မန္တလေးဈေးကွက်

ဆန်ဈေးကွက်

ရန်ကုန်ပေါ်ဆန်းမှာ လက်ကျန်နည်းခြင်း၊ တောင်သူထံမှ ဝယ်ရသော ပင်ရင်းဈေးမြင့်ခြင်းကြောင့် ယခင်လတစ်အိတ် ၁၆၀၀၀၀ ကျပ်မှ ၁၇၀၀၀၀ ကျပ်သို့ ဈေးမြင့် သွားပြီး ရွှေဘိုပေါ် ဆန်းမှာလည်း အဝင်ပုံမှန်ရှိခြင်း၊ အခါပြီး မြို့တွင်းစားသုံးရန် ဝယ်ယူမှုနည်းခြင်းတို့ကြောင့် တစ်အိတ် ၂၀၀၀၀၀ ကျပ်မှ ၁၉၅၀၀၀ ကျပ်သို့ ဈေးမသိမသာနိမ့်သွားသည်။ မနောသုခဆန်မှာ မိုးလက်ကျန်နည်းခြင်း၊ နွေစပါးစိုက်ထားဆဲ ဖြစ်ခြင်း၊ အဝင်ပုံမှန်ရှိခြင်း၊ မြို့တွင်းသုံး ဝယ်ယူမှုနည်းခြင်းကြောင့် တစ်အိတ် ၉၀၀၀၀ ကျပ်မှ ၉၅၀၀၀ ကျပ်သို့ ဈေးမသိမသာ မြင့်သွားသည်။ ဇီယာနှင့် ငစိန်ဆန်မှာ မိုး လက်ကျန်နည်းသွားခြင်းကြောင့် ပင်ရင်းဈေးမြင့်ခြင်း၊ မြို့တွင်းသုံးဝယ်ယူမှု နည်းခြင်းကြောင့် တစ်အိတ်လျှင် ဇီယာဆန်မှာ ၉၅၀၀၀ ကျပ်ဖြင့် ဈေးတည်ငြိမ်နေပြီး ငစိန်ဆန်မှာ ပင်ရင်းဈေး မြင့်ခြင်း၊ မုန့်လုပ်ငန်းသမားအဝယ်ပုံမှန်ရှိခြင်းကြောင့် တစ်အိတ် ၆၀၀၀၀ ကျပ်မှ ၆၅၀၀၀ ကျပ်သို့ ဈေးမသိမ သာ မြင့်သွားသည်။     ဧရာမင်းဆန်မှာ မန္တလေးဝန်းကျင်မှ ထွက်ရှိသော ဆန်ဖြစ်ခြင်း၊ အသစ်အဝင်များလာခြင်း၊ စားသုံးမှု ပုံမှန်ရှိခြင်းကြောင့် တစ်အိတ် ၁၅၅၀၀၀ ကျပ်ဖြင့် ဈေးတည်ငြိမ်နေသည်။ သယ်ယူပို့ဆောင်စရိတ်များအနေဖြင့် ရန်ကုန်မှ မန္တလေးသို့ ဆန်တစ်အိတ် ၉၀၀၀ ကျပ်၊ ရွှေဘိုမှ မန္တလေး ဆန်အိတ်အနည်းအများနှင့် ကားဂိတ်များ ကွာခြားမှုအလိုက် တစ်အိတ် ၇၀၀၀ ကျပ်၊ ၇၅၀၀ ကျပ် ဈေးထိ မသိမသာ မြင့်သွားသည်။

