အမေရိကန်ဒေါ်လာ သန်း ၅၅၀ တန်ဖိုးရှိ ကွန်တိန်နာဆိပ်ကမ်း ဆောင်ရွက်ခွင့်စာချုပ် ဘင်္ဂလားဒေ့ရှ် လက်မှတ်ရေးထိုး

ဘင်္ဂလားဒေ့ရှ်နိုင်ငံသည် ချာတာဂရမ်ရှိ Laldia ကွန်တိန်နာဆိပ်ကမ်း တည်ဆောက်ရေးအတွက် US$550 သန်းကျော်တန်ဖိုးရှိ လုပ်ငန်းဆောင်ရွက်ခွင့်စာချုပ်ကို လက်မှတ်ရေးထိုးခဲ့သည်။ ဤဆိပ်ကမ်းကို Public-Private ပူးပေါင်းစီမံကိန်းအဖြစ် CPA (Chittagong Port Authority), APM Terminals နှင့် ဒေသခံ QNS Container Services Ltd. တို့ ပူးပေါင်းဆောင်ရွက်မည်ဖြစ်သည်။ စာချုပ်အရ APM Terminals သည် ၃၀ နှစ်ကြာ လုပ်ဆောင်ခွင့်ရရှိမည်ဖြစ်ပြီး အဓိက စွမ်းဆောင်ရည်ညွှန်ကိန်းများအပေါ် မူတည်၍ တိုးချဲ့ခွင့် ရနိုင်မည်ဖြစ်သည်။ ရင်းနှီးမြှုပ်နှံသူများသည် ဒီဇိုင်းရေးဆွဲခြင်း၊ ငွေကြေးထောက်ပံ့ခြင်း၊ တည်ဆောက်ခြင်းနှင့် လည်ပတ်လုပ်ဆောင်ခြင်းတို့ကို ဆောင်ရွက်မည်ဖြစ်ပြီး ဤမော်ဒယ်ဖြင့် ဘင်္ဂလားဒေ့ရှ်၏ ဆိပ်ကမ်းကဏ္ဍအတွက် ပထမဆုံးစီမံကိန်း ဖြစ်လာမည်ဖြစ်သည်။

APM Terminals ၏ CEO Keith Svendsen က “ဒေသခံ ထုတ်လုပ်သူများ၊ တင်ပို့သူများ၊ တင်သွင်းသူများနှင့် ဘင်္ဂလားဒေ့ရှ် စီးပွားရေး တိုးတက်မှုကို ပံ့ပိုးနိုင်မည်” ဟု ပြောကြားပြီး “အနာဂတ်အလုပ်အကိုင်အခွင့်အလမ်းများဖြင့် လုံခြုံပြီး ထိရောက်သော ဆိပ်ကမ်း” တစ်ခု ဖန်တီးရန် ရည်ရွယ်ထားကြောင်း ထပ်မံဖော်ပြခဲ့သည်။

ဤတည်ဆောက်မှုသည် ဒိန်းမတ်နှင့် ဘင်္ဂလားဒေ့ရှ်တို့အကြား Sustainable Green Framework Engagement အောက်တွင် လုပ်ဆောင်ထားပြီး အစိမ်းရောင်ရင်းနှီးမြှုပ်နှံမှု၊ အလုပ်အကိုင်ဖန်တီးမှုနှင့် စီးပွားရေးပူးပေါင်းဆောင်ရွက်မှုကို အဓိကထားသည်။ ဂုဏ်ထူး ဆောင် အကြံပေးအရာရှိချုပ် ပရော်ဖက်ဆာ မိုဟာမက်ယူနွတ်စ်က ဤစီမံကိန်းသည် “ပြုပြင်ပြောင်းလဲမှု၊ ပွင့်လင်းမြင်သာမှုနှင့် ရင်းနှီးမြှုပ်နှံမှုဆက်နွယ်သည့်တိုးတက်မှု” အပေါ် ဘင်္ဂလားဒေ့ရှ်၏ ကတိကဝတ်ကို ဖော်ပြထားကြောင်း၊ Laldia သည် “နိုင်ငံ၏ ပထမဆုံး အစိမ်းရောင်ဆိပ်ကမ်း” ဖြစ်လာမည်ဖြစ်ကြောင်း ပြောကြားသည်။ ထိုဆိပ်ကမ်းသည် တင်ပို့စွမ်းရည် တိုးချဲ့ပြီး ထောက်ပံ့ပို့ဆောင်မှု အခက်အခဲများကို လျော့ချနိုင်မည်ဟုလည်း ထပ်မံဖော်ပြခဲ့သည်။

