အီရန်ပဋိပက္ခနှင့် အယ်လ်နီညို (El Nino) ခန့်မှန်းချက်များကြောင့် ပဲမျိုးစုံ အကောက်ခွန်လွတ် တင်သွင်းခွင့်ကို အိန္ဒိယထပ်မံသက်တမ်းတိုးဖွယ်ရှိနေ

ယခုနှစ်အတွင်း အယ်လ်နီညို (El Nino) ဖြစ်ပေါ်နိုင်သည့် ခန့်မှန်းချက်များနှင့် ပဋိပက္ခဖြစ်ပွားလျက်ရှိသော အနောက်အာရှဒေသ၏ အကျိုး သက်ရောက်မှုများကြောင့် သယ်ယူပို့ဆောင်ရေး စရိတ်များ မြင့်တက်နေသည့်ကြားမှ အိန္ဒိယအစိုးရသည် ပဲစင်းငုံနှင့် မတ်ပဲကဲ့သို့သော ပဲမျိုးစုံ လုံလောက်စွာရရှိစေရန်အတွက်အကောက်ခွန်ကင်းလွတ်ခွင့် ဖြင့် တင်သွင်းခွင့်ပြုသည့် ကာ လကို တိုးမြှင့်ဖွယ်ရှိကြောင်း သိရသည်။    ပဲစင်းငုံနှင့် မတ်ပဲတို့အတွက် အကောက် ခွန်ကင်းလွတ်ခွင့် ဖြင့် တင်သွင်းနိုင်သည့်ကာလမှာ ယခုလ ၃၁ ရက်နေ့တွင် ကုန်ဆုံးမည်ဖြစ်သော်လည်း အိန္ဒိယနိုင်ငံ တွင် အဆိုပါ ပဲအမျိုးအစားများ လိုအပ်ချက်ရှိနေခြင်းကြောင့် သက်ဆိုင်သူများက သက် တမ်းတိုးရန် မျှော်လင့်နေကြကြောင်း The Hindu Businessline သတင်းဌာနက မတ် ၁၂ ရက်က ဖော်ပြထားသည်။

အစိုးရအနေဖြင့် အကောက်ခွန်ကင်းလွတ်ခွင့်ဖြင့် တင်သွင်းခွင့်မူဝါဒကို သက်တမ်းတိုးရန် တွန်းအားပေးနေသည့် အခြားအချက်တစ်ခုမှာ ဇွန်လအထိ လက်ရှိသီးနှံစိုက်ပျိုးရာသီအတွင်း ပြည် တွင်းထုတ်လုပ်မှု ကျဆင်းနေခြင်းဖြစ်သည်။ အစိုးရ၏ ဒုတိယအကြိမ် ကြိုတင်ခန့်မှန်းချက်များအရ ၂၀၂၅-၂၆ ဘဏ္ဍာနှစ်အတွင်း ပဲစင်းငုံထုတ်လုပ်မှုသည် ယခင်နှစ်က တန်ချိန် ၃၆ ဒသမ ၂၄ သိန်းရှိခဲ့ ရာမှ ၄ ဒသမ ၆၆ ရာခိုင်နှုန်းလျော့နည်းကာ တန်ချိန် ၃၄ ဒသမ ၅၅ သိန်းသာ ရှိကြောင်း သိရသည်။ ထို့အတူ မတ်ပဲထုတ်လုပ်မှုမှာလည်း မိုးသီးနှံ (Kharif) ရာသီတွင် ၁၀ ဒသမ ၇ ရာခိုင်နှုန်း လျော့နည်း ကာ တန်ချိန် ၁၂ ဒသမ ၀၆ သိန်း (ယခင်နှစ် ၁၃ ဒသမ ၄၁ သိန်း) နှင့် ဆောင်းသီးနှံ (Rabi) ရာသီ တွင် ၈ ဒသမ ၁၄ ရာခိုင်နှုန်း လျော့နည်းကာ တန်ချိန် ၅ ဒသမ ၀၈ သိန်း (ယခင်နှစ် ၅ ဒသမ ၅၃ သိန်း) သာ ရှိခဲ့ကြောင်းသိရသည်။