ဆီထွက်သီးနှံဈေးကွက်

မြေပဲ(လုံးဆန်) ဈေးနှုန်းမှာ ဆောင်းလက်ကျန်နည်းပြီး၊ မိုးစိုက်ရန်ပြင်ဆင်ချိန်ဖြစ်ခြင်းကြောင့် တောင်သူထံလက်ကျန်နည်း သဖြင့် ပင်ရင်းဈေးမြင့်ခြင်း၊ လုပ်ငန်းသမားအဝယ်ပုံမှန်ရှိခြင်းကြောင့် ၁၀၀ ပိဿာ ယခင်အပတ် ၁၁၇၀၀၀၀ ကျပ်မှ ၁၂၀၀၀၀၀ ကျပ်ထိ ဈေးမြင့်သွားသည်။ မြေပဲ(ဆီဆန်)မှာလည်း ဆောင်းလက်ကျန်တောင်သူထံမှ ပင်ရင်း ဈေးမြင့်ခြင်း၊ မိုးစိုက်ရန်ပြင်ဆင်ချိန်ဖြစ်ခြင်း၊ ဆီစက်သမားအဝယ်ပုံမှန်ရှိခြင်းကြောင့် ၁၀၀ ပိဿာ ယခင်အပတ် ၁၀၈၀၀၀၀ကျပ်မှ ယခုအပတ် ၁၁၇၀၀၀၀ ကျပ်သို့ ဈေးမြင့်သွားသည်။

နှမ်းမျိုးစုံဈေးနှုန်းများအနေဖြင့် နှမ်းဖြူမှာ နွေနှမ်းအသစ်များမဝင်သေးခြင်း၊ လက်ကျန်အဟောင်း အရည်အသွေးညံ့ခြင်း၊ မိုးရွာသွန်းမှုများ၍ လုပ်ငန်းသမားအဝယ်နည်းခြင်း၊ အရည်အသွေးညံ့သွားသဖြင့် တရုတ် ဝယ်လက်နည်းခြင်းတို့ကြောင့် ၄၅ ပိဿာ ယခင်အပတ် ၄၀၀၀၀၀ ကျပ်မှ ယခုအပတ် ၃၆၀၀၀၀ ကျပ်သို့ ဈေး နိမ့်သွားသည်။ နှမ်းညိုဈေးနှုန်းအနေဖြင့် မိုးနှမ်းအသစ်များဝင်ရောက်ခြင်းကြောင့် ဆီစက်သမားပုံမှန်ဝယ်ယူမှု ရှိသော်လည်း ၄၅ ပိဿာ ယခင်အပတ် ၄၀၀၀၀၀ ကျပ်မှ ၃၆၀၀၀၀ ကျပ်သို့ ဈေးနိမ့်သွားသည်။ နှမ်းနက်မှာ ဆောင်းနှမ်းအသစ် မဝင်သေးသဖြင့် လက်ကျန် အရည်အသွေးညံ့ပြီး အရောင်းအဝယ်အေးပြီး ဆောင်းနှမ်း (စမုံ) အသစ်ဝင်ရောက်ခြင်းကြောင့် ယခင်အပတ် ၄၅ ပိဿာ ၇၅၀၀၀၀ကျပ်မှ ယခုအပတ် ၆၃၀၀၀၀ ကျပ်သို့ ဈေးနိမ့် သွားသည်။ ပန်းနှမ်းဈေးနှုန်းအနေဖြင့် စိုက်ဧကနည်း၊ အထွက်နည်း၊ အဝင်နည်းခြင်း၊ ဘယဆေးသမားနှင့် ရောဆီသမားအဝယ်ပုံမှန်ရှိခြင်းကြောင့် ယခင်အပတ် ၄၅ ပိဿာ ၃၁၅၀၀၀ ကျပ်မှ ယခုအပတ် ၃၃၀၀၀၀ကျပ် ထိ ဈေးမြင့်သွားသည်။ ဆီနေကြာဈေးနှုန်းအနေဖြင့် အဝင်ပုံမှန်၊ ဆီစက်သမားအဝယ်ပုံမှန်ရှိခြင်းကြောင့် ၂၇ ပိဿာ ၂၂၀၀၀၀ ကျပ်ဖြင့် ဈေးတည်ငြိမ်နေသည်။

စားဖိုဆောင်သီးနှံဈေးကွက်

မန္တလေးကိုင်းတန်းဈေးတွင်း စားဖိုဆောင်သီးနှံများအနက် ငရုတ်ခြောက်(ရှည်)မှာ ကျောက်ဆည်နှင့် ဧရာဝတီတိုင်းဘက်မှ ဝင်ရောက်မှုရှိခြင်းကြောင့် ယခင်အပတ်တစ်ပိဿာ ၁၈၀၀၀ ကျပ်မှ ၁၆၀၀၀ ကျပ်သို့ ဈေးနိမ့်သွားပြီး ငရုတ်ခြောက်(လတ်)မှာ စစ်ကိုင်းနှင့် ဧရာဝတီတိုင်းမှ ဝင်ရောက်ပြီး အဝင်ပုံမှန်၊ မြို့တွင်းသုံး ပုံမှန်ရှိခြင်းကြောင့် တစ်ပိဿာ ၃၀၀၀၀ ကျပ်ဖြင့် ဈေးတည်ငြိမ်နေသည်။

