မန္တလေးဈေးကွက်
ဆန်ဈေးကွက်
ဧရာဝတီတိုင်းမှ ဖျာပုံပေါ်ဆန်းများ၊ ရန်ကုန်ဈေးကွက်မှတစ်ဆင့် ကားဖြင့် ဝင်ရောက်ပြီး အဟောင်းလက်ကျန်မရှိတော့ခြင်း၊ မြို့တွင်းစားသုံးမှုနည်းခြင်းကြောင့် တစ်အိတ် ၁၄၀၀၀၀ ကျပ်ဖြင့် ဈေးတည်ငြိမ်နေသည်။ ရွှေဘိုပေါ်ဆန်းမှာလည်း အသစ်တစ်မျိုးတည်းသာ တွေ့ရပြီး စားသုံးမှုပုံမှန် ဖြစ်ခြင်းကြောင့် ၁၈၀၀၀၀ကျပ်မှ ၁၈၂၀၀၀ကျပ်သို့ ဈေးမသိမသာမြင့်သွားသည်။ မနောသုခဆန်မှာအသစ်များ ဝင်ရောက်ခြင်း၊ မြို့တွင်းစားသုံးမှုပုံမှန်ရှိခြင်းကြောင့် တစ်အိတ် ၆၅၀၀၀ကျပ်ဖြင့် ဈေးတည်ငြိမ်နေပြီး အဟောင်းမှာ လက်ကျန်နည်း၊ ပစ္စည်းရှားခြင်းကြောင့် တစ်အိတ် ၉၅၀၀၀ကျပ်ထိ ဈေးမြင့်နေသည်။ ဇီယာနှင့်ငစိန်မှာ ရန်ကုန်ဈေးကွက်မှတစ်ဆင့်ဝင်ရောက်ခြင်း အသစ်အဝင်နည်းသွားခြင်း ပင်ရင်းဈေး မြင့်ခြင်းကြောင့် တစ်အိတ် ၇၀၀၀၀ ကျပ်မှ ၈၀၀၀၀ကျပ်သို့ ဈေးမြင့်သွားပြီး ငစိန်ဆန်မှာ အသစ်အဝင်ပုံမှန်၊ လုပ်ငန်းသမားအဝယ်ပုံမှန်ရှိခြင်းကြောင့် တစ်အိတ် ၅၀၀၀၀ကျပ်မှ ၅၅၀၀၀ ကျပ်သို့ ဈေးမြင့်သွားသည်။ ဧရာမင်းဆန်မှာ အဝင်ပုံမှန်၊ မြို့တွင်းစားသုံးမှုနှင့် မန္တလေးဝန်းကျင်မှ အဝယ်ပုံမှန်ရှိခြင်းကြောင့် အသစ်တစ်အိတ် ၁၄၅၀၀၀ ကျပ်၊ အဟောင်းတစ်အိတ် ၁၆၀၀၀၀ ကျပ်ဖြင့် ဈေးငြိမ်နေသည်။
ဆီထွက်သီးနှံနှင့် ဆီဈေးကွက်
မြေပဲ (လုံးဆန်)မှာ မြင်းမူဘက်မှ အဝင်နည်းခြင်း၊ လုပ်ငန်းသမား ပဲကြော်/လှော်သမား အဝယ်များခြင်းကြောင့် ယခင်အပတ်အရည်အသွေးအကောင်းဆုံး ၁၀၂၀၀၀၀ကျပ်မှ ယခုအပတ် အရည် အသွေးအကောင်းဆုံး ၁၁၀၀၀၀၀ကျပ်သို့ ဈေးမြင့်သွားပြီး မြေပဲ (ဆီဆန်)မှာ အဝင်နည်းသွားခြင်း၊ ဆီစက်သမားအဝယ်ပုံမှန်ရှိခြင်းကြောင့် ၁၀၀ပိဿာ ယခင်အပတ် ၉၂၅၀၀၀ ကျပ်မှ ၁၀၃၀၀၀၀ကျပ်သို့ ဈေးမြင့်သွားသည်။ ဆောင်းနှမ်း၊ အဝင်နည်းသွားသော်လည်း တရုတ်ဝယ်လက်နည်းခြင်း လုပ်ငန်းသမား အဝယ်နည်းခြင်းကြောင့် နှမ်းဖြူ ၄၅ပိဿာ ၃၅၀၀၀၀ကျပ်ဖြင့် ဈေးတည်ငြိမ်နေပြီး