ရန်ကုန်ဈေးကွက်

ဆန်ဈေးကွက်
    ဆန်စပါးကုန်စည်ဒိုင် (ဝါးတန်းလမ်း)တွင် ထုတ်ပြန်ထား သော ဆန်ဈေးနှုန်းများအရ ရွှေဘိုပေါ်ဆန်းဆန်ဟောင်း အလတ်စ တစ်တင်းခွဲတစ်အိတ်လျှင် ၁၉၅၀၀၀ ကျပ်နှုန်းနှင့် အောက်စတစ်အိတ်လျှင် ၁၉၀၀၀၀ကျပ်နှုန်းဖြင့်လည်းကောင်း၊ ရွှေဘိုပေါ်ဆန်းဆန်သစ် အလတ်စ တစ်တင်းခွဲတစ်အိတ်လျှင် ၁၈၅၀၀၀ကျပ်နှုန်းနှင့် အောက်စ တစ်အိတ်လျှင် ၁၈၀၀၀၀ကျပ်နှုန်းဖြင့်လည်းကောင်း၊ ဖျာပုံပေါ်ဆန်းဆန်ဟောင်း အလတ်စ တစ်တင်းခွဲတစ်အိတ်လျှင် ၁၂၅၀၀၀ကျပ်နှုန်းနှင့် အောက်စတစ်အိတ်လျှင် ၁၂၀၀၀၀ကျပ်နှုန်း၊ ဖျာပုံပေါ်ဆန်းဆန်ဟောင်း အလတ်စတစ်တင်းခွဲတစ်အိတ်လျှင် ၁၀၅၀၀၀ ကျပ်နှုန်းနှင့် အောက်စတစ်အိတ်လျှင် ၉၇၀၀၀ကျပ်နှုန်းဖြင့်လည်းကောင်း၊ ဇီယာဆန် အလတ်စတစ်တင်းခွဲ တစ်အိတ်လျှင် ၅၅၀၀၀ ကျပ်နှုန်းနှင့် အောက်စတစ်အိတ်လျှင် ၅၂၀၀၀ကျပ် နှုန်းဖြင့် လည်းကောင်း၊ ဧည့်မထဆန်ကြမ်း ၁၅ ရာခိုင်နှုန်း ၊ အလတ်စတစ်တင်းခွဲ တစ်အိတ်လျှင် ၅၀၅၀၀ကျပ်နှုန်းနှင့် အောက်စတစ်အိတ်လျှင် ၅၀၀၀၀ ကျပ်နှုန်းဖြင့် လည်း ကောင်း၊ ငစိန်ဆန်တစ်တင်းခွဲတစ်အိတ်လျှင် ၅၀၀၀၀ကျပ်နှုန်းနှင့် အောက်စတစ်အိတ်လျှင် ၄၉၀၀၀ ကျပ် နှုန်းဖြင့်လည်းကောင်း ရောင်းဝယ်လျက်ရှိကြောင်းသိရသည်။ ယခင်အပတ်ဈေးနှုန်းများနှင့် နှိုင်းယှဉ်ပါကရွှေဘိုပေါ်ဆန်းဆန်သစ်တစ်မျိုးသာထပ်မံဈေးမြင့်ခဲ့သည်။ ရွှေဘိုပေါ်ဆန်း ဆန်သစ်တစ်အိတ်လျှင် ယခင်အပတ်ထက် ကျပ် ၇၀၀၀ ဝန်းကျင်ခန့် ဈေးမြင့်ခဲ့ခြင်းဖြစ်သည်။ ဆန်ဟောင်းများဈေးမြင့်နေချိန်တွင် ဆန်သစ်များ အရည်အသွေးပိုမို ကောင်းမွန်ခြောက်သွေ့လာခြင်းနှင့် စားသုံးသူများက ရောနှောစားသုံးရန် ဝယ်ယူမှုများခြင်း တို့ကြောင့် ယခင်အပတ်ထက် သိသာစွာ ဈေးမြင့်လာခဲ့ခြင်းဖြစ်သည်။ ကျန်ဆန်အမျိုးအစား များမှာ ဈေးနှုန်းပြောင်းလဲမှု မရှိခဲ့ပေ။ ပြည်တွင်းစားသုံးမှုများသောဆန်ချော၊ ဆန်လတ်များမှာ ဆန်ဟောင်းများရှားပါးလာချိန်ဖြစ်သော်လည်း စပါးဟောင်းများအား လတ်တလော အသစ် ကြိတ်ခွဲထားသော ဆန်းဟောင်းကြိတ်သစ်များအဖြစ် ဈေးကွက်အတွင်း