ရွှေဝါငါးကြင်း မျိုးရွေးချယ်နည်းနှင့် ဥအုနှုန်း၊ သားပေါက်နှုန်း

ရွှေဝါငါးကြင်းသည် အရသာကောင်းမွန်သော ငါးအမျိုးအစားတွင် ပါဝင်သည်။ သားဖောက်ရန်လည်း လွယ်ကူပြီး ငါးမွေးမြူရေးကန်များတွင် တစ်နှစ်ပတ်လုံးသားပေါက်နိုင်သည့် ငါးမျိုးဖြစ်ကြောင်း သိရသည်။

အများအားဖြင့် ငါးပဲဖြစ်ဖြစ်၊အခြားသော တိရစ္ဆာန်များပဲဖြစ်ဖြစ် သားဖောက်တော့မည်ဆိုလျှင် သားဖောက်မည့်ငါး၊ သို့မဟုတ် တိရစ္ဆာန်အထီးနှင့် အမကို ကြီးမားဖွံ့ထွားသောအကောင်၊ ကျန်းမာသန်စွမ်းသောအကောင်မျိုးကို ရွေးချယ်လေ့ရှိကြသည်။ ယခုသားဖောက်မည့် ရွှေဝါငါးကြင်းကို မျိုးရွေးချယ်ရာတွင် ငါးအမ၏ ကိုယ်အနေအထား၊ ငါးအမ၏ သက်တမ်းနှင့် သန္ဓေတည်နိုင်မှုအပြင် ငါးအမ၏ ကိုယ်ထည် မြင့်ရန်လည်း လိုအပ်သည်။

ငါးမျိုးရွေးချယ်နည်းများ

ရွှေဝါငါးကြင်းကို မျိုးရွေးချယ်ရာတွင် အထက်ပါဖော်ပြချက်များမှာ အကြမ်းအားဖြင့် ဖော်ပြခြင်းဖြစ်ပါသည်။အသေးစိတ် ကြည့်ရှု့ရွေးချယ်မည်ဆိုပါက နည်း ၃ နည်း ဖြင့် ရွေးချယ်နိုင်သည်။

မျိုးရွေးချယ်နည်း(၁)

ရွှေဝါငါးကြင်းငါးအမ၏ ဝမ်းဗိုက်အရွယ်ကို ကြည့်ရသည်။ငါးအမ၏ ဝမ်းဗိုက်သည် နူးညံ့ပြီး ကြီးမားနေလျှင် ဥများများ အုနိုင်သည်။ မျိုးရွေးချယ်မည့် ငါးအမများ၏ သက် တမ်းသည် ၃နှစ် မှ ၆နှစ် သက်တမ်းဖြစ်ရမည်။ အလေးချိန်အားဖြင့် ၁ ပိဿာ ၃၀ ကျပ်သားခန့် ရှိရမည်။မျိုးစပ်မည့်ငါးထီးများ၏ သက်တမ်း မှာ ၂ နှစ်သားမှ ၅ နှစ်သားအရွယ်ကို ရွေးချယ်ရမည်။ ငါးအမများကို ၂လတစ်ကြိမ်သားဖောက်နိုင်သည်။

မျိုးရွေးချယ်နည်း(၂)

ရွေးချယ်မည့်ငါးအမသည် ကိုယ် ထည်ကြီးရမည်။ ခေါင်းသေး၍ နှာခေါင်းချွန်ရမည်။ငါးအမ၏ အကြေးခွံသည် ညီညာ၍ သေသေ သပ်သပ်ရှိဖို့လိုသည်။ဝမ်းဗိုက်နူးညံ့ ၍ ကျယ်ပြန့်ရမည်။ အမြီးညှာ ပျော့ ပျောင်းပြန့်ကားနေရမည်။ စအိုဝနှင့် အမြီးညှာ နီးကပ်နေရမည်။ကိုယ်အလေးချိန်မှာ ငါးအထီးရော၊ အမရော မျိုးရွေးနည်း(၁)အတိုင်း ဖြစ် သည်။.

