ရန်ကုန်ဈေးကွက်

(၂၅-၄-၂၀၂၆ ရက်နေ့ ကောက်ယူဈေးနှုန်းများဖြစ်ပါသည်။)

ဆန်စပါးဈေးကွက်

ယခုရက်သတ္တပတ်အတွင်း ဆန်စပါးကုန်စည်ဒိုင် (ဝါးတန်းလမ်း) တွင် ထုတ်ပြန်သော ဆန်ဈေးနှုန်းများအရ ရွှေဘိုပေါ်ဆန်းဆန် အလတ်စ တစ်တင်းခွဲတစ်အိတ်လျှင် ၁၉၅၀၀၀ ကျပ်နှုန်းနှင့် အောက်စ တစ်အိတ်လျှင် ၁၉၀၀၀၀ ကျပ်နှုန်းဖြင့်လည်းကောင်း၊ ဖျာပုံပေါ်ဆန်းဆန် အလတ်စ တစ်တင်းခွဲတစ်အိတ်လျှင် ၁၃၅၀၀၀ ကျပ်နှုန်းနှင့် အောက်စ တစ်အိတ်လျှင် ၁၃၀၀၀ဝ ကျပ်နှုန်းဖြင့် လည်းကောင်း၊ ဇီယာဆန် အလတ်စ တစ်တင်းခွဲတစ်အိတ်လျှင် ၅၉၀၀၀ ကျပ်နှုန်းနှင့် အောက်စ တစ်အိတ်လျှင် ၅၇၀၀၀ ကျပ်နှုန်းဖြင့်လည်းကောင်း၊ ဧည့်မထဆန်ကြမ်း(၁၅ ရာခိုင်နှုန်း) အလတ်စ တစ်တင်းခွဲတစ်အိတ်လျှင် ၅၉၀၀၀ ကျပ်နှုန်းနှင့် အောက်စ တစ်အိတ်လျှင် ၅၇၀၀၀ ကျပ်နှုန်း ဖြင့်လည်းကောင်း၊ ငစိန်ဆန် အလတ်စ တစ်တင်းခွဲတစ်အိတ်လျှင် ၅၆၅၀၀ ကျပ်နှုန်းနှင့် အောက်စ တစ်အိတ်လျှင် ၅၅၀၀၀ ကျပ်နှုန်းဖြင့်လည်းကောင်း ရောင်းဝယ်လျက်ရှိကြောင်း သိရှိရသည်။ သင်္ကြန် ပိတ်ရက်များ မတိုင်မီ ဈေးနှုန်းများနှင့် နှိုင်းယှဉ်ပါက ရွှေဘိုပေါ်ဆန်းဆန်ဈေးနှုန်း ပြောင်းလဲမှု မရှိသော်လည်း ကျန်ဆန်အမျိုးအစားများအားလုံး ဆန်တစ်အိတ်လျှင် ၁၀၀၀ ကျပ်မှ ၅၀၀၀ ကျပ် အထိ ဈေးမြင့်လျက်ရှိသည်။ အရှေ့အလယ်ပိုင်း ပဋိပက္ခများကြောင့် ကုန်တင်သင်္ဘောခနှင့် စက်သုံးဆီ ဈေးများ မြင့်ခဲ့ခြင်း၊ ရူပီးဈေးနှင့်ဘတ်ငွေဈေးနှုန်းများ ဈေးမြင့်လာခြင်းတို့ ဖြစ်ပေါ်ခဲ့ပြီး အိမ်နီးချင်း နိုင်ငံများ၏ ပြည်ပပို့ဆန်ဈေးနှုန်းများ ဈေးမြင့်လာခဲ့သည်။  ထို့အတူ မြန်မာပြည်ပပို့ဆန်နှင့် ဆန်ကွဲများအား ဈေးမြင့်စေခဲ့သည်။ ပြည်တွင်း၌လည်း စက်သုံးဆီနှင့် လောင်စာဆီ အခက်အခဲများကြောင့် စိုက်ပျိုးထုတ်လုပ်မှုစရိတ်နှင့် သယ်ယူပို့ဆောင်စရိတ်များ ဈေးမြင့်ကာ ဆန်ဈေးနှုန်းများအား ဈေးမြင့် စေခဲ့သည်။ ဆန်သစ်များမှာလည်း သင်္ကြန်ကာလနောက်ပိုင်းတွင် အစိုဓာတ်များ လျော့နည်းပြီး ခြောက်သွေ့လာခြင်းကြောင့် လှောင်လက်များ ဆန်ဝယ်ယူချိန်ဖြစ်ခြင်းကြောင့်လည်းကောင်း ပြည်တွင်း သုံးစွဲမှုများသော ဆန်ချော၊ ဆန်ကြမ်းများအားလုံး  သင်္ကြန်မတိုင်မီ ကာလများထက် သိသာစွာ ဈေးမြင့်လာခဲ့ခြင်းဖြစ်သည်။ ပြည်ပပို့ဆန်ဈေးကွက်တွင်လည်း ကမ္ဘာ့ရေနံဈေးမြင့်တက်နေခြင်း၊ နိုင်ငံတကာရွှေဈေး မတည် ငြိမ်ခြင်း၊ပြည်ပငွေလဲလှယ်နှုန်းများလှုပ်ခတ်မှုများနေခြင်းတို့ကြောင့်ကုန်စည်ဝယ်လက်များမှစောင့်ကြည့်မှုများကာ  အရောင်းအဝယ်အေးလျက်ရှိကြောင်း သိရသည်။ ရန်ကုန်ဈေးကွက်သို့ ဖျာပုံ၊ မော်ကျွန်း၊ ဟင်္သာတ၊ လပွတ္တာ၊ ကွမ်းခြံကုန်း၊ ဒေးဒရဲ၊ ကော့မှူး၊ တွံတေး၊ ဝါးခယ်မ၊ မြောင်းမြ၊ ကျိုက်လတ်၊ ရွှေဘိုဒေသများမှ ဆန်ဝင်ရောက်မှုရှိခဲ့ကြောင်း သိရသည်။

