ဗီယက်နမ် ပို့ကုန်လုပ်ငန်းရှင်များ သင်္ဘောတင်ပို့မှု အနှောင့်အယှက်ဖြစ်နိုင်ခြေအတွက် ပြင်ဆင်ထားရန် လိုအပ်
အမေရိကန်နှင့် အီရန်တို့အကြား တင်းမာမှုများ မြင့်တက်လာပြီးနောက် ဟော်မုဇ်ရေလက်ကြား (Strait of Hormuz) အပါအဝင် အဓိက သင်္ဘောလမ်းကြောင်းများတွင် အနှောင့်အယှက်များ ဖြစ်ပေါ်နေသဖြင့် အရှေ့အလယ်ပိုင်းဒေသ၏ အခြေအနေများကို အနီးကပ် စောင့်ကြည့်ရန် ဗီယက်နမ် သွင်းကုန် ပို့ကုန် ဦးစီးဌာနက စီးပွားရေးလုပ်ငန်းရှင်များကို တိုက်တွန်းထားသည်။
ဗီယက်နမ် ရေထွက်ပစ္စည်း ထုတ်လုပ်သူများနှင့် ပို့ကုန်လုပ်ငန်းရှင်များအသင်း (Vasep) ၏ အဆိုအရ ၂၀၂၅ ခုနှစ်တွင် အရှေ့အလယ်ပိုင်းဒေသသည် ဗီယက်နမ်၏ ရေထွက်ကုန်ပို့ကုန်အတွက် အမေရိကန်ဒေါ်လာ ၄၀၁ သန်းအထိ အကျိုးအမြတ်ရရှိခဲ့ပြီး ယခင်နှစ်ထက် ၉ ရာခိုင်နှုန်း တိုးတက်လာခဲ့ကြောင်း သိရသည်။ ငါးတန် (Pangasius) တင်ပို့မှုသည် ၁၈ ရာခိုင်နှုန်း မြင့်တက်ကာ ဒေါ်လာ ၁၇၆ သန်းသို့ ရောက်ရှိခဲ့ပြီး ပုစွန်တင်ပို့မှုသည် ၂၀ ရာခိုင်နှုန်း မြင့်တက်ကာ ဒေါ်လာ ၅၄ သန်းသို့ ရောက်ရှိခဲ့သည်။
ပင်လယ်ကွေ့ဒေသရှိ လုံခြုံရေးဆိုင်ရာ စိန်ခေါ်မှုများကြောင့် Maersk၊ Hapag-Lloyd နှင့် CMA CGM ကဲ့သို့သော အဓိက သင်္ဘောလိုင်းများသည် စစ်ဘေးအန္တရာယ်အတွက် ထပ်ဆောင်းအခကြေးငွေများ သတ်မှတ်လာကြပြီး အအေးခန်း ကွန်တိန်နာများ လက်ခံမှုကိုလည်း ကန့်သတ်လာကြသည်။ အာရှမှဒူဘိုင်းသို့ ကုန်စည်ပို့ဆောင်ခနှုန်းထားများသည် ရက်ပိုင်းအတွင်း နှစ်ဆနီးပါး မြင့်တက်သွားကြောင်း သိရသည်။
ပို့ဆောင်ရေးလမ်းကြောင်းများ ကြန့်ကြာမှုကြောင့် အအေးကွင်းဆက် (cold chain) တည်ငြိမ်မှုကို ထိခိုက်စေနိုင်ခြင်း၊ ရေကြောင်းအာမခံကြေးများ မြင့်တက်လာခြင်းနှင့် ကုန်စည်ပို့ဆောင်ရေးစရိတ်များ ပိုမိုများပြားလာနိုင်ခြင်းတို့ ရှိနိုင်ကြောင်း Vasep က သတိပေးထားသည်။ ဝန်ကြီးဌာနအနေဖြင့် စီးပွားရေးလုပ်ငန်းရှင်များအား ပို့ဆောင်ရေးလမ်းကြောင်းများကို ခွဲထုတ်ရန်၊ သယ်ယူပို့ဆောင်ရေးနှင့် အာမခံဆိုင်ရာ စာချုပ်ပါ အပိုဒ်များကို ပြန်လည်သုံးသပ်ရန်နှင့် အရေးပေါ်အစီအစဉ်များကို အားကောင်းအောင် ဆောင်ရွက်ထားရန် အကြံပြုထားသည်။
ထို့အပြင် ဆီဈေးနှုန်း မြင့်တက်လာမှုသည် တိရစ္ဆာန်စာ၊ မွေးမြူရေးနှင့် အစားအသောက် ထုတ်လုပ်မှုကွင်းဆက် တစ်လျှောက်လုံးတွင်လည်း ကုန်ကျစရိတ် ဖိအားများကို ဖြစ်ပေါ်စေနိုင်ကြောင်း သိရှိရသည်။
TTP
www.asian-agribiz.com
(11 March 2026)