နှမ်းညိုမှာ အဝင်ပုံမှန်၊ ဆီစက်သမားအဝယ်ပုံမှန်ရှိခြင်းကြောင့် ၄၅ပိဿာ တစ်အိတ် အရည်အသွေးအကောင်းဆုံး ၃၅၀၀၀၀ကျပ်ဖြင့် ဈေးတည်ငြိမ်နေသည်။ နှမ်းနက်(စမုံ)မှာ အရောင်းအဝယ်အေးခြင်းကြောင့် အရည်အသွေး အကောင်းဆုံး ၇၆၀၀၀၀ကျပ်၊ ဆောင်းနှမ်းနက် ၅၁၀၀၀၀ ကျပ်ဖြင့် ဈေးတည်ငြိမ်နေသည်။ ပန်းနှမ်းမှာ အသစ်အဝင်မရှိသေးခြင်း၊ ဘယဆေးနှင့် ဆီစက်သမား အဝယ်ပုံမှန်ရှိခြင်းကြောင့် ၄၅ပိဿာ တစ်အိတ် ၂၈၀၀၀၀ကျပ်ဖြင့် ဈေးတည်ငြိမ်နေသည်။ နေကြာဈေးနှုန်းမှာ ဆောင်းနေကြာအသစ်များဝင်ရောက်ခြင်း၊ အရည်အသွေးကောင်းခြင်းကြောင့် ၂၇ပိဿာ ၂၀၀၀၀၀ကျပ်မှ ၂၁၅၀၀၀ကျပ်သို့ ဈေးမသိမသာမြင့်သွားသည်။
စားဖိုဆောင်ဈေးကွက်
ငရုတ်ခြောက် (ရှည်)မှာ ကျောက်ဆည်နှင့် ဧရာဝတီတိုင်းဘက်မှ ဝင်ရောက်ပြီး တစ်ပိဿာလျှင် ၁၄၀၀၀ ကျပ်မှ ၁၆၀၀၀ ကျပ် ဈေးရှိပြီး ငရုတ်ခြောက် (ပွ)မှာ ဆင်ဖြူ ကျွန်းဘက်မှ ဝင်ရောက်ပြီး တစ်ပိဿာလျှင် အသီးလှပမှုပေါ်မူတည်၍ ၂၇၀၀၀ ကျပ်မှ ၃၀၀၀၀ ကျပ်ထိ ဈေးရှိပြီး မန္တလေးဝန်းကျင်နှင့် မိုးကောင်း မြစ်ကြီးနားမှ မှာယူမှုများ တင်ပို့မှုရှိသည်။မြစ်သားကြက်သွန်များမှာ ကြီးတစ်ပိဿာ ၂၅၀၀ ကျပ်၊ လတ် တစ်ပိဿာ ၂၃၀၀ ကျပ်၊ ဈေးတည်ငြိမ်နေပြီး သေးတစ်ပိဿာ ၁၈၀၀ကျပ်မှ ၁၅၀၀ကျပ်သို့ ဈေးနိမ့်သွားသည်။ နယ်စုံ ကြက်သွန်များမှာ ကြီးတစ်ပိဿာ ၂၄၀၀ ကျပ်၊ လတ် ၂၀၀၀ ကျပ်၊ သေး ၁၂၀၀ ကျပ် ဈေးရှိသည်။ ကြက်သွန်ဖြူ (မြန်မာ) ကြက်သွန်များ ရွှေဘိုဘက်မှ ဝင်ရောက်ပြီး အရည်အသွေး အကောင်းဆုံးတစ်ပိဿာ ၁၀၀၀၀ ကျပ်မှ အညံ့ဆုံး ၃၀၀၀ ကျပ် ဈေးရှိသည်။ ကြက်သွန်ဖြူ (ရှမ်း) မဝင်သေးဘဲ ကြက်သွန်ဖြူ (တရုတ်) မှာ အဝင်ပုံမှန် စားသုံးမှု ပုံမှန်ရှိခြင်းကြောင့် တစ်ပိဿာ ၁၂၀၀၀ကျပ်ဖြင့် ဈေးတည်ငြိမ်နေသည်။ အာလူးဈေးနှုန်းမှာ ဘန့်ဘွေးအာလူးတစ်ပိဿာ ၃၀၀၀ ကျပ်၊ အောင်ပန်းအာလူး တစ်ပိဿာ ၃၂၀၀ ကျပ်ဖြင့် ရောင်းဝယ်နေသည်။
ပဲမျိုးစုံဈေးကွက်
