက်ထိပ်တန်းရောက်မှုထက် အရည်အသွေး၊ မူလဇစ်မြစ် လိုက်နိုင်မှု၊ ဈေး ကွက်စံချိန် စံညွှန်းများနှင့် ကိုက်ညီမှုစသည့် အချက်များတိုးတက်လာခြင်းနှင့် ပိုမိုဆက်စပ်လာကြောင်းပြောကြားသည်။

တရုတ်နိုင်ငံသည် ဗီယက်နမ်၏ အကြီးဆုံး ပို့ကုန်ဈေးကွက် အဖြစ် ဆက်လက် တည်ရှိ နေသော်လည်း ထိလွယ်ရှလွယ် ဈေးကွက်လည်းဖြစ်သည်။ ထုတ်လုပ်မှုစနစ် အား နည်းခြင်း၊ လယ်ယာစိုက်ပျိုးမှုလုပ်ငန်းများ ကွဲပြားနေပြီး မစည်းလုံးခြင်း၊ ကုန်ကြမ်းဇုန်များ၊ ထုတ်လုပ်မှု နှင့် ဖြန့်ဖြူးရေးကြားချိတ်ဆက်မှု အကန့်အသတ်ရှိခြင်းတို့ကြောင့် ဈေးကွက် အခြေအနေ သို့မဟုတ် တင်သွင်းမှု စည်းမျဉ်းများ ပြောင်းလဲသောအခါ ဤစိုက်ပျိုးထုတ်လုပ်ရေးကဏ္ဍသည် အန္တရာယ်များနှင့် ရင်ဆိုင်နေရဆဲဖြစ်သည်။

မဲခေါင် မြစ်ဝကျွန်းပေါ်ဒေသရှိ Vinh Long ခရိုင်တွင် ဗဟိုပြုထုတ်လုပ်လျက်ရှိသော အုန်းသီး ကဏ္ဍသည် တင်ပို့မှုအတွက် ပိုမိုအားကောင်းသည့် ပံ့ပိုးမှုအဖြစ် ရပ်တည်လာနေပါ သည်။ ၂၀၂၅ ခုနှစ် အတွက် ထိုခရိုင်မှ အုန်းသီးတင်ပို့မှုတန်ဖိုးသည် အမေရိကန်ဒေါ်လာ သန်း ၅၀၀ ကျော် မည်ဟု ခန့်မှန်း ထားသည်။ Vinh Long ခရိုင်တွင် ဟက်တာ ၁၂၀,၀၀၀ ခန့် အုန်းပင် စိုက်ပျိုးထားပြီး၊ ယင်းသည် ဗီယက် နမ်တစ်နိုင်ငံလုံး၏ စုစုပေါင်း စိုက်ဧရိယာ၏ ၆၅ ရာခိုင်နှုန်းခန့်ရှိသည်။ ဗီယက်နမ် သည် ကမ္ဘာ့အုန်းသီးစိုက်ဧရိယာ၏ ၂ ရာခိုင်နှုန်းခန့်သာ ကိုယ်စား ပြုသော်လည်း၊ နက်ရှိုင်းသော ပြုပြင်ထုတ်လုပ်မှုကြောင့် တန်ဖိုးမြင့် ထွက်ကုန်များသည် ကမ္ဘာ့ပျမ်းမျှထက် သိသိသာသာ ပိုမို မြင့်မားနေပါသည်။ ၂၀၂၄ ခုနှစ်တွင် နိုင်ငံတစ်ဝန်း အုန်းသီးတင်ပို့မှုဝင်ငွေမှာ အမေရိကန်ဒေါ်လာ ၁ ဒသမ ၀၅ ဘီလီယံရှိခဲ့ပြီး ပြုပြင် ထုတ်လုပ် နိုင်စွမ်းချဲ့ထွင်နိုင်ပါက အမေရိကန်ဒေါ်လာ ၁ ဒသမ ၈ ဘီလီယံ အထိရောက်ရှိနိုင်သည်ဟု စက်မှု လုပ်ငန်း ခန့်မှန်းချက်များက ဖော်ပြထားပါသည်။

ဟင်းသီးဟင်းရွက် စုစုပေါင်းတင်ပို့ရငွေမှာ အမေရိကန်ဒေါ်လာ သန်း ၃၈၀ ဒသမ ၉ ခန့်သို့ တိုးတက်ခဲ့ပြီး ယခင်နှစ်ထက် ၁၃ ဒသမ ၉ ရာခိုင်နှုန်း မြင့်တက်ခဲ့သည်။ ငရုတ်သီးသည် ထုတ်လုပ်မှုပမာဏနှင့် တန်ဖိုးနှစ်ရပ်စလုံးတွင် ဦးဆောင်နေပြီး အဓိကဈေးကွက်များမှာ တရုတ်၊ လာအိုနှင့် တောင်ကိုရီးယားသမ္မတနိုင်ငံတို့ဖြစ်သည်။ "ငရုတ်သီးသည် ဟင်းသီးဟင်းရွက်အုပ်စုတွင် အလွန်ရေပန်းစားသော ဟင်းခတ် အမွှေး အကြိုင် ဖြစ်ပြီး ကုန်သွယ်မှု တန်ဖိုးလည်း မြင့်မားပါသည်" ဟု ဗီယက်နမ် သစ်သီးနှင့် ဟင်းသီးဟင်းရွက် အသင်းချုပ်၏ အထွေထွေ အတွင်းရေးမှူး Dang Phuc Nguyen က ပြောကြားသည်။ ငရုတ်သီးဈေးနှုန်းမှာ တစ်ကီလိုဂရမ်လျှင် အမေရိကန်ဒေါ်လာ ၁ ဒသမ ၈ မှ ၂ ဒသမ ၆ အထိရှိခဲ့ရာမှ ၂၀၂၅ ခုနှစ်ကုန်ပိုင်းတွင် ပို့ကုန်ဝယ်လိုအားတိုးလာမှုကြောင့် တစ်ကီလိုဂရမ် လျှင် အမေရိကန်ဒေါ်လာ ၄ ဒသမ ၈ မှ ၆ အထိ တက်ခဲ့သည်။ အခြား ဟင်းသီးဟင်းရွက် များမှာမူ ဂျင်းနှင့် ခရမ်းချဉ်သီးတို့တွင် တိုးတက်မှုရှိခဲ့သော်လည်း၊ ပန်းဂေါ်ဖီစိမ်း တင်ပို့မှုမှာမူ ကျဆင်းခဲ့ကြောင်း မှတ်တမ်းများအရ သိရှိရသည်။

ဥမ္မာထွန်း

https://www.freshplaza.com/asia/article/9798067/vietnam-fruit-and-vegetable-exports-near-us-10-billion/