ဝင်ရောက်မှုရှိနေသေးခြင်း၊ ဆန်ဟောင်းအဝင်နည်းကာ ဈေးမြင့်နေချိန်တွင် စားသုံးသူများမှ ဝယ်လိုအားနည်းခြင်း၊ ဆန်ချောနှင့်ဆန်ကြမ်းရောနှောစားသုံးမှုများခြင်း၊ ပြည်ပပို့ဆန်ဈေးကွက်တွင်လည်း ပုံမှန်တင်ပို့မှုရှိခြင်း၊ ပြည်တွင်း ဆန်ဈေးများ တည်ငြိမ်မှန်ကန်မှုရှိစေရန် စားသုံးသူများထံသို့ သင့်တင့်မျှတသော ဈေးနှုန်းများဖြင့် ဆန်ကားများ လှည့်လည်ရောင်းချပေးလျက်ရှိခြင်းတို့ကြောင့် ပြည်တွင်း စားသုံးမှုများသောဆန်ချော၊ ဆန်လတ်အများစုမှာ ဈေးငြိမ်အရောင်းအဝယ်ဖြစ်ခဲ့ကြောင်း သိရသည်။ ရန်ကုန်ဈေးကွက်သို့ ဖျာပုံ၊ မော်ကျွန်း၊ ဘိုကလေး၊ ကွမ်းခြံကုန်း၊ ဒေးဒရဲ၊ ကော့မှူး၊ တွံ့တေး၊ ဝါးခယ်မ၊ မြောင်းမြ၊ ကျိုက်လတ်၊ လပွတ္တာ၊ ရွှေဘိုဒေသများမှ ဆန်ဝင်ရောက်မှု ပုံမှန်ရှိ
ကြောင်းသိရသည်။
အစေ့ထုတ်ပြောင်းဈေးကွက်
    အစေ့ထုတ်ပြောင်းများအား ထိုင်းနိုင်ငံသို့ အကောက်ခွန်လွတ် တင်ပို့ချိန်ဖြစ်ခြင်း၊ ပို့ကုန်ရငွေအပေါ် ဖြေလျော့မှုများရှိလာခြင်းကြောင့် ကုန်သည်၊ ဝယ်လက်များမှ ဈေးမြှင့်ပေး ဝယ်မှုရှိခြင်း၊ ယခင်နှစ်များက အစေ့ထုတ်ပြောင်း အကောက်ခွန်လွတ်တင်သွင်းခွင့် ကာလမှာ ၇ လ ရှိခဲ့သော် လည်း ယခုနှစ်အတွက် အကောက်ခွန်လွတ်တင်သွင်းခွင့်ကာလမှာ ၅ လသာ ရှိသဖြင့် အပြိုင်အဆိုင် ဝယ်ယူမှုများရှိခြင်းတို့ကြောင့် အစေ့ထုတ်ပြောင်းဈေးနှုန်းများ ယခင်အပတ်ထက် ဈေးမြင့်ခဲ့သည်။ အစေ့ထုတ်ပြောင်း ၅၄ ပိဿာလျှင် ယခင်အပတ် ပျမ်းမျှဈေးနှုန်းမှာ ၇၉၉၂၀ ကျပ်ဖြစ်ပြီး ယခုအပတ်ဈေးနှုန်းမှာ ၈၁၅၄၀ ကျပ်သို့ ရောက်ရှိ ဈေးမြင့်ခဲ့သည်။ အခြားသောအာဆီယံနိုင်ငံများသို့ ပြောင်းတန်ချိန်ပမာဏ တိုးမြင့်တင်ပို့ ရောင်းချနိုင်ရန် မြန်မာနိုင်ငံ ပြောင်းလုပ်ငန်းအသင်းက စီစဉ်လျက်ရှိပြီး ဖေဖော်ဝါရီလကုန်ပိုင်းတွင် ဖိလစ်ပိုင်နိုင်ငံသို့ သွားရောက်ညှိနှိုင်းမှုများပြုရန် စီစဉ်ထားကြောင်း သိရသည်။ 
စားဖိုးဆောင်သီးနှံဈေးကွက်