အစေ့ထုတ်ပြောင်းဈေးကွက်

အစေ့ထုတ်ပြောင်းများအား ထိုင်းနိုင်ငံသို့ သွင်းကုန်ခွန်ကင်းလွတ် ခွင့်ဖြင့် တင်ပို့နိုင်သော ကာလတိုတောင်းခြင်း၊ မြဝတီနယ်စပ်ဂိတ်များ ပြန်လည်ဖွင့်လှစ်ချိန်ဖြစ်ခြင်း၊ ထိုင်းနိုင်ငံသို့ တင်ပို့ မည့် ပြောင်းများအတွက်  မီးခိုးမြူကင်းစင်ကြောင်း ထောက်ခံချက်များ စိစစ်ခွင့်ပြုထုတ်ပေးလျက်ရှိခြင်း တို့ ကြောင့် အစေ့ထုတ်ပြောင်းများအား ပုံမှန်တင်ပို့မှုရှိခြင်း၊ သယ်ယူပို့ဆောင်စရိတ်များ စျေးမြင့်လာခြင်းနှင့် ကုန်သည်ဝယ်လက်များက စျေးမြှင့်ပေးကာ မြိုင်မြိုင်ဆိုင်ဆိုင် ဝယ်ယူမှုများရှိလာခဲ့ခြင်းတို့ကြောင့်  အစေ့ထုတ်ပြောင်း စျေးနှုန်းများမှာ သင်္ကြန်ကာလ မတိုင်မီက စျေးနှုန်းများထက် ထပ်မံစျေးမြင့် လာခဲ့ခြင်း ဖြစ်သည်။ အစေ့ထုတ်ပြောင်း ၅၄ ပိဿာလျှင် သင်္ကြန်ပိတ်ရက် မတိုင်မီ ပျမ်းမျှစျေးနှုန်းမှာ ၈၉၆၄၀ ကျပ် ဖြစ်ပြီး၊ ယခုအပတ် စျေးနှုန်းမှာ ၉၁၂၆၀ ကျပ်သို့ ရောက်ရှိ စျေးမြင့်ခဲ့ခြင်း ဖြစ်သည်။

