အင်းလေးကန် ရေရှည်ထိန်းသိမ်းစောင့်ရှောက်ရေးနှင့် သာယာလှပစိမ်းလန်းစိုပြေရေးလုပ်ငန်းများ ကြည့်ရှုစစ်ဆေး

နေပြည်တော်၊ ဖေဖော်ဝါရီ ၈

စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ပြည်ထောင်စုဝန်ကြီး ဦးမင်းနောင်သည် ဖေဖော်ဝါရီ ၈ ရက် နံနက်ပိုင်းတွင် ကလောခရိုင်၊ ညောင်ရွှေမြို့နယ် အင်းလေးကန်ရေရှည်ထိန်းသိမ်းစောင့်ရှောက်ရေးနှင့် သာယာလှပ စိမ်းလန်းစိုပြည်ရေးလုပ်ငန်းများကို ကြည့်ရှုစစ်ဆေးရာ  တာဝန်ရှိသူများက ကန်အတွင်းသို့ စီးဝင်သည့် ရေလမ်းကြောင်းများ၊ အင်းလေးကန် ဧရိယာ၏ လက်ရှိမြေအသုံးချမှု အခြေအနေ၊ စူးစမ်းလေ့လာတိုင်းတာခြင်းလုပ်ငန်း၊ နုန်းထိန်းတမံနှင့် နုန်းဖမ်းဆည်များ တည်ဆောက်ခြင်းနှင့် တည်ဆောက်ပြီး နုန်းထိန်းတမံ၊ နုန်းဖမ်းဆည်များ ထိန်းသိမ်း ဆောင်ရွက်နေမှု၊ သဲနုန်းတူးဖော်ခြင်လုပ်ငန်းများနှင့် အဓိကရေလမ်းတစ်လျှောက် ရေလမ်းအမှတ်အသားနှင့် နယ်နိမိတ်မှတ်တိုင်များစိုက်ထူခြင်းလုပ်ငန်း၊ ရေမှော်၊ဗေဒါများ ရှင်းလင်းခြင်းလုပ်ငန်း ဆောင်ရွက်ချက်များ၊ ကျွန်းမျောများ ရှင်းလင်းခြင်းနှင့် အထောက်အကူပြုလုပ်ငန်းများကို ရှင်းလင်းတင်ပြကြသည်။

တင်ပြချက်များအပေါ် ပြည်ထောင်စုဝန်ကြီး က အင်းလေးကန်   မတိမ်ကောစေရန်နှင့် သဘာဝဝန်းကျင်ဂေဟစနစ် မပျက်သုဉ်းစေရန်၊ ကန်ရေပြင်ကျယ်အတွင်းနှင့် စက်လှေ ရေလမ်းကြောင်းတစ်လျှောက် ဗေဒါများ ကျွန်းမျောဟောင်းများ ဆယ်ယူရေးဆောင်ရွက်ရမည့် လုပ်ငန်းများ၊ အင်းလေးကန် အစဉ်သာယာလှပစိမ်းလန်းစိုပြည်နေစေရေး ဆောင်ရွက်ရန် လုပ်ငန်းများကို အသေးစိတ်ဆွေးနွေးမှာကြားပြီး လုပ်ငန်းများအားလုံး ပွင့်လင်းရာသီအတွင်း အပြီးသတ်ဆောင်ရွက်နိုင်ရေး စီမံပေးခဲ့သည်။

ဆက်လက်၍ ပြည်ထောင်စုဝန်ကြီးသည် အင်းလေးကန်၏ မြောက်ဘက်မှ တစ်နှစ်ပတ်လုံး စီးဝင်လျက်ရှိသည့် နမ့်လတ်ချောင်းအား အုတ်ဖိုရွာအနီးတွင် ကျောက်စီ ရေလွှဲဆည်တည်ဆောက်ရေလွှဲယူ၍ နုန်းစစ်အနည်ထိုင်စေခြင်းဖြင့် အင်းလေးကန် အတွင်း နုန်းများတိုက်ရိုက် ဝင်ရောက်မှုမှကာကွယ်ရန် တည်ဆောက်ထားသည့် နဒီကန် နှင့် သာစည်ကန်အား ကြည့်ရှုစစ်ဆေးပြီး  ဆယ်ယူရရှိသော နုန်းများကို တောင်သူများ၏ စိုက်ပျိုးမြေများတွင် ပြန်လည်အသုံးချဆောင်ရွက်နိုင်ရန် တာဝန်ရှိသူများအား အသေးစိတ်ဆွေးနွေး မှာကြားသည်။

ထိုမှတဆင့် ပြည်ထောင်စုဝန်ကြီး သည် ဟဲဟိုးမြို့ ၊ ညောင်ခါးရှည်ရွာရှိ ဟဲဟိုး အာလူး ထုတ်လုပ်သူအသင်း ၏ မျိုးအာလူး အအေးခန်းသိုလှောင်ရုံသို့ရောက်ရှိပြီး အားလူးစိုက်တောင်သူများ၊ အာလူးမျိုးထုတ် လုပ်သူလုပ်ငန်းရှင်များအား တွေ့ဆုံ၍ အာလူးမျိုး ထုတ်လုပ်မှု လုပ်ငန်းများကို စိုက်ပျိုးရေးဦးစီးဌာနမှ ထုတ်လုပ်နိုင်သည့်အနေအထားနှင့် ထပ်မံ လိုအပ်သောမျိုးအာလူးပမာဏအတွက် အာလူးမျိုး ထုတ်လုပ်ခြင်းကို တောင်သူများကိုယ်တိုင် တက်ကြွစွာပူးပေါင်းဆောင်ရွက်ကြရန်နှင့် နည်းပညာ လိုအပ်သည့်အကူအညီများကို ဌာနပညာရှင်များအပိုင်းက ကူညီဆောင်ရွက်ပေးသွားမည့် အခြေအနေများ၊ မြေယာ အသုံးပြုရာတွင် တည်ဆဲဥပဒေ၊ လုပ်ထုံးလုပ်နည်းများအား တိတိကျကျလိုက်နာ ဆောင်ရွက်ရန် လိုအပ်ချက်များကို ဆွေးနွေးပြောကြားပြီး အားလူး တောင်သူများ ၊ လုပ်ငန်းရှင်များ၏ တင်ပြချက်များအပေါ် ညှိနှိုင်းပေါင်းစပ် ဆောင်ရွက်ပေးခဲ့သည်။

၎င်းနောက် ပြည်ထောင်စုဝန်ကြီးသည် ဒေသခံတောင်သူများစိုက်ပျိုးထားသော အာလူးစိုက်ခင်းများကို ကြည့်ရှုစစ်ဆေး၍ လိုအပ်သော
ပံ့ပိုးကူညီမှုများ ဆောင်ရွက်ပေးခဲ့ ကြောင်း သတင်းရရှိသည်။

MOALI