ကြက်သွန်နီဈေးနှုန်းမှာ နယ်စုံမှ ဝင်ရောက်မှုရှိခြင်း၊ လမ်းပမ်းဆက်သွယ်ရေး အခြေအနေနှင့် ရာသီဥတု အခြေအနေကြောင့် အဝေးတင်ပို့ရမှုနည်းခြင်း၊ ကြက်သွန်နီ(ကြီး) တစ်ပိဿာ ၂၅၀၀ ကျပ်မှ ၂၂၀၀ ကျပ်သို့ ဈေး နိမ့်သွားပြီး မြို့တွင်းသုံးဝယ်ယူမှုပုံမှန်ရှိခြင်းကြောင့် (လတ်)တစ်ပိဿာ ၂၀၀၀ ကျပ်ဖြင့် ဈေးတည်ငြိမ်နေပြီး ကြက်သွန်နီ(သေး)မှာ မြို့တွင်းစားသုံးမှုပုံမှန်ရှိခြင်း၊ အဝင်များခြင်းကြောင့် တစ်ပိဿာ ၁၈၀၀ ကျပ်မှ ၁၅၀၀ ကျပ်သို့ ဈေးနိမ့်သွားသည်။ ကြက်သွန်ဖြူ(တရုတ်)မှာ လမ်းပန်းဆက်သွယ်ရေးကြောင့် အဝင်နည်းပြီး တစ်ပိဿာ ၁၅၀၀၀ ကျပ်ထိ ဈေးမြင့်သွားသည်။ ကြက်သွန်ဖြူ(ရှမ်း)များ ဝင်ရောက်မှုရှိပြီး အရည်အသွေးပေါ် မူတည်၍ တစ်ပိဿာ ၆၀၀၀ ကျပ်မှ ၉၀၀၀ ထိ ဈေးအမျိုးမျိုးဖြင့် ရောင်းချမှုရှိသည်။ ရွှေဘိုဘက်မှ ကြက်သွန်ဖြူ (မြန်မာ)များလည်း ဝင်ရောက်ပြီး အရည်အသွေးကောင်းသောကြောင့် တစ်ပိဿာ ၈၀၀၀ ကျပ်ဖြင့် ဈေးတည် ငြိမ်နေသည်။

အောင်ပန်းအာလူးတစ်မျိုးသာ အဝင်များနေပြီး အိုကေတစ်ပိဿာ ၂၇၀၀ ကျပ်၊ အေဝမ်းတစ်ပိဿာ ၂၅၀၀ ကျပ်၊ ဆွဲတစ်ပိဿာ ၂၀၀၀ ကျပ်ဖြင့် မြို့တွင်းစားသုံးမှု ပုံမှန်ရှိနေသည်။

ပဲမျိုးစုံဈေးကွက်အခြေအနေ

မတ်ပဲဈေးနှုန်းအနေဖြင့် ကျောက်ရစ်ပဲအ သစ်များ ဝင်ရောက်မှုရှိခြင်း၊ ရန်ကုန်ဝယ်လက်နည်းခြင်းကြောင့် ယခင်အပတ် ၂၈၈၀၀၀ ကျပ်မှ ယခုအပတ် ၂၈၄၀၀၀ ကျပ်သို့ ဈေးနိမ့်သွားသည်။

ပဲတီစိမ်း(အညာ)မှာ မိုးစိုက်စတင်စပြု၍ မျိုးအတွက် ဝယ်ယူမှုရှိခြင်း၊ လက်ကျန်နည်းခြင်း၊ တရုတ် ဝယ်လက်နည်းခြင်းကြောင့် ယခင်အပတ် ၃ တင်းတစ်အိတ် ၄၃၅၀၀၀ ကျပ်မှ ၃၇၈၀၀၀ ကျပ်သို့ ဈေးနိမ့်သွားသည်။ 