မျိုးရွေးချယ်နည်း(၃)

မျိုးရွေးချယ်နည်း (၃) မှာ မြန်မာနိုင်ငံနှင့် ကိုက်ညီမှုရှိသည်ဟု သိရသည်။ မြန်မာနိုင်ငံ၌ ရွှေဝါငါးကြင်းငါးမျိုးကို ရွေးချယ်ရာတွင် ဤနည်းအတိုင်းရွေးချယ်ကြဟန်တူသည်။ထိုအချက်များမှာ-

၁။ မျိုးငါး၏အသက်မှာ ၂နှစ်သားဖြစ်ရမည်။
၂။ ငါးအမ၏ အလေးချိန်သည် ၁ ပိဿာ ၃၀ ဖြစ်ရမည်။
၃။ ငါးအထီး၏အလေးချိန် ၇၅ ကျပ်သားရှိရမည်။
၄။ ငါးအမ၏ ဝမ်းဗိုက်သည် နူးညံ့၍ ကျယ်ပြန့်ကာ ပြားနေရမည်။
၅။ ငါး၏အကြေးခွံသည် ညီညာပြီး သပ်ရပ်နေရမည်။
၆။ ဆူးတောင်များ၊ရေယက်၊အမြီး၊ အင်္ဂါတို့၌ ချွင်းချက်မရှိရပါ။
၇။ ငါး၏ခန္ဓာကိုယ်တွင် မည်သည့်အနာတရမှ မရှိရပါ။
၈။ စအိုအနေအထား ကောင်းမွန်နေရမည်။

ဖော်ပြပါနည်း ၃နည်းသည် ရွှေဝါငါးကြင်းငါးမျိုးရွေးချယ်နည်းများ ဖြစ်သည်။ မြန်မာနိုင်ငံတွင် အဆိုပါနည်းများအနက် မျိုးရွေးချယ်နည်း (၃) ကို အသုံးပြုလာကြသည်ဟုလည်း သိရသည်။

ဥ အုနှုန်းနှင့် သားပေါက်နှုန်း

အထက်ပါနည်းအတိုင်း မျိုးငါးရွေးချယ်ပြီးပါက မိတ်လိုက်နိုင်စေရန် သားပေါက်ကန်အတွင်းသို့ အထီးအမကို ထည့်ပေးရသည်။ ငါးများမိတ်လိုက်ချိန်တွင် ရေမနောက်စေရန်နှင့် ဥများကို ရွှံ့မကပ်အောင် ပြုပြင်ပေးရသည်။ရေအပူချိန်ကို ၂၀ ဒီဂရီစင်တီဂရိတ် မှ ၂၉ ဒီဂရီစင်တီဂရိတ်အထိ ထိန်းထားပေးရပါမည်။ ငါးကန်အတွင်း ဥများစုယူမည့် ဥစုကိရိယာ၊ သို့မဟုတ် ဗေဒါပင်များ ထည့်ပေးထားရမည်။ ဗေဒါပင်များ မျောမနေစေရန် ဝါးလုံးများဖြင့် ဘောင်ခတ်ပြီး ထိန်းပေးရမည်။အထူးသတိပြုရမည်မှာ ဥစုကိရိယာ မလုံလောက်ပါက ဥများဆုံးရှုံးတတ်ပါသည်။ ဥစုကိရိယာတွင် ကပ်ငြိနေသော ဥများကို ပေ ၆၀၊ ပေ ၂၀ ၊ သို့မဟုတ် ပေ ၁၀၀၊ ပေ ၅၀ ရှိ ဥပေါက်ကန်အတွင်းသို့ ရွှေ့ပြောင်းပေးရသည်။ ဥပေါက်ကန်သည် နေရောင်ခြည်ထိတွေ့သော နေရာဖြစ်ဖို့လိုသည်။အလွန်အေးသော ကန်ရေကို အသုံးမပြုသင့်ပေ။

အပူချိန် ၂၅ ဒီဂရီဆိုလျှင် ဥမှအကောင်ပေါက်ရန် ၃ရက်ခန့် ကြာသည်။အပူချိန် ၂၀ ဒီဂရီဆိုလျှင်အကောင်ပေါက်ရန် ၄ရက်ခန့်ကြာသည်။ ရွှေဝါငါးကြင်း အမ တစ်ကောင်လျှင် ဥပေါင်း ၅၀၀၀၀ ကျော်ခန့် ဥချပေါက်ပွားနိုင်ကြောင်း ရေး သားတင်ပြလိုက်ပါသည်။

ဇော်ကြီး(ငါးဦးစီး)