အရွက်အရောင်တိုင်းကတ်အသုံးပြု၍ စပါးပင်၏ အာဟာရဓာတ်ကို စီမံခန့်ခွဲမှု တောင်သူနည်းပညာပေးဆွေးနွေး

နေပြည်တော်၊ စက်တင်ဘာ ၉

စပါးသီးနှံပန်းတိုင်အထွက်ရရှိရေးအတွက် စပါးပင်၏အာဟာရဓာတ်လိုအပ်ချက်နှင့်အညီ ဓာတ်မြေဩဇာ စနစ်တကျထည့်သွင်းအသုံးပြုတတ်စေရန် ရည်ရွယ်၍ အရွက်အရောင် တိုင်းကတ် အသုံးပြုပြီး စပါးသီးနှံအာဟာရဓာတ် စီမံခန့်ခွဲမှု တောင်သူနည်းပညာပေးဆွေးနွေးပွဲနှင့် လက်တွေ့ကွင်းသရုပ်ပြပွဲကို စက်တင်ဘာ ၉ ရက် နံနက်ပိုင်းက နေပြည်တော် ပုဗ္ပသီရိမြို့နယ်၊ ဘဲကုန်း စိုက်ကွင်း ၌ ကျင်းပသည်။

စိုက်ပျိုးရေး၊မွေးမြူရေးနှင့်ဆည် မြောင်းဝန်ကြီးဌာန ဒုတိယဝန်ကြီး ဒေါက်တာတင်ထွဋ်က ဆွေးနွေးပြောကြားရာ၌ စပါးသီးနှံ ပန်းတိုင်အထွက်ရရှိရေးအတွက် မြေဩဇာအသုံးပြုရာတွင် ထည့်သွင်းလိုက်သည့်မြေဩဇာ၌ ပါရှိသည့် အာဟာရဓာတ်များအား စပါးပင်  ကောင်းစွာ စုပ်ယူစားသောက်နိုင်ရန်အတွက် စပါးသီးနှံအာဟာရဓာတ်ကိုစီမံခန့်ခွဲမှု နည်းပညာသည် လွန်စွာ အရေး ကြီးပါကြောင်း၊ အရွက် အရောင် တိုင်းကတ် အသုံးပြု၍ စပါးပင်၏ နိုက်ထရိုဂျင်မြေဩဇာလိုအပ်ချိန်ကို သိရှိခြင်းဖြင့် အပင်၏ လိုအပ်ချက်နှင့်အညီ မြေဩဇာအချိန်ကိုက် ထည့်သွင်းခြင်းက အလေအလွင့်နည်းပါး၍ ကုန်ကျစရိတ်ကို ၂၀ ရာခိုင်နှုန်း မှ ၃၀ ရာခိုင်နှုန်း သက်သာစေကာ တောင်သူ့အတွက်  များစွာ အကျိုးရှိစေမည် ဖြစ်ပါကြောင်း၊ ကွဲပြားသည့် မြေအမျိုးအစားအလိုက် မြေဩဇာ စတင်လိုအပ်သည့် အချိန် ကွာခြားခြင်း၊ ထည့်သွင်းလိုက်သည့်အာဟာရကို ထိန်းသိမ်းနိုင်မှုကွာခြားခြင်းအား တောင်သူများ စနစ်တကျသိရှိဆောင်ရွက်နိုင်ရန် ပညာရှင်များက နည်းပညာပေးကြရန် လိုကြောင်း၊ အလားတူ စပါးသီးနှံ အာဟာရဓာတ်ကို စီမံခန့်ခွဲမှု  သုတေသနများကို ဆန်းသစ် တီထွင် ဆောင်ရွက်မှုမှရရှိလာသည့် ပိုမိုအကျိုးရှိ ထိရောက်သည့် နည်းလမ်းများအား တောင်သူများထံ အချိန်နှင့်တစ်ပြေးညီဖြန့်ဝေရန်လိုအပ်ကြောင်း၊မူလစိုက်ပျိုးမြေ ၏လိုအပ်ချက် အလိုက် ယူရီးယား၊ တီစူပါ၊ ပိုတက် ထည့်သွင်းအသုံးပြုတတ်စေရေး၊ ပိုးသတ်ဆေးများ စနစ်တကျ အသုံးပြုလာစေရေးကိုလည်း သရုပ်ပြ ပညာပေး လေ့ကျင့်ပေးခြင်းဖြင့် စီးပွားရေးအရ ကုန်ကျ စရိတ်လျော့ချနိုင်မည်ဖြစ်သကဲ့သို့ မြေဩဇာအလွန်အကျွံ သုံးစွဲခြင်း၊ ပိုးသတ်ဆေး အလွန်အကျွံသုံးစွဲခြင်းကြောင့် ဖြစ်ပေါ်လာမည့် နောက် ဆက်တွဲ ဆိုးကျိုးများ ဖြစ်သည့် ဓာတ်ကြွင်းပမာဏမြင့်မားခြင်းကြောင့် သီးနှံများ ပို့ကုန်များ နိုင်ငံတကာမှ  ငြင်းပယ်ခံရခြင်း၊ ပြည်တွင်း ဈေး ကွက်မတည်ငြိမ်ခြင်း ပြသနာများကို လျော့ချဖြေရှင်းလာနိုင်မည်ဖြစ် ကြောင်း ပြောကြားသည်။  

ထို့နောက် စိုက်ပျိုးရေးဦးစီးဌာန မြေအသုံးချရေးဌာနခွဲ မှ ကျွမ်းကျင်ပညာရှင် ဒေါက်တာခင်ခင်ဝေ က အရွက်အရောင်တိုင်းကတ် (Leaf Color Chart; LCC) နည်းပညာ အသုံးပြု၍  စပါးသီးနှံ၏ လိုအပ်ချက်အလိုက် နိုက်ထရိုဂျင်စီမံခန့်ခွဲမှု၊ အရွက်အရောင်တိုင်းကတ် (Leaf Color Chart; LCC)အသုံးပြု၍ အာဟာရလိုအပ်ချိန် တိုင်းတာရာ တွင် လိုအပ်သည့် ပစ္စည်းများ၊ တိုင်း တာရမည့် အချိန်၊ အသုံးပြုပုံနှင့် အသုံးပြုရာတွင် သတိပြုရမည့် အချက် များ အားရှင်းလင်းပြသကြသည်။ 

ဆက်လက်၍ တောင်သူများအား အရွက်အရောင်တိုင်းကတ် အသုံးပြုပုံကို စိုက်ကွင်းအတွင်း လက်တွေ့တိုင်းတာသရုပ်ပြသကြသည်။

အဆိုပါကွင်းသရုပ်ပြပွဲသို့ စိုက် ပျိုးရေးဦးစီးဌာန မြေအသုံးချရေးဌာနခွဲ ညွှန်ကြားရေးမှူး၊ နေပြည်တော်ကောင်စီနယ်မြေစိုက်ပျိုးရေးဦးစီးဌာနမှူးနှင့် ခရိုင်ဦးစီးမှူးများ၊ ပုဗ္ဗသီရိမြို့နယ်နှင့် ဇေယျာသီရိမြို့နယ်တို့မှ စိုက်ပျိုးရေးဦးစီးမှူးများနှင့် ပညာပေးဝန်ထမ်းများ၊ တောင်သူများ တက်ရောက်ခဲ့ကြကြောင်း သတင်းရရှိသည်။

MOALI