ပဋိပက္ခများဖြစ်ပွားနေသည့်ကြားမှ ရေနံဈေးနှုန်းများ မြင့်တက်လာခြင်းကြောင့် သယ်ယူပို့ ဆောင်ရေးနှင့် အာမခံစရိတ်များ မြင့်တက်လာနိုင်သဖြင့် အစိုးရအနေဖြင့် ငွေကြေး ဖောင်းပွမှုအပေါ် စိုးရိမ်လျက်ရှိကြောင်း၊ ကုန်စည်ထောက်ပံ့မှုများ ပြတ်တောက်ခြင်းမရှိနိုင်သော်လည်း သင်္ဘောလိုင်းများက စစ်ဘေး အန္တရာယ် အာမခံကြေး (War-risk premiums) များကို ပိုမိုကောက်ခံဖွယ်ရှိပြီး စုစုပေါင်း တင်သွင်းမှုစရိတ်ကို မြင့်တက်စေနိုင်ကြောင်း၊ ရူပီးငွေတန်ဖိုး ကျဆင်းခြင်းသည်လည်း ကုန်ကျစရိတ်များ မြင့်တက်စေသည့် အချက်တစ်ခုဖြစ်ကြောင်း၊ ထုပ်ပိုးမှုစရိတ်များပင်လျှင်မြင့် တက် လာခဲ့ပြီး PP (polypropylene) အိတ်ဈေးနှုန်းများသည် တစ်ပတ်အတွင်း ၁၁ ရူပီးမှ ၂၃ ရူပီး အထိ နှစ်ဆတိုးလာကာ တစ်တန်လျှင် ကုန်ကျ စရိတ် ၂၅၀ ရူပီးခန့် မြင့်တက်လာစေကြောင်းနှင့် အဆိုပါ မရေရာမှုများနှင့် အိန္ဒိယနိုင်ငံတွင် ပဲမျိုးစုံ လိုအပ်ချက်ရှိနေသည့် အချက်များကြောင့် အစိုးရ အနေဖြင့် တင်သွင်းမှုကို ကန့်သတ်ခြင်းမှ ရှောင်ကြဉ်သင့်ပြီး ကုန်စည်များ ဆက်လက်ဝင်ရောက် လာစေရန် ဆောင်ရွက်သင့်ကြောင်း အိန္ဒိယပဲမျိုးစုံနှင့် နှံစားသီးနှံအသင်း (India Pulses and Grains Association) ၏ ဥက္ကဋ္ဌ Bimal Kothari က ပြောကြားခဲ့သည်။ ၎င်းက ဆက်လက်၍ အိန္ဒိယနိုင်ငံ အနေဖြင့် ပဲမျိုးစုံ လိုအပ်ချက်ရှိနေဆဲဖြစ်ကြောင်းလည်း ဖြည့်စွက်ပြောကြားသည်။