ဒိန်းမတ်နိုင်ငံ နိုင်ငံခြားရေးဝန်ကြီး Lars Løkke Rasmussen က Maersk သည် ဘင်္ဂလားဒေ့ရှ်၏ ကွန်တိန်နာကုန်သွယ်မှု၏ ၃၀ ရာခိုင်နှုန်းခန့်ကို ဆောင်ရွက်နေပြီး ဤရင်းနှီးမြှုပ်နှံမှုသည် နိုင်ငံနှစ်ခုအကြား ဆက်လက်ပူးပေါင်းဆောင်ရွက်မှု၏ အညွှန်းဖြစ်ကြောင်း ဖော်ပြခဲ့သည်။ CPA ဥက္ကဋ္ဌ Rear Admiral S. M. Moniruzzaman က ဤဆိပ်ကမ်းသည် ချာတတဂရမ်ဆိပ်ကမ်း၏ စွမ်းရည်နှင့် ထိရောက်မှု တိုးတက်စေမည်ဟု ပြောကြားခဲ့သည်။ QNS Container Services Ltd. ၏ Nurul Qayyum Khan က ဤစီမံကိန်းသည် နိုင်ငံတကာ အတွေ့အကြုံနှင့် ဒေသခံ စီးပွားရေးလုပ်ငန်းများကို ပေါင်းစပ်စေပြီး တင်ပို့သူ၊ တင်သွင်းသူများအတွက် ကုန်သွယ်မှုကုန်ကျစရိတ်ကို လျော့ချနိုင်မည်ဟု ထပ်မံဖော်ပြခဲ့သည်။

၂၀၃၀ ခုနှစ်တွင် စတင်လည်ပတ်မည့် ဤဆိပ်ကမ်းသည် ဘင်္ဂလားဒေ့ရှ်၏ နှစ်စဉ် ကွန်တိန်နာ ကိုင် တွယ်မှုစွမ်းရည်ကို TEU 800,000 ကျော် တိုးချဲ့နိုင်မည်ဖြစ်ပြီး အထည်၊ အဝတ်အစားနှင့် ထုတ်လုပ်မှုကဏ္ဍများကို ပံ့ပိုးပေးနိုင်မည်ဖြစ်သည်။ ဤရေနက်ဆိပ်ကမ်းသည် လက်ရှိ TEU 2,800 အကန့်အသတ်ထက် မြင့်မားသော TEU 6,000 သယ်ယူနိုင်သော သင်္ဘောများကို ကိုင်တွယ်နိုင်မည်ဖြစ်ပြီး ဈေးကွက်အကြပ်အတည်းနှင့် ထောက်ပံ့ပို့ဆောင်မှု ကုန်ကျစရိတ်ကို လျော့ချနိုင်မည်ဖြစ်သည်။

တည်ဆောက်ရေးအဆင့်တွင် အလုပ်အကိုင် ၁,၀၀၀ ကျော် ဖန်တီးနိုင်မည်ဖြစ်ပြီး လုပ်ဆောင်မှုအပြည့် အဝတွင် အလုပ်အကိုင် ၅၀၀ ကျော် ရှိမည်ဟု ခန့်မှန်းထားသည်။ ထို့အပြင် ထောက်ပံ့ပို့ဆောင်မှုနှင့် ထုတ်လုပ်မှုကဏ္ဍများတွင် အခြားသောအလုပ်အကိုင်များလည်း ဖြစ်ပေါ်နိုင်မည်ဖြစ်သည်။ APM Terminals က လုပ်သားဖွံ့ဖြိုးရေးအစီအစဉ်တွင် လေ့ကျင့်ရေးနှင့် အလုပ်သင်အစီအစဉ်များပါဝင်မည်
ဖြစ်ကြောင်း ဖော်ပြထားသည်။

TTP

FreshPlaza.com