    ငရုတ်ခြောက်(ရှည်)ဈေးနှုန်းများမှာ ဈေးကွက်သို့ ပန်းရဲနှင့်မြားနီ ငရုတ်ခြောက်များ ကုန်ဝင်ရောက်မှုနည်းခြင်း၊ အအေးခန်းလှောင်စများဖြစ်၍ အရည်အသွေးလှပကောင်းမွန်ခြင်းကြောင့်လည်းကောင်း၊ ငရုတ်ခြောက်(ပွ)မှာ ဆင်ဖြူကျွန်း(ပု)တစ်မျိုးသာ ကုန်အဝင်ရှိခြင်းနှင့် ကုန်အဝင်မရှိသလောက် နည်းခြင်းတို့ကြောင့်လည်းကောင်း ယခင်အပတ်ထက် သိသာစွာ ဈေးမြင့်ခဲ့သည်။ ငရုတ်ခြောက်(လတ်)မှာ ဟင်္သာတ(မိုးထောင်)တစ်မျိုးသာ ကုန်ဝင်ရောက်မှု ရှိသော်လည်း ကုန်အဝင်ပုံမှန်ရှိလာခြင်းနှင့် ရာသီပူချိန်ဖြစ်၍ ဝယ်ယူစားသုံးမှုနည်းခြင်း တို့ကြောင့် ယခင်အပတ်ထက် သိသာစွာဈေးနိမ့်ခဲ့သည်။ ငရုတ်ခြောက်(ရှည်၊လတ်၊ပွ) တစ်ပိဿာလျှင် ယခင်အပတ် ပျမ်းမျှဈေးနှုန်းမှာ (၁၄၀၀၀-၁၈၂၅၀-၂၀၅၀၀)ကျပ်ဖြစ်ပြီး ယခုအပတ်ဈေးနှုန်းမှာ (၁၅၂၅၀-၁၆၅၀၀-၂၂၀၀၀)ကျပ်ဖြစ်သည်။ ကြက်သွန်နီ(ထူး၊လတ်၊ သေး)မှာ ဆိပ်ဖြူ၊ မြစ်သား၊ မြင်းခြံ၊ မုံရွာ၊ ဆင်ဖြူကျွန်း၊ တောင်းတွင်း၊ မင်းဘူး၊ ပခုက္ကူဒေသ များမှ ကုန်အဝင်ရှိခဲ့ကြောင်းသိရသည်။ ယခင်လအတွင်း ကြက်သွန်နီအဟောင်းရော အသစ်ပါ ကုန်ဝင်ရောက်မှုများကာ ရောင်းလိုအားများခဲ့ခြင်း၊ ယခုလတွင် ကြက်သွန်နီအသစ်များ လှိုင်လှိုင်ပေါ်ချိန်ဖြစ်ခြင်း၊ ရောင်းလိုအားများခြင်းနှင့် ရန်ကုန်ဈေးကွက်သို့ ဝင်ရောက်မှု များခဲ့ခြင်း၊ စားသုံးသူများမှ ဝယ်လိုအားနည်းခဲ့ခြင်းတို့ကြောင့် ယခုရက်သတ္တပတ်အတွင်း ကုန်အဝင်နည်းလာသော်လည်း ကြက်သွန်နီ(ထူး၊လတ်၊သေး)ဈေးနှုန်းများမှာ ယခင်အပတ် ထက်ဈေးနိမ့်ခဲ့သည်။ ကြက်သွန်နီ(ထူး၊လတ်၊သေး)တစ်ပိဿာလျှင် ယခင်အပတ်ပျမ်းမျှ ဈေးနှုန်းမှာ (၂၃၀၀-၂၂၅၀-၁၈၅၀)ကျပ်ဖြစ်ပြီး ယခုအပတ်ဈေးနှုန်းမှာ (၂၂၀၀-၂၁၅၀-၁၇၅၀) ကျပ်သို့ ရောက်ရှိဈေးနိမ့်ခဲ့သည်။ ကြက်သွန်ဖြူကြူကုတ်မှာ တရုတ်နှစ်သစ်ကူးပိတ်ရက်များ နီးလာခြင်းကြောင့် ကုန်အဝင်နည်းကာ ဈေးမြင့်ခဲ့သည်။ ကြက်သွန်ဖြူ(ရှမ်း)မှာ ကြူကုတ်ကြက်သွန်ဖြူများ ဈေးမြင့်လာချိန်တွင် စားသုံးသူများမှ ဝယ်ယူမှုများလာခြင်းကြောင့် ယခင်အပတ်ထက် ဈေးမြင့်လာခဲ့သည်။ ကြက်သွန်ဖြူ(ကြူကုတ်)တစ်ပိဿာလျှင် ယခင်အပတ်ပျမ်းမျှဈေးနှုန်းမှာ ၁၁၅၀၀ ကျပ်ဖြစ်ပြီး