ပဲမျိုးစုံဈေးကွက်

ပဲမျိုးစုံ အဓိကဝယ်လက်ဖြစ်သော အိန္ဒိယနိုင်ငံတွင် ရာသီအလိုက်ပဲစားသုံးမှု နည်းလာသော ကာလဖြစ်ခြင်း၊ ဟိုတယ်၊ စားသောက်ဆိုင်နှင့် ကန်တင်းများတွင် လောင်စာ ဓာတ်ငွေ့ပြတ်တောက်မှုများ ရှိခဲ့ခြင်းကြောင့် အရောင်းအဝယ်အေးခြင်း၊ ဆောင်းစိုက် ပဲများလည်း ပုံမှန်ဝင်ရောက်မှုရှိနေသေးခြင်း တို့ကြောင့် သင်္ကြန်ပိတ်ရက်များအပြီးတွင် မြန်မာမတ်ပဲ၊ ပဲစင်းငုံများ ရောင်းလိုအား များခြင်း၊ ကမ္ဘာ့နိုင်ငံရေး အခင်းအကျင်းများနှင့်ကမ္ဘာ့ရေနံဈေးနှုန်းများကြောင့် ပြည်ပငွေလဲနှုန်းများ အလှုပ်အခတ် များနေခြင်း   စသည့်အခြေအနေများကြောင့်လည်းကောင်း  သင်္ကြန်ပိတ်ရက်များမတိုင်မီ ဈေးနှုန်းများနှင့် နှိုင်းယှဉ်ပါက မတ်ပဲ (သင်္ဘောတင်) နှင့် ပဲစင်းငုံ (သင်္ဘောတင် ) ဈေးနှုန်းများမှာ ယခုရက်သတ္တပတ်တွင် ဈေးနိမ့်လျက်ရှိသည်။ မတ်ပဲ (သင်္ဘောတင်) တစ်တန်လျှင် သင်္ကြန်ပိတ်ရက်များ မတိုင်မီဈေးနှုန်းမှာ ၃၁၆၁၀၀၀ ကျပ်ဖြစ်ပြီး ယခုအပတ်ဈေးနှုန်းမှာ ၃၁၂၅၀၀၀ ကျပ်ဖြစ်သည်။ ပဲစင်းငုံ (သင်္ဘောတင် ) တစ်တန်လျှင် သင်္ကြန်ပိတ်ရက်များ မတိုင်မီဈေးနှုန်းမှာ ၃၁၅၀၀၀ဝ ကျပ်ဖြစ်ပြီး ယခုအပတ်ဈေးနှုန်းမှာ ၃၁၀၅၀၀၀ ကျပ်ဖြစ်သည်။ ယခုရက်သတ္တပတ်အတွင်း ကုန်စည်ဒိုင်ဖွင့်ရက် ၆ ရက်ရှိခဲ့ပြီး မတ်ပဲ (သင်္ဘောတင်) မှာ ကုန်သေတ္တာ ၁၁၀ လုံး နှင့် ပဲစင်းငုံ (သင်္ဘောတင်) မှာ ကုန်သေတ္တာ ၁၀ လုံး ခန့် အရောင်းအဝယ်ဖြစ်ခဲ့ကြောင်းသိရသည်။ ပဲတီရွှေဝါနှင့် ထောပတ်ပဲမှာ  အရည်အသွေးကောင်းသော် လည်း အရောင်းအဝယ် အေးနေခြင်းကြောင့် သင်္ကြန်ကာလမတိုင်မီ ဈေးနှုန်းများအတိုင်းရှိခဲ့သည်။ ပဲတီရွှေဝါ ၃ တင်း / ၆၀ ပိဿာလျှင် ယခုအပတ် ပျမ်းမျှဈေးနှုန်းမှာ ၄၀၀၅၀၀ ကျပ်ဖြစ်ပြီး ထောပတ်ပဲ ၃ တင်း / ၆၀ ပိဿာလျှင် ပျမ်းမျှဈေးနှုန်းမှာ ၂၆၃၁၀ဝ ကျပ်ဖြစ်သည်။ ပဲလွမ်းဖြူနှင့်ကုလားပဲမှာ နှစ်သစ်ကူးပိတ်ရက်များအပြီးတွင် ဝယ်လိုအား ကျဆင်းကာ ပုံမှန်စားသုံးမှုသာရှိခြင်းကြောင့် ယခုရက် သတ္တပတ်အတွင်း ဈေးနိမ့်ခဲ့ခြင်း ဖြစ်သည်။ ပဲလွမ်းဖြူ ၃ တင်း / ၆၀ ပိဿာလျှင် နှစ်သစ်ကူးပိတ်ရက်များ မတိုင်မီ ဈေးနှုန်းမှာ ၂၃၆၅၅၀ ကျပ်ဖြစ်ပြီး ယခုအပတ်ဈေးနှုန်းမှာ ၂၃၅၀၅၀ ကျပ်သို့ ရောက်ရှိဈေးနိမ့် ခဲ့သည်။ ကုလားပဲမှာ နှစ်သစ်ကူးပိတ်ရက်များ မတိုင်မီက တစ်ပိဿာလျှင် ပျမ်းမျှဈေးနှုန်း ၄၂၅၈ ကျပ်ဖြစ်ပြီး ယခုအပတ်ဈေးနှုန်းမှာ ၄၁၇၀ ကျပ်သို့ ရောက်ရှိဈေးနိမ့်ခဲ့သည်။ ပဲပုပ်ပဲမှာ ပြည်တွင်း လုပ်ငန်းသုံးရန် ဝယ်လိုအားများခြင်းကြောင့်လည်းကောင်း၊ ဘိုကိတ်ပဲမှာ ဈေးကွက်သို့ ပဲအဝင်နည်း လာချိန် ဖြစ်ခြင်းကြောင့်လည်းကောင်း၊ သင်္ကြန်မတိုင်မီဈေးနှုန်းများထက် ဈေးမြင့်ခဲ့သည်။ ပဲပုပ်ပဲ ၃ တင်း / ၆၀ ပိဿာလျှင် သင်္ကြန်မတိုင်မီဈေးနှုန်းမှာ ၄၉၇၄၀၀ ကျပ်ဖြစ်ပြီး ယခုအပတ်ဈေးနှုန်းမှာ ၄၉၉၉၅၀ ကျပ်သို့ ရောက်ရှိဈေးမြင့်ခဲ့သည်။ ဘိုကိတ်ပဲ ၃ တင်း / ၆၀ ပိဿာလျှင် သင်္ကြန်မတိုင်မီ ပျမ်းမျှဈေးနှုန်းမှာ ၂၁၇၅၀၀ ကျပ်ဖြစ်ပြီး ယခုအပတ်ဈေးနှုန်းမှာ ၂၁၉၉၀၀ ကျပ်သို့ ရောက်ရှိဈေးမြင့် ခဲ့သည်။

