စိုက်ပျိုးရေးနှင့် မွေးမြူရေးတက္ကသိုလ် (မအူပင်) ၌ ဆောက်လုပ်မည့် အဆောက်အအုံများအတွက် လျာထားနေရာရွေးချယ်

နေပြည်တော် ၊ ဧပြီ ၂၆

စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီး ဦးဗိုလ်ဗိုလ်ကျော်သည် ဧပြီ ၂၆ ရက်နေ့ မွန်းလွဲပိုင်းက ဧရာဝတီတိုင်းဒေသကြီး မအူပင်မြို့နယ်ရှိ စိုက်ပျိုးရေးနှင့် မွေးမြူရေး တက္ကသိုလ်(မအူပင်)သို့ ရောက်ရှိပြီး ပါမောက္ခချုပ်နှင့် ဆရာ/ဆရာမများအား တွေ့ဆုံသည်။

တွေ့ဆုံပွဲတွင် တာဝန်ရှိသူများက    ၂၀၂၅-၂၀၂၆ ပညာသင်နှစ် ပထမနှစ်ဝက်သင်တန်း သင်ကြားခဲ့မှုနှင့် ဒုတိယနှစ်ဝက်သင်တန်း ဆက်လက်ဖွင့်လှစ်သင်ကြားမည့် အခြေအနေများ၊ သင်ကြားရေးအထောက်အကူပြု လက်တွေ့ခန်းများအတွက် ဓာတ်ခွဲခန်းသုံးပစ္စည်းများ ဖြည့် ဆည်းရန် စီမံထားရှိမှု အခြေအနေများ၊  စိုက်ပျိုးရေးနှင့် မွေးမြူရေး တက္ကသိုလ်(မအူပင်) အတွက် လို အပ်သည့် အခြေခံအဆောက်အဦများ ဆောက်လုပ်နိုင်ရန် ၂၀၂၆-၂၀၂၇ ဘဏ္ဍာ နှစ်တွင် ဆောင်ရွက်လျက်ရှိသည့် ကျောင်းသား/ကျောင်း သူအိပ်ဆောင်၊ ထမင်းစားဆောင်များ ဆောက်လုပ်နေမှုအခြေအနေနှင့် ဆက်လက်ဆောင်ရွက်မည့်   စာ သင်ဆောင်၊ အရာထမ်း/ အမှုထမ်းအိမ်ရာများ ဆောက်လုပ်ရန်အတွက် လျာထားမြေနေရာများ၏ မြေပြင်အခြေအနေများကို ရှင်လင်းတင်ပြကြသည်။

တင်ပြချက်များအပေါ် ဒုတိယဝန်ကြီးက အရည်အသွေးပြည့်ဝသော စိုက်ပျိုးရေး၊ မွေးမြူရေးပညာရှင်များ မွေးထုတ်ပေးနိုင်ရေး၊  သတ်မှတ်ဘာသာရပ်များအား စနစ် တကျ သင်ကြားပေးရန်၊  သင်ကြားရေးအထောက်အကူပြုပစ္စည်းများနှင့် ဓာတ်ခွဲခန်းသုံးပစ္စည်းများ အချိန် မီဝယ်ယူဖြည့်တင်းသွားရန်၊ တာဝန်ယူဆောက်လုပ်သော ကုမ္ပဏီနှင့် အရည်အသွေး စစ်ဆေးရေးကုမ္ပဏီများအနေဖြင့် အဆောက်အဦ လုပ် ငန်းများဆောင်ရွက်ရာတွင် အရည် အသွေးကောင်းမွန်စေရေး အလေး ထားဆောင်ရွက်ကြရန်၊ တည် ဆောက် ရေးသုံး ပစ္စည်းများ မိုးမကျမီ ကြိုတင်စုဆောင်းထားရှိရန်၊ တာဝန်ရှိသူများက အနီးကပ်ကြီး ကြပ်၍ သတ်မှတ် စံချိန်စံညွှန်များနှင့်အညီ အချိန်မီပြီးစီးအောင် ဆောင် ရွက်သွားကြရန်၊ စက်ယန္တရားများ အသုံးပြုရာတွင် စက်သုံးဆီလုံလောက် စွာရရှိနိုင်ရန် သက်ဆိုင်ရာ တာဝန်ရှိသူများနှင့် ပူးပေါင်းဆောင်ရွက်ကြရန်၊ မိုးရာသီ ကျောင်းဧရိယာအတွင်း ရေဝပ်မှုမရှိစေရေး ကြိုတင်စီမံဆောင်ရွက်ထားရန်နှင့် လာမည့်ပညာသင်နှစ် တက်ရောက်မည့်  ‌ကျောင်းသား/ကျောင်းသူများ ထားရှိနိုင်ရေး ပြီးစီးသင့်သည်များ အချိန် မီပြီးစီးအောင် အလေးထားဆောင် ရွက်သွားကြရန် အသေးစိတ်ဆွေးနွေးမှာကြားသည်။

