ဗီယက်နမ်ရေထွက်ကုန်တင်ပို့သူများ ကန့်သတ်ချက်အသစ်များနှင့် ရင်ဆိုင်ရမည်

ယူကေနှင့် ဥရောပသမဂ္ဂ (EU) စျေးကွက်များသို့ တင်ပို့နေသည့် ဗီယက်နမ်ရေထွက်ကုန်လုပ်ငန်းရှင်များသည် ၂၀၂၆ ခုနှစ်မှစတင်ကာ တိရစ္ဆာန်ဖူလုံရေး (Animal Welfare) ဆိုင်ရာ သတ်မှတ်ချက်အသစ်များကို လိုက်နာရန်အတွက် ပုစွန်ဖမ်းဆီးခြင်းနှင့် ပြုပြင်ထုတ်လုပ် ခြင်းဆိုင်ရာ နည်းပညာများကိုမြှင့်တင်ရန် လိုအပ်လာပြီဖြစ်သည်။ ၎င်းသည် ရေထွက်ကုန်ကဏ္ဍအတွက် စည်းမျဉ်းစည်းကမ်း လိုက်နာဆောင်ရွက်မှုဆိုင်ရာ ဖိအားများကို ပိုမိုဖြစ်ပေါ်စေလျက်ရှိသည်။ 

ဥရောပရှိ အဓိက လက်လီအရောင်းဆိုင်ကြီးများသည် ပုစွန်များကို ရေခဲရေထဲသို့ မထည့်မီ လျှပ်စစ်ဖြင့်ထုံစေခြင်း (Electrically Stunned) နည်းလမ်းကို အသုံးပြုရန် စံသတ်မှတ်ချက်များ ချမှတ်လိုက်ပြီဖြစ်သည်။ ထို့ကြောင့် ဗီယက် နမ်တွင် ကျယ်ကျယ်ပြန့်ပြန့် အသုံးပြု နေသည့် အစဉ်အလာ ရေခဲရေဖြင့် အေးခဲစေသည့် နည်းလမ်းကို အသုံးမပြုရန် တားမြစ်သွားမည်ဖြစ်သည်။ ယူကေအခြေစိုက် Tesco လက်လီလုပ်ငန်းသည် ၂၀၂၆ ခုနှစ်တွင် ၎င်းတို့၏ ပုစွန်ဖြန့်ဖြူးရေး ကွင်းဆက်တစ်ခုလုံး၌ အဆိုပါစံနှုန်းကို အပြည့် အဝလိုက်နာရန် ကတိကဝတ်ပြုထားပြီး၊ Marks & Spencer ကလည်း လိုက်နာမှုမရှိသော ပေးသွင်းသူများကို ကုန်ပစ္စည်းစာရင်းမှ ပယ်ဖျက်သွားမည်ဖြစ်ကြောင်း သတိ ပေးထားသည်။

အခြားသော ယူကေလက်လီလုပ်ငန်းများဖြစ်သည့် Sainsbury’s နှင့် Waitrose တို့သည်လည်း ပုစွန်ဖူလုံရေးစီမံကိန်း (Shrimp Welfare Project) မှ တိုက်တွန်းထားသည့် လုပ်ငန်းစဉ်များအတိုင်း လိုက်နာဆောင်ရွက်သွားမည်ဖြစ်သည်။

ဗီယက်နမ်ပို့ကုန်လုပ်ငန်းရှင်များသည် လက်ရှိတွင် တရားမဝင်ငါးဖမ်းဆီးမှု ထိန်းချုပ်ရေး (IUU)၊ ရေရှည်တည်တံ့ခိုင်မြဲမှု ရည်မှန်း ချက်များနှင့် အမြတ်အစွန်းနည်းပါးမှု စသည့်အခက်အခဲများကို ရင်ဆိုင်နေရစဉ် ယခုကဲ့သို့ သတ်မှတ်ချက်အသစ်များ ထပ်မံပေါ်ပေါက်လာခြင်းဖြစ်သည်။

TTP

www.asian-agribiz.com