စားသုံးဆီဈေးကွက်

ကမ္ဘာ့စားအုန်းဆီအများဆုံးထုတ်လုပ်သော အင်ဒိုနီးရှားနိုင်ငံနှင့် မလေးရှားနိုင်ငံများတွင် စားအုန်းဆီ ထုတ်လုပ်မှု လျော့ကျသောကာလဖြစ်ခြင်း၊ ပို့ကုန်အခွန် တိုးမြှင့်ထားခြင်း၊ လောင်စာဆီ အဖြစ် ရောနှောသုံးစွဲမှုရှိခြင်း၊ ပြည်တွင်းလက်ကျန်နည်းလာခြင်း၊ နိုင်ငံတကာကုန်သွယ်ရေးလုပ်ငန်း များတွင် လောင်စာဆီ အကျပ်အတည်းများအပေါ် စိုးရိမ်မှုများ မြင့်တက်နေချိန်ဖြစ်ခြင်းစသည့် အခြေ အနေများကြောင့် စားအုန်းဆီ တင်သွင်းရသော ဈေးနှုန်းများအား ထပ်မံမြင့်တက်စေခဲ့သည်။ထို့ကြောင့် ကမ္ဘာ့စားအုန်းဆီ ထုတ်လုပ်တင်ပို့သော နိုင်ငံများတွင် ဖြစ်ပေါ်လျက်ရှိသော ဈေးကွက်ဈေးနှုန်းများ အပေါ် အခြေခံ၍ စားအုန်းဆီ တင်သွင်း သိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီ၏ ၂၀၂၆ ခုနှစ်၊ ဧပြီ ၂၄ ရက်မှ ၃၀ ရက်အထိ ကုန်ဆုံးသော ကာလအတွက် ထုတ်ပြန်ထားသော ရန်ကုန်အထိုင် လက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင် ၇၂၈၅ ကျပ် ဖြစ်သည်။ ယခင်အပတ် ဈေးနှုန်းနှင့် နှိုင်းယှဉ်ပါက စားအုန်းဆီတစ်ပိဿာလျှင် ၃၀၀ ကျပ်နှုန်း ဈေးမြင့်လာခဲ့ခြင်း ဖြစ်သည်။ ၂၀၂၅ ခုနှစ်ကုန်ပိုင်းမှစ၍ စားအုန်းဆီရည်ညွှန်းဈေးနှုန်းများ ဆက်တိုက်မြင့်တက်လာနေခြင်းလည်း ဖြစ်သည်။ ပြင်ပလက်လီဈေးကွက်တွင် သတ်မှတ်ထားသော ဆီဆိုင်အချို့၌ ရည်ညွှန်းဈေးနှုန်းထက် များစွာမကွာသော ဈေးနှုန်းများဖြင့် တစ်အိမ်ထောင်လျှင် ၅၀ ကျပ်သားနှုန်း ရောင်းချပေးလျက်ရှိသည်။ အချို့သောမြို့နယ်များတွင် စားအုန်းဆီတစ်ပိဿာ၏ ပြင်ပဈေးနှုန်းမှာ ၁၂၀၀၀ ကျပ် ဝန်းကျင်ဖြစ်သည်။

အေးသန္တာဝင်း