ပြည်တွင်းဈေးနှုန်းများတည်ငြိမ်လျက်ရှိ

ပဲစင်းငုံနှင့် မတ်ပဲတင်သွင်းမှုများမှာ အကောက်ခွန်ကင်းလွတ်ခွင့် ရရှိထားသော်လည်း ကုလားပဲ (Chana) နှင့် ပဲနီလေး (Masur) ကဲ့သို့သော ပဲမျိုးစုံတင်သွင်းမှုအပေါ် အကောက် ခွန် ၁၀ ရာခိုင်နှုန်းနှင့် စားတော်ပဲ (Yellow peas) အပေါ် ၃၀ ရာခိုင်နှုန်း ကောက်ခံလျက်ရှိကြောင်း သိရ သည်။ အဆိုပါ မူဝါဒသည် ပြည်တွင်းဈေးကွက်၌ ပဲဈေးနှုန်းအားလုံးကို တည်ငြိမ်စေခဲ့သောကြောင့် အစိုးရအနေဖြင့် ယင်းမူဝါဒကိုသာ ဆက် လက်ကျင့်သုံးလိမ့်မည်ဟု ပဲကုန်သွယ် မှုလောကက မျှော်လင့်နေကြောင်း Kothari က ပြောကြားခဲ့သည်။ ထို့ပြင် ပြည်တွင်း၌ ကုလားပဲနှင့် ပဲနီလေး အထွက် နှုန်းကောင်းမွန်သောကြောင့် အစိုးရအနေဖြင့် ယခုအခွင့် အရေးကို အသုံးပြု၍ ခိုင်မာသော အရန် ရိက္ခာ (Buffer stocks) များ တည်ဆောက်ထားသင့်ကြောင်း ၎င်းက အကြံပြုပြောကြားခဲ့သည်။

အိန္ဒိယပဲမျိုးစုံနှင့် နှံစားသီးနှံအသင်း (IPGA) ၏ အတွင်းရေးမှူး Satish Upadhyay က ပဲမျိုးစုံတင်သွင်းမှုမူဝါဒ သက်တမ်းတိုးခြင်းကို လာမည့်ရက်သတ္တပတ်အတွင်း ထုတ်ပြန်ဖွယ်ရှိ ကြောင်း ပြောကြားခဲ့သည်။ ကမ္ဘာ့မိုးလေဝသအဖွဲ့က ခန့်မှန်းထားသည့်အတိုင်း အိန္ဒိယနိုင်ငံ၏ ရာသီဥတုအခြေအနေသည် အယ်လ်နီညိုဖြစ်ပေါ်ရန်နှင့် မုတ်သုံမိုးအပေါ် သက်ရောက်မှုရှိရန် အလား အလာမြင့်မားနေသဖြင့် ငွေကြေး ဖောင်းပွမှုကို ထိန်း ချုပ်နိုင်ရန်အလို့ငှာ အစိုးရအနေဖြင့် အကောက်ခွန်ကင်းလွတ်ခွင့်ဖြင့် တင်သွင်းခွင့်ကို ဆက်လက် ခွင့်ပြုသင့်ကြောင်း ၎င်းက ပြောကြားခဲ့သည်။

သက်တမ်းတိုးရန် မျှော်လင့်

ပြည်တွင်းထုတ်လုပ်မှုသည် ယခင်နှစ်ထက် လျော့နည်းနေသဖြင့် အစိုးရသည် ပဲစင်းငုံနှင့် မတ်ပဲတို့၏ အကောက်ခွန်ကင်းလွတ်ခွင့်ဖြင့် တင်သွင်းမှုကို သက်တမ်းတိုးရန် အလားအလာရှိ ကြောင်း IGrain India မှ Rahul Chauhan က ပြောကြားခဲ့သည်။ အခြားပဲမျိုးစုံ၏ ဈေး နှုန်းများမှာ ထိန်းချုပ်နိုင်သည့် အခြေ အနေတွင်ရှိသဖြင့် ၎င်းတို့အပေါ် ကောက်ခံနေသည့် အကောက်ခွန်ဖွဲ့စည်းပုံမှာမူ ပြောင်းလဲမှုရှိမည်မဟုတ်ကြောင်း ၎င်းက သုံးသပ်ပြောကြားခဲ့သည်။