မတ်ပဲ အသစ်များဝင်ရောက်မှုရှိခြင်း၊ ရန်ကုန်ဝယ်လက်နည်းခြင်း၊ မြို့တွင်းပဲခွဲစက်များ အဝယ်နည်းခြင်းကြောင့် ၃တင်းတစ်အိတ် အရည် အသွေး အကောင်းဆုံး ၂၈၇၀၀၀ကျပ်မှ ၂၇၈၀၀၀ကျပ်သို့ ဈေးနိမ့်သွားသည်။ ပဲတီစိမ်း အသစ်များဝင်ရောက်ခြင်း၊ မြို့တွင်းပဲခွဲစက်များ ဝယ်ယူမှုသာရှိခြင်း၊ တရုတ်ဝယ်လက် နည်းခြင်းကြောင့် အရောင်းအဝယ်အေးကာ အရည်အသွေးပေါ်မူတည်၍ အနိမ့်ဆုံး ၂၆၀၀၀၀ ကျပ်မှ အကောင်းဆုံး ၂၉၀၀၀၀ ကျပ်ဖြင့် ဈေးတည်ငြိမ်နေသည်။ ပဲစဉ်းငုံ (နီ)မှာ အသစ်များဝင်ရောက်ခြင်း၊ ရန်ကုန်ဝယ်လက်အဝယ်နည်းခြင်း၊ မြို့တွင်းပဲခွဲစက်များ အဝယ်ပုံမှန်ရှိခြင်းကြောင့် ၃တင်းတစ်အိတ် အရည်အသွေးအကောင်းဆုံး ၂၉၆၀၀၀ ကျပ်မှ ၂၉၃၀၀၀ကျပ်သို့ ဈေးမသိမသာနိမ့်သွားသည်။ ပဲစဉ်းငုံ (ဖြူ)မှာလည်း အသစ်ဝင်ရောက်မှုရှိခြင်း၊ မြို့တွင်းပဲခွဲစက်များ၊ လုပ်ငန်းသမားအဝယ်ပုံမှန်ရှိခြင်းကြောင့် ၃တင်းတစ်အိတ် ၂၆၃၀၀၀ကျပ်ဖြင့် ဈေးတည် ငြိမ်နေသည်။ ပဲပုတ်(မြန်မာ) မှာ အသစ်မဝင်သေးခြင်း၊ လုပ်ငန်းသမားအဝယ် ပုံမှန်ရှိခြင်းကြောင့် ၃တင်းတစ်အိတ် ၃၅၀၀၀၀ကျပ်ဖြင့် ဈေးတည်ငြိမ်နေသည်။ ပဲပုတ်(ရှမ်း)မှာ အသစ်များ ဝင်ရောက်မှုရှိခြင်း၊ ဆီစက်သမားအဝယ်ပုံမှန်ရှိခြင်းကြောင့် မိုးမိတ် ပဲပုတ် ၃တင်းတစ်အိတ် ၃၆၅၀၀၀ကျပ်မှ ၃၇၀၀၀၀ကျပ်သို့ ဈေးမြင့်သွားပြီး မိုးညှင်းပဲပုတ်မှာ အရည်အသွေးအကောင်းဆုံး ၃တင်းတစ်အိတ် ၃၈၀၀၀၀ကျပ်ဖြင့် ဈေးတည်ငြိမ်နေသည်။
ကုလားပဲ (လုံးဖြူကြီး)မှာ အထွက်နည်းအဝင်နည်းခြင်း၊ ပဲကြော်/လှော်လုပ်ငန်းသမား အဝယ်ပုံမှန်ရှိခြင်းကြောင့် ၃တင်းတစ်အိတ် ၁၁၈၀၀၀ ကျပ်မှ ၁၂၃၀၀၀ကျပ်သို့ ဈေးမြင့်သွားပြီး ကုလားပဲ (လုံးဝါကြီး)မှာလည်း အသစ်အဝင်နည်းသေးခြင်း၊ ပဲခွဲစက်များဝယ်ယူမှုပုံမှန် ရှိခြင်းကြောင့် တစ်အိတ် ၂၁၅၀၀၀ကျပ်မှ ၂၁၇၀၀၀ကျပ်သို့ ဈေးမသိမသာမြင့်သွားသည်။ လုံးဝါကြီး ဈေးမြင့်ခြင်း၊ လက်ကျန်နည်းပြီး အမြင့်ဈေးဖြင့်ဝယ်ယူကြိတ်ခွဲရခြင်းကြောင့် ခွဲခြမ်းမှာလည်း