ပဲစဉ်းငုံ(ဖြူ/နီ)တို့မှာ ပဲခွဲစက်နှင့် ရန်ကုန်ဝယ်လက်ပုံမှန်ဝယ်ယူမှုရှိခြင်း၊ အဝင်ပုံမှန်ရှိခြင်းကြောင့် ၃ တင်းတစ်အိတ် ၂၈၃၀၀၀ ကျပ်ဖြင့် ဈေးတည်ငြိမ်နေသည်။ ပဲစဉ်းငုံ(ဖြူ)မှာ ပဲခွဲစက်များ အဝယ်နည်းခြင်း ကြောင့် ယခင်အပတ် ၂၅၀၀၀၀ ကျပ်မှ ၂၄၈၀၀၀ကျပ်သို့ ဈေးမသိမသာနိမ့်သွားသည်။

ပဲပုတ်(ရှမ်း/မြန်မာ)တို့အနက် ပဲပုတ်(မြန်မာ)မှာ အဝင်ပုံမှန် လုပ်ငန်းသမားအဝယ်ပုံမှန်ရှိခြင်းကြောင့် ၃ တင်းတစ်အိတ် ၄၂၅၀၀၀ ကျပ်ဖြင့် ဈေးတည်ငြိမ်နေသည်။ ပဲပုတ်(ရှမ်း)မှာ မိုးမိတ်၊ မိုးညှင်းတို့မှ ဝင်ရောက်ပြီး မိုးမိတ် ၃ တင်းတစ်အိတ် ၄၂၀၀၀၀ ကျပ် မိုးညှင်း ၄၃၀၀၀၀ကျပ်ဖြင့် ဈေးတည်ငြိမ်ကာ ဆီစက်သမားများ ပုံမှန်ဝယ်ယူနေသည်။ ကုလားပဲဈေးနှုန်းများအနေဖြင့် ကုလားပဲ(လုံးဖြူကြီး)မှာ အသစ်များ ဝင်ရောက်မှုရှိခြင်း၊ လုပ်ငန်းသမားအဝယ်နည်းခြင်းကြောင့် ၃ တင်းတစ်အိတ် ၂၃၀၀၀၀ကျပ်မှ ၂၂၅၀၀၀ ကျပ်သို့ ဈေးနိမ့်သွားပြီး ကုလားပဲ(လုံးဝါကြီး)မှာလည်း အသစ်ဝင်ရောက်ခြင်း၊ ပဲခွဲစက်များအဝယ်နည်းခြင်းကြောင့် ၃ တင်းတစ်အိတ် ၂၁၇၀၀၀ ကျပ်မှ ၂၁၃၀၀၀ ကျပ်သို့ ဈေးနိမ့်သွားသည်။ ကုလားပဲ(ခွဲခြမ်း)မှာ အဝင်ပုံမှန်၊ မြို့တွင်းသုံးပုံမှန်ရှိခြင်း ကြောင့် တစ်ပိဿာ ၅၆၅၀ ကျပ်ဖြင့် ဈေး
တည်ငြိမ်နေသည်။

ပဲယင်း၊ မြေတောက်ပဲ၊ စားတော်ပဲ ဈေးနှုန်းများမှာ ပဲယင်းကြီးမှာ အသစ်ဝင်ရောက်မှုရှိခြင်း၊ ပဲခွဲစက်များ အဝယ်နည်းခြင်းကြောင့် ၃ တင်းတစ်အိတ် ယခင်အပတ် ၂၄၀၀၀၀ ကျပ်မှ ၂၃၅၀၀၀ ကျပ်သို့ ဈေးနိမ့်သွားသည်။ မြေတောက်ပဲမှာ မုံရွာနှင့်အညာဘက်မှ အသစ်များဝင်ရောက်ခြင်း၊ လုပ်ငန်းသမား ပဲကြော်/လှော်သမားအဝယ် ပုံမှန်ရှိခြင်းကြောင့် ၃ တင်းတစ်အိတ် မုံရွာ(သစ်) အရည်အသွေးအကောင်းဆုံး ၃၀၀၀၀၀ ကျပ်၊ အညာအသစ် ၃၂၀၀၀၀ ကျပ်ဖြင့် ရောင်းဝယ်နေသည်။ စားတော်ပဲ(ကျွန်း)မှာ လက်လီသမား အဝယ်နည်းခြင်း၊ အသစ်ဝင် ရောက်မှုရှိခြင်းကြောင့် ယခင်အပတ် ၆၃၀၀၀၀ ကျပ်မှ ယခုအပတ် ၅၈၀၀၀၀ ကျပ်၊ ထိပ်စ ၆၀၀၀၀၀ ကျပ်ဖြင့် ရောင်းဝယ်နေသည်။

