မန္တလေးငလျင်ကြီးကြောင့် ထိခိုက်ပျက်စီးခဲ့သော ဆင်သေရေလွှဲဆည်ကို ဘူမိအနေအထားတည်ငြိမ်မှုရှိသည့် သရက်ကွင်းကျေးရွာအနီး၌ အသစ်ပြန်လည်တည်ဆောက်

နေပြည်တော်၊ ဒီဇင်ဘာ ၂၇

စိုက်ပျိုးရေး၊မွေးမြူရေးနှင့်ဆည်မြောင်းဝန်ကြီးဌာန ပြည်ထောင်စုဝန်ကြီး ဦးမင်းနောင်သည်  ဒုတိယဝန်ကြီး ဦးဗိုလ်ဗိုလ်ကျော်နှင့် တာဝန်ရှိသူများလိုက်ပါလျက်  ဒီဇင်ဘာ ၂၇ ရက်နေ့ မွန်းလွဲပိုင်းတွင် နေပြည်တော်ကောင်စီနယ်မြေ၊ တပ်ကုန်းမြို့နယ် သရက်ကွင်း ကျေးရွာအနီး၌ အသစ်ပြန်လည်တည်ဆောက်မည့် ဆင်သေရေလွှဲဆည်နေရာအား ကြည့်ရှု စစ်ဆေးသည်။

ဦးစွာတာဝန်ရှိသူများက မန္တလေးငလျင်ကြီးကြောင့် ထိခိုက်ပျက်စီးခဲ့သော ဆင်သေရေလွှဲဆည် ပြောင်းရွှေ့တည်ဆောက်ရန် နေရာအသစ်၏ ရေဝပ်ဧရိယာအတွင်း ပါဝင်သည့် စိုက်ပျိုးမြေအား စီမံခန့်ခွဲထားရှိမှုအခြေနေ၊ ဆင်သေရေလွှဲဆည် (အသစ်) အတည်ပြု ဒီဇိုင်းပုံစံနှင့် တည်ဆောက်ရေးလုပ်ငန်းဆောင်ရွက်မည့်အခြေအနေများ၊ ရေလွှဲဆည် အူကြောင်း (Alignment) ရွေးချယ်ထားရှိမှုတို့ကို ရှင်းလင်းတင်ပြကြသည်။

တင်ပြချက်များအပေါ် ပြည်ထောင်စုဝန်ကြီးက  အသစ်ပြန်လည်တည်ဆောက်မည့် ဆင်သေရေလွှဲဆည်၏ ရေဝပ်ဧရိယာအတွင်း ပါဝင်သည့် လယ်ယာမြေများအတွက် အစားထိုးနေရာချထားပေးရာတွင် စက်မှုလယ်ယာစနစ်ကျလယ်ယာမြေ ဧကအကွက်ကြီးများ ဖော်ဆောင် ပေးနိုင်ရေး၊ နွေမိုးဆောင်း သုံးရာသီ စိုက်ပျိုးသည့် လယ်မြေများအား ဦးစားပေး၍ ဥပဒေနှင့်အညီ ဆောင်ရွက်နိုင်ရေးတို့အတွက် ဒေသခံတောင်သူများနှင့် အသေးစိတ်ဆွေးနွေးသွားရန်၊ ရေလွှဲဆည် တည်ဆောက်ရာတွင် အတည်ပြုဒီဇိုင်းပုံစံများအတိုင်း သတ်မှတ်စံချိန် စံညွှန်းများနှင့်အညီ အရည်အသွေးပြည့်မီစွာတည်ဆောက်နိုင်ရေးအတွက် အကြိုတည်ဆောက်ရေး လုပ်ငန်းများအား လျာထားစီမံဆောင်ရွက်သွားကြရန် တာဝန်ရှိသူများအားဆွေးနွေးမှာကြားသည်။

၂၀၂၅ မတ် ၂၈ ရက်နေ့တွင် လှုပ်ခတ်ခဲ့သည့် မန္တလေးငလျင်ကြီးကြောင့် ထိခိုက်ပျက်စီးခဲ့သော ဆင်သေရေလွှဲဆည်ကို ဘူမိအနေအထားတည်ငြိမ်မှုရှိသည့် သရက်ကွင်း ကျေးရွာအနီး တွင် တမံအလျား ပေ ၄၀၀၊ တမံအမြင့် ၆ ပေရှိ သံကူကွန်ကရစ်အမျိုးအစား ရေလွှဲဆည်အသစ် တည်ဆောက်မည်ဖြစ်ပြီး၊ မူလဆင်သေရေလွှဲဆည်၏ စိစစ်ဧရိယာ ၁၁၆၅၉ ဧကကို အကျိုးပြု နိုင်မည်ဖြစ်ကြောင်းသိရသည်။

ဆက်လက်၍ ပြည်ထောင်စုဝန်ကြီးသည် မူလဆင်သေရေလွှဲဆည်၏ ကြံ့ခိုင်မှု အခြေအနေနှင့် ရေဝင်ရောက်မှု၊ ရေခေါ်မြောင်းတူးဖော်နေမှု၊ ဆင်သေလက်ယာတူမြောင်း ရေသောက်စနစ်ပြုပြင်နေမှုနှင့် ဆောင်းသီးနှံစိုက်ပျိုးထားရှိမှုအခြေအနေများကို ကြည့်ရှု စစ်ဆေးသည်။

ထိုမှတစ်ဆင့် ပြည်ထောင်စုဝန်ကြီးနှင့်အဖွဲ့သည်  ဇေယျာသီရိမြို့နယ်၊ စိမ်းစားပင်ကျေးရွာ အနီးရှိ နေပန်-လပန် စက်မှုလယ်ယာစနစ်ကျလယ်မြေအား ၂၀၂၅ ခုနှစ် မိုးရာသီ သဘာဝဘေး ရေကြီးရေလျှံမှုကြောင့် ချောင်းနံရံ ရေတိုက်စားပျက်စီးမှုများအား ပြန်လည်ပြုပြင်ခြင်းနှင့် ထပ်မံ၍ ရေကြီးရေလျှံမှုကြောင့် ပျက်းစီးမှုဖြစ်ပေါ်လာပါက ထိခိုက်မှုလျော့နည်းသက်သာစေရန် နရဘန်ချောင်းပေါင်၏ အားနည်းသည့်အပိုင်းများအား ကျောက်ဖြည့်မြေထိန်းနံရံ (Gabion Box)ဖြင့် ကာကွယ်ခြင်းလုပ်ငန်းဆောင်ရွက်နေမှုကို ကြည့်ရှုစစ်ဆေးပြီး လုပ်ငန်းများ အရည်အသွေးပြည့်မီရေးနှင့် သတ်မှတ်ကာလအတွင်း အချိန်မီ ပြီးစီးအောင် ဆောင်ရွက်ရန် တာဝန်ရှိသူများအားဆွေးနွေးမှာကြားခဲ့ကြောင်းသတင်းရရှိသည်။

MOALI