ဧကကွက် ဟက်တာကွက်အလိုက် စက်ဖြင့် တစ်ချိန်တည်း တစ်ပြိုင်တည်းဆွတ်ခူးသိမ်းဆည်းရန် ဝါသီးနှံမျိုးနှင့်စိုက်စနစ်နည်းပညာများ စမ်းသပ်

နေပြည်တော် ၊ ဇန်နဝါရီ ၁၃

လက်ရှိ မြန်မာနိုင်ငံ၏ ဝါစိုက်ပျိုးရေးလုပ်ငန်းတွင် ပင်ခြား ၂ ပေ ခွဲ ၊ တန်းကြား ၃ ပေ ဖြင့် စိုက်ပျိုးကြခြင်းဖြစ်ပြီး ဝါဆွတ်ရာတွင်လည်း ရသမျှကို လက်ဖြင့် အကြိမ်ကြိမ်ဆွတ် ကြရခြင်းဖြစ်၍ နောက်တစ်သီး ရာသီချိန်မီ စိုက်ပျိုးနိုင်ရန် ဆောင်ရွက်ရမှုများတွင် တောင်သူများအတွက် လုပ်ငန်းခွင်အခက်အခဲများရှိနေကြကြောင်းသိရသည်။ အခြားတစ်ဘက် တွင်လည်း ပြည်တွင်း ဝတ်ရေးဖူလုံစေရန် ဝါသီးနှံစိုက်ပျိုးထုတ်လုပ်မှု  တိုးတက်ရေး ကြိုးပမ်း ဆောင်ရွက်လျက်ရှိရာတွင် အခြားသီးနှံများ၏ စိုက်ပျိုးထုတ်လုပ်မှုကို မထိခိုက်စေပဲ ဝါတောင်သူများအတွက်လည်း ဝင်ငွေအကျိုးအမြတ်သေချာစေရန်နှင့် နှစ်အလိုက် အရည်အသွေးကောင်း ချည်မျှင်ရှည်ဝါများ တိုးတက်ထုတ်လုပ်နိုင်ရန် စိုက်ပျိုးရေး၊မွေးမြူရေး နှင့် ဆည်မြောင်း ဝန်ကြီးဌာနက ကြိုးပမ်းဆောင်ရွက်လျက်ရှိကြောင်း၊ ထိုသို့ဆောင်ရွက်ရာတွင် ဧကကွက် ဟက်တာကွက်ကြီးများအဖြစ် တစ်ကွင်းတစ်ဆက်တည်း စိုက်ပျိုးထုတ်လုပ်နိုင်ရေး၊ စက်ဖြင့် တစ်ချိန်တည်းတစ်ပြိုင်တည်းရိတ်သိမ်းနိုင်ရေး အတွက် ဝါတောင်သူကြီးများအား နည်းပညာနှင့်အကူအညီများစီမံဆောင်ရွက်ပေးသွားမည်ဖြစ်ကြောင်း သိရသည်။

ဇန်နဝါရီ ၁၂ ရက်နေ့ မွန်းလွဲပိုင်းတွင် ပြည်ထောင်စုဝန်ကြီး ဦးမင်းနောင်သည် နေပြည်တော် ပျဉ်းမနားရှိ စိုက်ပျိုးရေးနှင့်မွေးမြူရေးသိပ္ပံ ကျောင်းဝန်းအတွင်း မျိုးယှဉ်ပြိုင် စမ်းသပ်စိုက်ပျိုးထားသည့် KTK-1၊ ငွေချည်-၁၁၊ RAKA-666၊ ရွှေတောင်-၈၊ B-31 ချည်မျှင်ရှည်ဝါ စိုက်ခင်းများကို ကြည့်ရှုစစ်ဆေးရာ စိုက်ပျိုးရေးဦးစီးဌာန ညွှန်ကြားရေးမှူးချုပ် နှင့် တာဝန်ရှိသူများက စမ်းသပ်စိုက်ပျိုးထားသည့် မျိုးများယှဉ်ပြိုင်စိုက်ပျိုးခြင်းနှင့် ဆောင်ရွက်ရသည့် ရည်ရွယ်ချက်များ၊ အပင်သက်တမ်းအလိုက် အပင်ကြီးထွားမှုရပ်တန့်ဆေး ၊ သီးပွင့်ဆေးနှင့် ရွက်ချဆေးသုံးစွဲခဲ့မှု၊ ဝါသီးပွင့်မှုနှင့် ဝါဂွမ်းခန့်မှန်းအထွက်နှုန်း တို့ကို တင်ပြကြသည်။