ပဲကြီး(ကြီး/သေး)၊ ထောပတ်ပဲ(ကြီး/သေး)တို့မှာ ကျောက်တွင်းဘက်မှ အသစ်များဝင်ရောက်ခြင်း၊ အရည်အသွေးကောင်းခြင်း၊ ရန်ကုန်ဝယ်လက်အနည်းငယ်ရှိခြင်း၊ ပဲကြော်/လှော်လုပ်ငန်းသမားအဝယ်ရှိခြင်း ကြောင့် ပဲကြီး(ကြီး) ၃တင်းတစ်အိတ် ၅၈၀၀၀၀ ကျပ်၊ ပဲကြီး(သေး)မှာ လှောင်သမား လက်လီသမားအဝယ်များ ခြင်း၊ အရည်အသွေးကောင်းခြင်းကြောင့် ယခင်အပတ် ၅၀၀၀၀၀ ကျပ်မှ ၅၃၀၀၀၀ ကျပ်သို့ ဈေးမြင့်သွားသည်။

ထောပတ်ပဲ(ကြီး/သေး)တို့မှာ မိုးစိုက်ပြင်ဆင်ချိန်ဖြစ်၍ ဆောင်းလက်ကျန်နည်းသော်လည်း လုပ်ငန်းသမား လက်လီသမားအဝယ်နည်းခြင်းကြောင့် ထောပတ်ပဲ(ကြီး) ၃ တင်းတစ်အိတ် ၃၄၀၀၀၀ ကျပ်မှ ၃၂၀၀၀၀ ကျပ်၊ ထောပတ်ပဲ(သေး) ၂၄၀၀၀၀ ကျပ်မှ ၁၇၅၀၀၀ ကျပ်သို့ ဈေးနိမ့်သွားသည်။

ပဲလွန်(ဖြူ/ပြာ) အသစ်ဝင်ရောက်မှုရှိသော်လည်း အရောင်းအဝယ်အေးပြီး လက်လီသမားအဝယ်သာရှိ ခြင်းကြောင့် ပဲလွန်းဖြူ ၃ တင်းတစ်အိတ် ၂၃၈၀၀၀ ကျပ်၊ ပဲလွန်းပြာတစ်အိတ် ၁၆၇၀၀၀ ကျပ်ဖြင့် ဈေးတည်ငြိမ်နေသည်။

ဟင်းသီး/ရွက်နှင့် သစ်သီးဝလံဈေးကွက်

ခရမ်းချဉ်(ရှမ်းတောင်)များ ဝင်ရောက်မှုရှိခြင်း၊ တရုတ်(တိုင်ပေ)ခရမ်းချဉ်များ ရာသီကုန်သွားခြင်း၊ အရည်အသွေးကောင်းခြင်းကြောင့် ၂၀ ပိဿာ တစ်သေတ္တာ ၅၀၀၀၀ ကျပ် ဖြင့် မြို့တွင်းသုံးစွဲမှုများပြီး လမ်းပမ်းဆက်သွယ်ရေးကြောင့် အဝေးတင်ပို့ရမှုနည်းနေသည်။ ငရုတ်စို(ရှည်)မှာ မုံရွာ၊ ချောင်းဦး၊ ရွှေဘိုမှ ဝင်ရောက်ပြီး မိုးများသဖြင့် ခူးဆွတ်မှုနည်း၊ အဝင်နည်းခြင်းကြောင့် ငါးပိထောင်း၊ လက်ဖက်သမားများ အဝယ်ပုံမှန်ရှိသော်လည်း ငရုတ်စို(ရှည်) တစ်ပိဿာ ၁၁၀၀၀ ကျပ်၊ ငရုတ်စို(လတ်) တစ်ပိဿာ ၁၅၀၀၀ ကျပ်ထိ ဈေးများစွာ မြင့်နေသည်။