ယခုအပတ်ဈေးနှုန်းမှာ ၁၂၅၀၀ ကျပ်သို့ ရောက်ရှိဈေးမြင့်ခဲ့သည်။ ကြက် သွန်ဖြူ(ရှမ်း) တစ်ပိဿာလျှင် ယခင်အပတ်ပျမ်းမျှဈေးနှုန်းမှာ ၅၅၀၀ ကျပ်ဖြစ်ပြီး ယခုအပတ်ဈေးနှုန်းမှာ ၅၉၀၀ ကျပ်သို့ရောက်ရှိဈေးမြင့်ခဲ့သည်။ ရှမ်းအာလူးများ ကုန်အဝင်ပုံမှန်ရှိသော်လည်း အာလူး(အက်စ်ဝမ်း)မှာ အရည် အသွေးနိမ့်လာခြင်းကြောင့် အနည်းငယ်ဈေးနိမ့်ခဲ့သည်။ အာလူး(အိုကေ)မှာ ရောင်းလိုအား ဝယ်လိုအားမျှကာ ဈေးငြိမ်လျက်ရှိပြီး အာလူး(အေဝမ်း)မှာ စားသုံးသူများမှ ဝယ်လိုအားများခြင်းကြောင့် ယခင်အပတ်ထက် ဈေးမြင့်လာခဲ့ခြင်းဖြစ်သည်။ အာလူး (အက်စ်ဝမ်း၊ အိုကေ၊ အေဝမ်း) တစ်ပိဿာလျှင် ယခင်အပတ်ပျမ်းမျှဈေးနှုန်းမှာ (၄၅၀၀-၄၀၀၀-၃၅၀၀)ကျပ်ဖြစ်ပြီး ယခုအပတ်ဈေးနှုန်းမှာ (၄၀၀၀-၄၀၀၀-၃၈၀၀)ကျပ်ဖြစ်သည်။ တရုတ် အာလူးများလည်း ကုန်အဝင်ပုံမှန်ရှိပြီး ဝယ်ယူစားသုံးမှုနည်းလာခြင်းကြောင့် ယခင်အပတ်ထက် အနည်းငယ်ဈေးနိမ့်လာခဲ့သည်။ တရုတ်အာလူးတစ်ပိဿာလျှင် ယခင်အပတ်ပျမ်းမျှဈေးနှုန်းမှာ ၅၀၀၀ ကျပ်ဖြစ်ပြီး ယခုအပတ်ဈေးနှုန်းမှာ ၄၂၅၀ ကျပ်သို့ ရောက်ရှိဈေးနိမ့်ခဲ့သည်။

စားသုံးဆီဈေးကွက်
    ကမ္ဘာ့စားအုန်းဆီထုတ်လုပ်တင်ပို့သောနိုင်ငံများတွင်ဖြစ်ပေါ်လျက် ရှိသောဈေးကွက် ဈေးနှုန်းများအပေါ် အခြေခံ၍ စားသုံးဆီ တင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်မှု ကော်မတီ၏ ၂၀၂၆ခုနှစ်၊ ဖေဖော်ဝါရီ  ၆ ရက်မှ ၁၂ ရက်အထိ ကုန်ဆုံးသောကာလအတွက် ထုတ်ပြန်ထားသော ရန်ကုန်အထိုင် လက်ကားရည်ညွှန်းဈေးနှုန်းမှာ စားအုန်းဆီတစ်ပိဿာလျှင် ၆၂၀၀ ကျပ်ဖြစ်သည်။ ယခင်အပတ်ဈေးနှုန်းနှင့်နှိုင်းယှဉ်ပါက စားအုန်းဆီ တစ်ပိဿာလျှင် ၅၀ ကျပ်နှုန်းဈေးမြင့်လာခြင်းဖြစ်သည်။ ပြင်ပရှိလက်လီဈေးကွက်တွင် သတ်မှတ်ထားသော ဆီဆိုင်အချို့၌ ရည်ညွှန်းဈေးနှုန်းထက် များစွာမကွာသော ဈေးနှုန်းများဖြင့် တစ်အိမ်ထောင်လျှင် ၅၀ ကျပ်သားနှုန်း ရောင်းချပေးလျက်ရှိသည်။ အချို့မြို့နယ်များတွင် စားအုန်းဆီ တစ်ပိဿာ၏ ပြင်ပပေါက်ဈေးမှာ ၁၀၀၀၀ ကျပ်ဝန်းကျင်ဖြစ်သည်။
အေးသန္တာဝင်း