ပြည်တွင်း၌ သီးနှံရရှိနိုင်မှု အခြေအနေမှာ များစွာကောင်းမွန်မှုမရှိသောကြောင့် အစိုးရအနေ ဖြင့် ပဲစင်းငုံနှင့် မတ်ပဲတို့အား အကန့် အသတ်မဲ့ တင်သွင်းခွင့်ပြုခြင်း (OGL imports) ကို ယခုလ ၃၁ ရက် နောက်ပိုင်းအထိ သက်တမ်းတိုးပေးသင့်ကြောင်း ချန်နိုင်းမြို့အခြေစိုက် တင်သွင်းသူတစ်ဦးဖြစ် သည့် Four P International မှ မန်နေဂျင်းဒါရိုက်တာ B Krishnamurthy က ပြောကြားခဲ့သည်။ လုပ်ငန်းရှင်များမှာ အဆိုပါ အကောက်ခွန်ကင်း လွတ်ခွင့်ဖြင့် တင်သွင်းမှုကို သက် တမ်းတိုးမည့် အချိန်အား မျှော်လင့်စောင့်ဆိုင်းလျက်ရှိကြကြောင်း ၎င်းက ပြောကြားသည်။

၂၀၂၅ ခုနှစ် ပြက္ခဒိန်နှစ်အတွင်း အိန္ဒိယနိုင်ငံ၏ ပဲမျိုးစုံတင်သွင်းမှုသည် တန်ချိန် ၆၅ ဒသမ ၆၉ သိန်းသို့ အနည်းငယ် ကျဆင်းခဲ့ပြီး ယခင်နှစ်တွင်မူ တန်ချိန် ၆၈ ဒသမ ၇၅ သိန်း ရှိခဲ့ကြောင်း သိရသည်။ အဆိုပါ ကျဆင်းမှုမှာ စားတော်ပဲတင်သွင်းမှု လျော့နည်းသွားခြင်းကြောင့် ဖြစ်သော် လည်း မတ်ပဲ၊ ကုလားပဲနှင့် ပဲစင်းငုံတို့အား ပြည်ပမှဝယ်ယူမှုမှာမူ ပိုမိုမြင့်တက်လာခဲ့ကြောင်း တွေ့ရှိ ရသည်။

အိန္ဒိယနိုင်ငံတွင် ပြည်တွင်းပဲထုတ်လုပ်မှု ကျဆင်းခြင်းနှင့် အယ်လ်နီညို (El Nino) ဖြစ်ပေါ် နိုင်ခြေရှိခြင်းတို့ကြောင့် အိန္ဒိယအစိုးရအနေ ဖြင့် ပဲစင်းငုံနှင့် မတ်ပဲတို့အပေါ် အကောက်ခွန်ကင်း လွတ်ခွင့်ဖြင့် တင်သွင်းနိုင်သည့်ကာလကို ယခုလ ၃၁ ရက်နောက်ပိုင်းတွင် သက်တမ်းတိုးရန် စဉ်း စားလျက်ရှိသော်လည်း လက်ရှိအချိန်အထိ တရားဝင် ထုတ် ပြန်ကြေညာခြင်း မရှိသေးကြောင်း သိရ သည်။ အဆိုပါ ပဲမျိုးစုံတင်သွင်းမှုမူဝါဒ သက်တမ်းတိုးနိုင်မှုအခြေ အနေကို အိန္ဒိယပဲကုန်သည်များနှင့် အသင်းအဖွဲ့ ကိုယ်စားလှယ်များက အခိုင်အမာမျှော်လင့်လျက်ရှိကြပြီး ၎င်းအခြေအနေသည် အိန္ဒိယ နိုင်ငံသို့ ပဲမျိုးစုံအဓိက တင်ပို့လျက်ရှိသည့် မြန်မာနိုင်ငံအတွက် စျေးကွက် အခွင့်အလမ်းကောင်းများ ဆက် လက်ရရှိနိုင်မည့် အလားအလာရှိပါကြောင်း သုံးသပ်တင်ပြလိုက်ရပါသည်။           

ကောင်းထွဋ်အောင်

The Hindu Businessline, India may extend duty-free pulses imports beyond March 31 on Iran war, El Nino possibility, March 12, 2026.