အလားတူ ဒုတိယဝန်ကြီးသည် တိုင်းဒေသကြီးဦးစီးမှူးများနှင့်တွေ့ဆုံ၍ မအူပင်မြို့အတွင်း သန့်ရှင်းသာယာလှပရေးနှင့် ရေနုတ်မြောင်းများ ရေစီးရေလာ ကောင်းမွန်စေရေး ရေတိုရေရှည်ဆောင်ရွက်လျက်ရှိသည့် ကိစ္စရပ်များအားလည်းကောင်း၊ ဒေသအတွင်း စားရေရိက္ခာဖူလုံရေးအတွက် အထွက်နှုန်းတိုးတက်ရေး၊ စိုက်ပျိုးရေရရှိရေး၊ ထွန်ယက်စိုက် ပျိုးရာတွင် လယ်ယာသုံးစက်ကိရိ ယာများ ပိုမိုသုံးစွဲနိုင်ရေး၊ ကိန်း ဂဏန်း အချက်အလက်များ မှန်ကန်စေရေး စသည့် စိုက်ပျိုးရေး၊ မွေးမြူရေး ကဏ္ဍာဆိုင်ရာ ကိစ္စရပ်များ  ဆွေးနွေးကြသည်။

ဆက်လက်၍ ဒုတိယဝန်ကြီးနှင့် တာဝန်ရှိသူများသည် စိုက်ပျိုးရေးနှင့် မွေးမြူရေး တက္ကသိုလ်(မအူပင်) ကျောင်းဝင်းအတွင်းရှိ ကျောင်းသား/ ကျောင်းသူဆောင်၊ ထမင်းစားဆောင်၊ စာသင်ဆောင်နှင့် အရာထမ်း/ အမှုထမ်းအိမ်ရာများ ဆောက်လုပ်ရန် မြေနေရာ ရွေးချယ်ထားမှု အခြေအနေများအား လည်းကောင်း၊ ကျောင်းသား/ကျောင်းသူ နှစ်ထပ်အိပ်ဆောင်နှင့် ထမင်းစားဆောင် ဆောက်လုပ်နေမှု အခြေအနေများအားလည်းကောင်း၊ မအူပင်မြို့၊ ရေစီးရေလာကောင်းမွန်စေရေး အပိုင်း(၁) လုပ်ငန်းဆောင်ရွက်နေမှု အခြေအနေများအား လည်းကောင်း ကြည့်ရှုစစ်ဆေးပြီး သတ်မှတ်ဒီဇိုင်းပုံစံများနှင့်အညီ စနစ်တကျ ဆောင် ရွက်ကြရန် ဆွေးနွေးမှာကြားသည်။

ထို့မှတစ်ဆင့် ဒုတိယဝန်ကြီးသည် ညောင်တုန်းမြို့နယ် ဂန်ချောင်းကျေးရွာအနီး တာမိုင်(၁၂)မိုင်နှင့် (၁၃)မိုင်အကြား ဆောင်ရွက်လျက်ရှိသော ဂန်ချောင်းဖြတ်တာ အလျား ၂၃၀၀ ပေ တည်ဆောက်ခြင်းလုပ်ငန်းအား ကြည့်ရှုစစ်ဆေးပြီး သတ်မှတ် စံချိန်စံညွှန်းများနှင့်အညီ အချိန်မီပြီးစီးအောင် ဆောင်ရွက်ကြရန် ဆွေးနွေးမှာကြား ခဲ့ကြောင်း သိရသည်။ ဂန်ချောင်းဖြတ်တာသည် ညောင်တုန်းကျွန်းတာတွင် ပါဝင်သော ဖြတ်တာတစ်ခုဖြစ်ပြီး ညောင်တုန်းကျွန်းတာအနေဖြင့် အလျား ၃၂ မိုင်ခန့် ရှိရာ ရေဘေးကာကွယ်ရေးဧရိယာ ၁၀၅၂၂၁ ဧကဖြင့် ဒေသခံပြည်သူများ၏ လယ်ယာမြေများအား မိုးရာသီကာလ မြစ်ရေကြီးချိန်တွင် ရေဘေးအန္တရာယ်ကျ‌‌ရောက်ပြီး  ရေကြီးနစ်မြုပ်၍ ပျက်စီးဆုံးရှုံးမှုမှ   ကာကွယ်ပေးလျက်ရှိသော တာတစ်ခုဖြစ်ကြောင်း သတင်းရရှိသည်။ 

MOALI