၂၀၂၇ ခုနှစ်တွင် နာနတ်သီးတင်ပို့မှုမှ အမေရိကန်ဒေါ်လာ ၄၂၅ သန်း ထိ ရရှိရန် မလေးရှား မျှော်မှန်းထား

မလေးရှားအစိုးရသည် တန်ဖိုးမြင့်စိုက်ပျိုးရေးထုတ်ကုန်တစ်ခုအဖြစ် ရပ်တည်နေသောကဏ္ဍအားကောင်းလာစေရန် မဟာဗျူဟာ၏ တစ်စိတ်တစ်ပိုင်းအနေဖြင့် ၂၀၂၇ ခုနှစ်တွင် နာနတ်သီးတင်ပို့မှုမှ ဝင်ငွေ ရင်းဂစ် ၂ ဘီလီယံ (အမေရိကန်ဒေါ်လာ ၄၂၅ သန်း) အထိ မြှင့်တင်ရန် ရည်ရွယ်ထားပါသည်။

နာနတ်သီးလုပ်ငန်းသည် ခေတ်မီလယ်ယာစီမံခန့်ခွဲမှုအလေ့အကျင့်များကို အသုံးပြုခြင်းဖြင့် တစ်လလျှင် တစ်ဟတ်တာမှ ရင်းဂစ် ၉,၀၀၀ ဝန်းကျင် (အမေရိကန်ဒေါ်လာ ၁,၉၁၅ ခန့်) ရရှိနိုင်သည့် အလားအလာရှိကြောင်း စိုက်ပျိုးရေးနှင့် စားနပ်ရိက္ခာဖူလုံရေးဝန်ကြီးဌာန၏ ဒုတိယဝန်ကြီး Datuk Chan Foong Hin က ပြောကြားသည်။

၂၀၂၅ ခုနှစ်တွင် မလေးရှားနိုင်ငံ၏ နာနတ်သီးတင်ပို့မှုမှာ အရှေ့အလယ်ပိုင်း၊ တရုတ်နှင့် ဥရောပနိုင်ငံများရှိ ဈေးကွက်များသို့ တန်ချိန်အားဖြင့် စုစုပေါင်း ၇၆,၀၀၀ တန်၊ တန်ဖိုး အားဖြင့် ရင်းဂစ် ၁.၄ ဘီလီယံ (အမေရိကန်ဒေါ်လာ ၂၉၈ သန်း) အထိ ရောက်ရှိခဲ့သည်။ နယူးဇီလန်ကဲ့သို့သော  နိုင်ငံများသို့ပါ ဆက်လက်၍ တိုးချဲ့တင်ပို့ရန် မျှော်မှန်းထားကြောင်း ဒုတိယဝန်ကြီးမှ ပြောကြားသည်။

Sungai Gumut ရှိ MD2 နာနတ်စိုက်ခင်းစီမံကိန်းသို့ လေ့လာရေးခရီးသွားရောက်ခြင်းသည် နာနတ်သီးလုပ်ငန်းဖွံ့ဖြိုးတိုးတက်မှုအား ကောင်းလာစေရန် အစိုးရ၏ ကြိုးပမ်း အားထုတ်မှုများထဲမှ တစ်စိတ်တစ်ပိုင်း ဖြစ်သည်။ ၂၀၂၇ ခုနှစ်တွင် နာနတ်သီးတင်ပို့မှုမှ ဝင်ငွေပမာဏအား ရင်းဂစ် ၂ ဘီလီယံအထိ ဆက်လက်တိုးမြှင့်တင်ပို့နိုင်ရေးအတွက် ရည်ရွယ်ထားကြောင်း Sungai Gumut နာနတ်သီးစုဆောင်းရေးဌာနသို့  အလုပ်သဘောလေ့လာရေး ခရီးစဉ်ပြီးနောက်တွင် သတင်းထောက်များအား ပြောကြားသည်။

MD2 စီမံကိန်းအား Premium Pineapple Sdn Bhd ကုမ္ပဏီမှ ဆောင်ရွက်ခဲ့ပြီး ဧရိယာအနေဖြင့် စုစုပေါင်း ၁၀၉ ဒသမ ၂၆ ဟက်တာခန့် ကျယ်ဝန်းပါသည်။ လက်ရှိစိုက်ပျိုးမှုမှာ ၁၆ ဟက်တာခန့်ရှိပြီး နာနတ်ပင်ပေါင်း ၇၄၀,၄၃၂ ခန့် ရှိပြီး ရှင်သန်နှုန်းမှာ ၉၇ ရာခိုင်နှုန်း အထက် ရှိပါသည်။

