မလေးရှားနိုင်ငံ ဝက်သားကဏ္ဍ ၉၀ ရာခိုင်နှုန်း ကိုယ်တိုင်ဖူလုံမှုရရှိရန် ကြိုးပမ်းနေ

မလေးရှားနိုင်ငံသည် ဝက်သားထုတ်လုပ်မှု ဖူလုံမှုနှုန်းကို ၂၀၂၄ ခုနှစ် တွင် ၆၇ ဒသမ ၈ ရာခိုင်နှုန်းရှိရာမှ ၂၀၃၀ ပြည့်နှစ်တွင် ၉၀ ရာခိုင်နှုန်းအထိ ရောက်ရှိရန် ရည်မှန်းထားကြောင်း စိုက်ပျိုးရေးနှင့် စားနပ်ရိက္ခာဖူလုံရေးဆိုင်ရာ ဒုတိယဝန်ကြီး Chan Foong Hin က ပြောကြားသည်။

ပြည်တွင်းဝယ်လိုအားမှာ သွင်းကုန်များအပေါ် တစ်စိတ်တစ်ပိုင်း မှီခိုနေရဆဲဖြစ်ကြောင်း ၎င်းကဆိုသည်။ ထောက်ပံ့မှုတိုးမြှင့်ရန်အတွက် အစိုးရသည် ဆာရာဝပ် (Sarawak) ပြည်နယ်မှ ဝက်အရှင်များကို မလေးရှားကျွန်းဆွယ်သို့ သယ်ယူပို့ဆောင်ရန်နှင့် ရောဂါထိန်းချုပ်မှု ပိုမိုကောင်းမွန်စေခြင်းဖြင့် မွေးမြူရေးခြံများ၏ ထုတ်လုပ်မှုစွမ်းအားကို မြှင့်တင်ရန် စီစဉ်လျက်ရှိသည်။

ကမ္ဘာ့စျေးနှုန်း အတက်အကျများကို စီမံခန့်ခွဲနိုင်ရန် ဝက်အရှင်စျေးနှုန်းနှင့် အစာစရိတ်များကို စောင့်ကြည့်လျက်ရှိကြောင်း မစ္စတာ Chan က ပြောသည်။ ၂၀၂၅ ခုနှစ်တွင် ပျမ်းမျှခြံထွက်စျေးမှာ တစ်ကီလိုဂရမ်လျှင် ၄ ဒသမ ၄၅ အမေရိကန်ဒေါ်လာ ဖြစ်သည်။

ထို့အပြင် အစိုးရသည် ပြည်တွင်း၌ ပြောင်းစိုက်ပျိုးမှုကို တိုးချဲ့ရန်နှင့် ရောဂါထိန်းချုပ်နိုင်ပြီး ညစ်ညမ်းမှုကို လျှော့ချနိုင်သည့် Closed House System ကဲ့သို့သော ခေတ်မီဝက်မွေးမြူရေးစနစ်များကို မြှင့်တင်ရန် စီစဉ်နေသည်။ ဤစနစ်ကို ကျင့်သုံးသည့် မွေးမြူသူများသည် အခွန်ခံစားခွင့်များနှင့် ပီနန် (Penang) ပြည်နယ်၊ Kampung Selamat ရှိ စီမံကိန်းအပါအဝင် ဇီဝဓာတ်ငွေ့ (Biogas) စီမံကိန်းများအတွက် အထောက်အပံ့များကို ရရှိနိုင်မည်ဖြစ်သည်။

ဆာရာဝပ်ပြည်နယ်တွင် ဝက်မွေးမြူရေးဇုန် (PFA) တစ်ခုကို တည်ထောင်ထားပြီး နောက်ထပ်သုံးခုကိုလည်း တည်ဆောက်ရန် လျာထားသည်။ ဝန်ကြီးဌာနသည် မလေးရှား၏ ဝက်ကဏ္ဍ အားကောင်းလာစေရန် နိုင်ငံတကာ မွေးမြူရေးပုံစံများကိုလည်း လေ့လာလျက်ရှိသည်။

ခေတ်မီ PFA များနှင့် တင်းကျပ်သော ဇီဝလုံခြုံမှုစနစ်များကြောင့် ပြည်နယ်အတွင်းရှိ ဝက်အုပ်များမှာ ရောဂါကင်းစင်ကြောင်း ဆာရာဝပ် တိရစ္ဆာန်ဆေးကုသရေးဌာန (DVSS) က Asian Agribiz သို့ ပြောကြားခဲ့သည်။ “ကျနော်တို့ရဲ့ လုပ်ထုံးလုပ် နည်းတွေဖြစ်တဲ့ ကွာရန်တင်းဝင်တာ၊ စွန့်ပစ်ပစ္စည်းသန့်စင်တာကနေ အသွင်းအထုတ် စနစ်တကျစီမံတာတွေအထိဟာ မှတ်ပုံတင်ထားပြီး စစ်ဆေးပြီးသား ခြံတွေက ဝက်တွေကိုပဲ ပြည်ပတင်ပို့ဖို့ ခွင့်ပြုမှာ ဖြစ်ပါတယ်” ဟု ဆိုသည်။

TTP

www.asian-agribiz.com(26-3-2026)