တစ်ပိဿာ ၅၃၅၀ကျပ်မှ ၅၄၀၀ကျပ်သို့ဈေးမြင့်သွားသည်။ပဲယင်း အသစ်ဝင်ရောက်သော်လည်း ပဲခွဲစက်များအဝယ်ရှိခြင်း၊ ရန်ကုန်သမား ဝယ်ယူမှုရှိခြင်းကြောင့် ယခင်အပတ် ၃တင်းတစ်အိတ် ၂၁၀၀၀၀ကျပ်မှ ၂၄၀၀၀၀ကျပ်သို့ ဈေးမြင့်သွားသည်။ မြေတောက်ပဲမှာ မုံရွာမှ အဟောင်းလက်ကျန်တစ်အိတ် ၂၄၀၀၀၀ကျပ်၊ ကလေး တမူးမှ အသစ်များ တစ်အိတ် ၂၇၅၀၀၀ကျပ်၊ အညာအသစ်များ ၂၉၀၀၀၀ကျပ်ဖြင့် အရည် အသွေးပေါ်မူတည်၍ လုပ်ငန်းသမားများ ဝယ်ယူမှုရှိသည်။ စားတော်ပဲ (ကျွန်း)မှာ အသစ်အဝင်နည်းခြင်း၊ လက်လီသမားအဝယ်ပုံမှန်ရှိခြင်း၊ လုပ်ငန်း သမားအဝယ်ရှိခြင်းကြောင့် တစ်အိတ် ယခင်အပတ် ၅၉၀၀၀၀ကျပ်မှ ယခုအပတ် ၆၄၀၀၀၀ကျပ်သို့ ဈေးမြင့်သွားသည်။ပဲကြီး(ကြီး)မှာ အသစ်များဝင်ရောက်ပြီး အရည်အသွေးကောင်းခြင်း၊ လုပ်ငန်းသမား၊ လှောင်သမားအဝယ်ရှိခြင်းကြောင့် မိုးမိတ်ပဲကြီး ၃တင်းတစ်အိတ် ၄၂၀၀၀၀ကျပ်၊ ကျောက်တွင်း ပဲကြီး ၄၇၀၀၀၀ကျပ်ဖြင့် ရောင်း ဝယ်နေပြီး ပဲကြီး (သေး)မှာလည်း အရည်အသွေးကောင်းခြင်း၊ ပဲကြော်/လှော်သမားပုံမှန်ဝယ်ယူမှုရှိခြင်းကြောင့် ယခင်အပတ် ၃၀၀၀၀၀ကျပ်မှ ၃၆၀၀၀၀ ကျပ်သို့ ဈေးမြင့် သွားသည်။ထောပတ်ပဲ အသစ်များဝင်ရောက်ခြင်း၊ အရည်အသွေးကောင်းခြင်း၊ လုပ်ငန်းသမား အဝယ်ရှိခြင်းကြောင့် ယခင်အပတ် ၃၅၀၀၀၀ကျပ်မှ ယခုအပတ် ၃၉၀၀၀၀ကျပ်သို့ ဈေးမြင့်သွားပြီး ထောပတ်ပဲ (သေး)မှာ အရည်အသွေးကောင်းခြင်း၊ လက်လီသမား အဝယ်ပုံမှန်ရှိခြင်းကြောင့် ၂၁၅၀၀၀ ကျပ်မှ ၂၂၀၀၀၀ကျပ်သို့ ဈေးမသိမသာမြင့်သွားသည်။
ဟင်းသီး/ရွက် နှင့် သစ်သီးဝလံ ဈေးကွက်
မုံရွာချောင်းဦးမှ ငရုတ်စို (ရှည်နှင့်လတ်) နှစ်မျိုးလုံးဝင်ရောက်ပြီး မြို့တွင်း ငပိထောင်း လက်ဖက်သမား ပုံမှန်ဝယ်ယူမှုရှိခြင်းကြောင့် ငရုတ်စို (ရှည်) တစ်ပိဿာ ၅၀၀၀ ကျပ်၊ လတ် တစ်ပိဿာ ၆၀၀၀ ကျပ်ဖြင့် ဈေးငြိမ်နေသည်။ ရံဖန်ရံခါ နမ္မတူသို့ တင်ပို့မှုရှိသည်။ ဆောင်းကာလ ဖြစ်၍ ဂေါ်ဖီတစ်ထုပ် ၁၃၀၀ ကျပ်၊ ပန်းမုံလာ ၁၀၀၀ ကျပ်၊ မုံလာဥနီတစ်ပိဿာ ၅၀၀၀ ကျပ်၊ မုန့်ညင်းဖြူ တစ်ပိဿာ ၁၅၀၀ ကျပ်ဖြင့် စားသောက်ဆိုင်နှင့် မြို့တွင်းသုံးဝယ်ယူမှု ပုံမှန်ရှိနေသည်။ ပြည်၊ ပဲခူးတို့မှ ဖရဲသီးအလုံးကြီးများဝင်ရောက်ခြင်းကြောင့် အရွယ်အစားပေါ်မူတည်၍ တစ်လုံး ၁၂၀၀၀ ကျပ်မှ ၅၀၀၀ ကျပ်အထိ ဈေးအမျိုးမျိုးဖြင့် ရောင်းဝယ်နေသည်။ ရွာငံဘက်မှ ထောပတ်သီးများ ၁၂၀ လုံးပါ တစ်အိတ် ၇၀၀၀၀ ကျပ်၊ သီပေါနာနတ်တစ်လုံး ၁၅၀၀ ကျပ် မှ ၃၀၀၀ ကျပ်၊ ရမည်းသင်း စပျစ်သီးညို တစ်ပိဿာ ၁၈၀၀၀ ကျပ်၊ တံတားဦးမှ သင်္ဘောသီး၂လုံး တစ်ထုပ်လျှင် ၃၀၀၀ ကျပ်၊ သခွားမွှေးတစ်လုံး ၁၅၀၀ ကျပ်၊ ရွှေသခွားတစ်လုံး ၂၅၀၀ ကျပ်၊ ဝူးခုန်သခွား (ဖရဲသခွား) တစ်လုံး ၃၀၀၀ ကျပ်ဖြင့် မိုးကုတ်၊ ကောလင်း၊ ဝန်းသို၊ ကျောက်မဲ၊ လားရှိုး၊ မူဆယ် စသောအမှာရှိသောမြို့များသို့ တင်ပို့ပြီး မြို့တွင်းသစ်သီးဆိုင်များ ပုံမှန် ဝယ်ယူမှုရှိသည်။
ဂျုံနှင့်အစေ့ထုတ်ပြောင်းဈေးကွက်
ငါန်းဇွန်၊ မြင်းမူ၊ မြောင်၊ ဆားတောင်၊ မုံရွာဂျုံများမှာ အသစ်များ ဝင်ရောက်မှုများလာခြင်း၊ ဂျုံစက်များ အဝယ်ပုံမှန်ရှိခြင်းကြောင့် ယခင်အပတ် အရည်အသွေးအကောင်းဆုံး ၃တင်းတစ်အိတ် ၂၄၀၀၀၀ကျပ်မှ ၂၀၀၀၀၀ကျပ်သို့ ဈေးနိမ့် သွားသည်။ ရှမ်းဂျုံမှာ အသစ်များဝင်ရောက်မှုရှိခြင်း၊ ဂျုံအသစ်များ ဝင်ချိန်ဖြစ်၍ ဂျုံမှုန့်အတွက် နည်းသော ရှမ်းဂျုံအရောင်းအဝယ်အေးခြင်းကြောင့် ၃တင်း ၁၇၅၀၀၀ကျပ်မှ ၁၇၀၀၀၀ကျပ်သို့ ဈေးနိမ့်သွားသည်။ ကလေးဂျုံ ၁၆၅၀၀၀ကျပ်၊ အထွက်တိုးဂျုံအသစ်များ ဝင်ရောက်ခြင်းကြောင့် ယခင်အပတ် ၁၇၀၀၀၀ကျပ်မှ ယခုအပတ် ၁၆၅၀၀၀ ကျပ်သို့ ဈေးနိမ့်သွားသည်။ အစေ့ထုတ်ပြောင်း အသစ်များ ဝင်ရောက်မှုရှိခြင်း၊ တရုတ်ဝယ်လက်မရှိခြင်း၊ တိရစ္ဆာန်အစာစပ်သမားအဝယ်သာရှိခြင်းကြောင့် အရည်အသွေး အကောင်းဆုံး ယခင်အပတ် ၃တင်းတစ်အိတ် ၇၆၀၀၀ကျပ်မှ ယခုအပတ် ၇၄၀၀၀ကျပ်သို့ ဈေးနိမ့်သွားသည်။
ခင်မေကြည်