အဆိုပါခရီးစဉ်သည် စုဆောင်း၊ ထုတ်လုပ်၊ ထုတ်ပိုးမှုစင်တာတစ်ခုအတွက် အခြေခံအုတ်မြစ်ချ ပွဲအခမ်းအနားလည်းဖြစ်ပါသည်။ အဆိုပါစင်တာသည် စိုက်ပျိုးထုတ်လုပ်သည်မှ ဈေးကွက်သို့တင်ပို့ ရောင်းချသည်အထိ နာနတ်သီးတန်ဖိုးကွင်းဆက်အား ထောက်ပံ့ရန် ရည် ရွယ်ပါသည်။

နာနတ်သီးလုပ်ငန်းဖွံ့ဖြိုးတိုးတက်မှုအား အထောက်အပံ့ပေးရန် မလေးရှား နာနတ်သီးလုပ်ငန်းဘုတ်အဖွဲ့သည် ရန်ပုံငွေအဖြစ် နာနတ်ပျိုးပင်များနှင့် စိုက်ပျိုးရေးသွင်းအားစုများအတွက် ရင်းဂစ် ၂၂၁,၈၀၀ (အမေရိကန်ဒေါ်လာ ၄၇,၂၀၀ ဝန်းကျင်)နှင့် သိုလှောင်ရုံအတွက် ရင်းဂစ် ၃၀,၀၀၀ (အမေရိကန်ဒေါ်လာ ၆,၃၈၀ ခန့်) အား ထောက်ပံ့ခဲ့သည့်အပြင် နည်းပညာများလည်း ပံ့ပိုးပေးခဲ့ပါသည်။ Inisiatif Penda-patan Rakyat နှင့် Agropreneur Muda ကဲ့သို့သော ရပ်ရွာလူထုနှင့် လူငယ်များကို ဦးတည်သည့် ထပ်တိုးအစီအစဉ်များ ပါဝင် ပါသည်။

၂၀၂၆ ခုနှစ်တွင် ဘုတ်အဖွဲ့သည် ဆီလန်ဂေါတွင် ဟက်တာ ၄၉ ကျယ်ဝန်းသော ဖွံ့ဖြိုးရေး စီမံကိန်းတစ်ခုအား ရင်းဂစ် ၁ ဒသမ ၃ သန်း (ခန်းမှန်း အမေရိကန်ဒေါ်လာ ၂၇၇,၀၀၀) ဖြင့် ထပ်မံ ဆောင်ရွက်ရန် စီစဉ်ထားပြီး လုပ်ငန်းရှင် ၂၆ ဦးအား ပါဝင်ဆောင်ရွက်ရန် မျှော်မှန်းထားပါသည်။ ပြီးခဲ့သည့်နှစ်တွင် Agropreneur NextGen ဟု အမည်ပြောင်းထားသော Agropreneur Muda ရန်ပုံငွေမှတဆင့် ရင်းဂစ် ၁၈၀,၀၀၀ (အမေရိကန်ဒေါ်လာ ၃၈,၃၀၀ ဝန်းကျင်) အား ဆီလန်ဂေါ ပြည်နယ်ရှိ လူငယ်တောင်သူများအား ဖြန့်ဝေးပေးခဲ့ပါသည်။

ဗဟိုအစိုးရနှင့် ဆီလန်ဂေါ်အစိုးရတို့သည် နာနတ်သီးလုပ်ငန်းကို ရေရှည်ဖွံ့ဖြိုးတိုးတက်စေရန်နှင့် နိုင်ငံ၏ စားနပ်ရိက္ခာဖူလုံမှုအား ခိုင်မာစေရန် LPNM နှင့် ပုဂ္ဂလိကကဏ္ဍတို့နှင့် မဟာဗျူဟာ မြောက်ပူးပေါင်းဆောင်ရွက်မှုကို ခိုင်မာစေရေးအတွက် ဆက်လက်ဆောင်ရွက်လျက်ရှိကြောင်း သိရှိရသည်။

နွေးနွေးအောင်

https://www.freshplaza.com/asia/article/9801453/malaysia-targets-us-425m-pineapple-exports-by-2027/