တင်ပြချက်များအပေါ် ပြည်ထောင်စုဝန်ကြီးက ယခုကဲ့သို့ အပင်ပြုစု စောင့်ရှောက်ရမှု နှင့် သွင်းအားစုစရိတ်သည် တောင်သူတွက်ခြေကိုက်သည့် အထွက်နှုန်း ရလဒ်များရှိရန် လိုကြောင်း၊ ယခုနည်းပညာအရ သတ်မှတ်ကာလအတွင်း ဝါများအား တစ်ပြိုင်နက်တည်း စွမ်းအားပြည့် ဆွတ်ခူးသိမ်းဆည်း နိုင်မည်ဖြစ်၍ နောက်သီးနှံကို ရာသီချိန်မီ စိုက်ပျိုးနိုင်မည် ဖြစ်ကြောင်း၊ ရေရှည်တွင် လက်မှု လယ်ယာ မှ စက်မှုလယ်ယာသို့ ပြောင်းလဲအသုံးပြုရာ၌ ဝါသီးနှံ ကို ဧကကွက် ဟက်တာကွက် အလိုက် စက်ဖြင့်တစ်ချိန်တည်း တစ်ပြိုင်တည်းဆွတ်ခူး သိမ်းဆည်းရန် လိုအပ်လာမည်ဖြစ် ကြောင်း၊ သို့ဖြစ်၍ နည်းပညာအရ သေချာမှုရှိစေရန် ပညာရှင်များ အပိုင်းက ထပ်မံ စမ်းသပ်ဆောင်ရွက်ပေးရန် ဖြစ်ကြောင်း ဆွေးနွေးမှာကြားသည်။

ယခုစမ်းသပ်စိုက်ပျိုးမှုတွင် ပင်ခြား ၆ လက်မ ၊ တန်းကြား ၂ ပေ  ဖြင့် စိုက်ပျိုးထားခြင်းကြောင့် တစ်ဧကဝင်ဆံ့သည့်အပင်ဦးရေ တိုးတက်စိုက်ပျိုးနိုင်ခြင်း၊ အပင်အရပ်ကို ထိန်းချုပ်ကာ အသီးအပွင့်များကို တစ်ပြိုင် တည်း စွမ်းအားပြည့် သီးပွင့်စေခြင်းကြောင့် စက်ကိရိယာဖြင့် ဆွတ်ခူးသိမ်းဆည်းနိုင်မည်ဖြစ်၍ တောင်သူများအနေဖြင့် ဝါစိုက်ပျိုး ထုတ်လုပ်မှုကို ပိုမိုမြှင့်တင် ဆောင်ရွက်နိုင်ကြမည် ဖြစ်ကြောင်း၊ အဆိုပါနည်းပညာအား ပြည်တွင်း ချည်မျှင်ရှည်ဝါမျိုး နှင့် ပြည်ပချည်မျှင်ရှည်ဝါ စပ်မျိုးများအပေါ် သက်ရောက်မှုကို စိုက်ပျိုးရေးဦးစီးဌာန၊ ဝါနှင့်လျှော်မျှင်ထွက်သီးနှံဌာနခွဲ ပညာရှင်များက စမ်းသပ်ဆောင်ရွက် ခြင်း ဖြစ်ကြောင်း သိရသည်။ 

ကိုရင်အောင်မိုး