မုံရွာ၊ ချောင်းဦးမှ ဖရဲသီးများ အဝင်နည်းခြင်းကြောင့် တစ်လုံး ၅၀၀၀ ကျပ်၊ ပန်းသီး ၆၅ လုံးပါတစ်ဖာ ၂၀၀၀၀၀ ကျပ်၊ အော်ဂင်လိမ္မော် ၁၁ ပိဿာပါတစ်ခြင်း ၁၇၀၀၀၀ ကျပ်၊ ရမည်းသင်းစပျစ်သီး အရည်အသွေးပေါ်မူတည်၍ တစ်ပိဿာ ၁၂၀၀၀ ကျပ်မှ ၁၈၀၀၀ ကျပ်၊ သီပေါ၊ ပြင်ဦးလွင်မှ ပျားနာနတ်တစ်လုံး ၅၀၀၀ ကျပ်ဖြင့် လမ်းပန်းဆက်သွယ်ရေးအခြေအနေပေါ်မူတည်၍ မင်းဘူး၊ ဖားအံ့၊ ကောလင်း၊ ဝန်းသို၊ မိုးကုတ်၊ မြစ်ကြီးနား၊ အောင်လံ၊ မူဆယ်သို့ အမှာများတင်ပို့မှုနှင့် မြို့တွင်းသစ်သီးဆိုင်များ ဝယ်ယူမှုရှိသည်။

ဂျုံနှင့် အစေ့ထုတ်ပြောင်းဈေးကွက်

ဂျုံဈေးနှုန်းအနေဖြင့် ငါန်းဇွန်း၊ မြို့သာ၊ မြင်းမူ၊ မြောင်၊ ဆားတောင်၊ ဘုတလင်၊ မုံရွာ ဂျုံများ၊ ဂျုံစက်များ ပုံမှန်ဝယ်ယူမှုရှိခြင်း၊ အဝင်ပုံမှန်ရှိခြင်းကြောင့် ၂၃၀၀၀၀ ကျပ်ဖြင့် ဈေးတည်ငြိမ်နေသည်။ ရှမ်းဂျုံများအဝင်နည်းသွားခြင်းကြောင့် အရည်အသွေးပေါ်မူတည်၍ ၁၇၅၀၀၀ ကျပ်မှ ၁၉၀၀၀၀ ကျပ်ထိ ဈေးအမျိုးမျိုးဖြင့် ရောင်းဝယ်နေသည်။ ကလေးဂျုံ ၃ တင်းတစ်အိတ် ၁၈၀၀၀၀ ကျပ် အထွက်တိုးဂျုံ အရည်အသွေးပေါ်မူတည်၍ ၁၈၀၀၀၀ ကျပ်မှ ၁၉၀၀၀၀ ကျပ်၊ ဩစတေးလျဂျုံ ဖွဲတစ်ပိဿာ ၃၇၅၀ ကျပ်ဖြင့် မုန့်လုပ်ငန်းသမားများ ဝယ်ယူမှုများသည်။

အစေ့ထုတ်ပြောင်းဈေးနှုန်းအနေဖြင့် အသစ်များအဝင်နည်းသွားခြင်း၊ ထွက်ရှိရာဒေသသို့ တိုက်ရိုက်ဆင်း ဝယ်ယူမှုရှိခြင်းကြောင့် ပစ္စည်းကောင်းရှားခြင်း၊ အစာစပ်သမား ပုံမှန်ဝယ်ယူမှုရှိခြင်းကြောင့် ၃ တင်းတစ်အိတ် ယခင်အပတ် ၈၁၀၀၀ ကျပ်မှ ၈၄၀၀၀ ကျပ်သို့ ဈေးမြင့်သွားသည်။

ခင်မေကြည်