မြန်မာနှင့်အိန္ဒိယနိုင်ငံအကြား လယ်ယာကဏ္ဍဆိုင်ရာကုန်သွယ်မှု တိုးမြှင့်ဆောင်ရွက်ရေးကြိုးပမ်း

နေပြည်တော်၊ ဇန်နဝါရီ ၂၃

စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ဒုတိယဝန်ကြီး ဒေါက်တာတင်ထွဋ်သည် ဇန်နဝါရီ ၂၂ ရက်နေ့ နေ့လယ် ၂:၃၀ နာရီတွင် ရန်ကုန်မြို့ ပြည်လမ်းရှိ Novotel Hotel ၌ အိန္ဒိယနိုင်ငံ စားသုံးသူရေးရာ၊ အစားအသောက်နှင့်ဖြန့်ဖြူးရေးဝန်ကြီးဌာနမှ Secretary ဖြစ်သူ Smt. Nidhi Khare နှင့်အဖွဲ့အား လက်ခံတွေ့ဆုံသည်။

တွေ့ဆုံရာတွင် မြန်မာနှင့်အိန္ဒိယနိုင်ငံအကြား လယ်ယာကဏ္ဍဆိုင်ရာကုန်သွယ်မှု တိုးမြှင့်ဆောင်ရွက်ရန်၊ တင်သွင်းမှု မူဝါဒ တည်ငြိမ်စေရေးနှင့် နိုင်ငံအချင်းချင်း ပူးပေါင်းဆောင်ရွက်ရန်၊ စပါးကိုအခြေခံသော ပဲမျိုးစုံစိုက်ပျိုးထုတ်လုပ်မှုကွင်းဆက် ဘက်စုံဖွံ့ဖြိုးတိုးတက်ရေး ပူးပေါင်းဆောင်ရွက်ရန် ၊ အိန္ဒိယမှ အများအပြားဝယ်ယူသော မတ်ပဲနှင့် ပဲစင်းငုံ တို့တွင်ထွက်ကုန်အရည်အသွေး ယှဉ်ပြိုင်နိုင်ရန်နှင့်  ပိုးသတ်ဆေးဓာတ်ကြွင်း နည်းပါးရေးအတွက် ဘက်စုံပိုးမွားကာကွယ်ရေး နည်းပညာပေး လုပ်ငန်းများကို တိုးချဲ့ဆောင်ရွက်ပေးနိုင်ရေး ကိစ္စရပ်များ၊ အခြားပဲများနှင့်ပတ်သက်၍ အလားအလာများ မြန်မာနိုင်ငံမှ ပဲမျိုးစုံတင်ပို့ရောင်းချမှု ရေရှည်တည်တန့်ရေးအတွက် လိုအပ်သည့်လုပ်ငန်းများတွင် ပူးပေါင်းဆောင်ရွက်ရေး နှစ်နိုင်ငံပူးပေါင်းဆောင်ရွက်ရေးလုပ်ငန်းများတွင် ပဲမျိုးစုံသာမက ဂျုံနှင့်ပတ်သက်၍ အပြန်အလှန် ပူးပေါင်း ဆောင်ရွက်မှုများကို သုတေသနနှင့် နည်းပညာ ဖွံ့ဖြိုးရေးမှစ၍ ဈေးကွက် ပို့ဆောင်သည်အထိ ဆောင်ရွက်နိုင်ရေး လုပ်ငန်းများကို ဆောင်ရွက်နိုင်ရေး ရင်းနှီးပွင့်လင်းစွာ ဆွေးနွေးခဲ့ကြသည်။

အဆိုပါတွေ့ဆုံဆွေးနွေးပွဲသို့ ဒုတိယဝန်ကြီး ဒေါက်တာတင်ထွဋ်နှင့်အတူ စိုက်ပျိုးရေးဉီးစီးဌာန ညွှန်ကြားရေးမှူးချုပ်နှင့် တာဝန်ရှိသူများ တက်ရောက်ကြကြောင်း သတင်းရရှိသည်။

MOALI