အိန္ဒိယနိုင်ငံ၏ ပို့ကုန်တင်ပို့မှု ၃ ရာခိုင်နှုန်း တိုးတက်ကာ အမေရိကန်ဒေါ်လာ ၈၅၀ ဘီလီယံအထိ ရောက်ရှိနိုင်ဖွယ်ရှိကြောင်း GTRI ဖော်ပြ

အိန္ဒိယနိုင်ငံ၏ ကုန်စည်နှင့် ဝန်ဆောင်မှု ပို့ကုန်တင်ပို့မှုသည် ၂၀၂၅-၂၆ ဘဏ္ဍာနှစ်တွင် ၃ ရာခိုင်နှုန်း တိုးတက်လာပြီး အမေရိကန်ဒေါ်လာ  ၈၅၀ ဘီလီယံအထိ ရောက်ရှိနိုင်ဖွယ်ရှိကြောင်း ကမ္ဘာလုံးဆိုင်ရာ ကုန်သွယ်မှုသုတေသနဌာန (Global Trade Research Initiative- GTRI) က ဒီဇင်ဘာ ၂၅ ရက်နေ့တွင် ပြောကြားခဲ့သည်။

၂၀၂၄-၂၅ ဘဏ္ဍာနှစ်တွင် စုစုပေါင်းပို့ကုန်တင်ပို့မှုသည် အမေရိကန်ဒေါ်လာ ၈၂၅ ဘီလီယံ (ကုန်စည်တင်ပို့မှု အမေရိကန်ဒေါ်လာ ၄၃၈ ဘီလီယံနှင့် ဝန်ဆောင်မှုတင်ပို့မှု အမေရိကန်ဒေါ်လာ ၃၈၇ ဘီလီယံ) အထိ ရှိခဲ့ကြောင်း သိရသည်။

၂၀၂၆ ခုနှစ်တွင် အိန္ဒိယနိုင်ငံ၏ ပို့ကုန်တင်ပို့မှုသည် လွန်ခဲ့သောနှစ်ပေါင်းများစွာကထက် ပိုမို ခက်ခဲသော ကမ္ဘာလုံးဆိုင်ရာ ကုန်သွယ်မှုဝန်းကျင်နှင့် ရင်ဆိုင်ရမည်ဖြစ် ကြောင်း GTRI က ပြောကြားခဲ့သည်။

အဆင့်မြင့်စီးပွားရေးနိုင်ငံများတွင် မြင့်တက်လာသော ကာကွယ်ရေးဝါဒ (Protectionism)၊ ကမ္ဘာလုံးဆိုင်ရာ ဝယ်လိုအား လျော့နည်းလာမှုနှင့် ရာသီဥတုနှင့် ဆက်စပ်သည့် ကုန်သွယ်မှုအတားအဆီးအသစ်များသည် အိန္ဒိယနိုင်ငံက ပို့ကုန်မြှင့်တင်ရန် ကြိုးပမ်းနေချိန်တွင် တစ်ပြိုင် နက်တည်း ဖြစ်ပေါ်လာခြင်းဖြစ် ကြောင်း ၎င်းက ပြောကြားခဲ့သည်။ ယင်း၏ ရလဒ်အနေဖြင့် ပို့ကုန်တိုးချဲ့နိုင်မှုထက် လက်ရှိအခြေအနေကို ထိန်းသိမ်းထားနိုင်ရန် စိန်ခေါ်မှုများနှင့် ပိုမိုရင်ဆိုင်ရမည့် အလား အလာရှိကြောင်း GTRI တည်ထောင်သူ Ajay Srivastava က ပြောကြားခဲ့သည်။

“၂၀၂၅-၂၆ ဘဏ္ဍာနှစ်တွင် ကုန်စည်တင်ပို့မှုသည် ကမ္ဘာလုံးဆိုင်ရာ ဝယ် လိုအားနည်းခြင်းနှင့် အမေရိကန်၏ အကောက်ခွန်ဖိအားအသစ်များကြောင့် သိသိသာသာတိုးတက်မှုမရှိဘဲ တည်ငြိမ်နေနိုင်ဖွယ်ရှိသော်လည်း ဝန်ဆောင်မှုတင်ပို့မှုမှာ အမေရိကန်ဒေါ်လာ ၄၀၀ ဘီလီယံအထိ ကျော်လွန်နိုင်ပါသည်။ ထို့ကြောင့် စုစု ပေါင်းပို့ကုန်တင်ပို့မှုသည် ခန့်မှန်း ခြေ အမေရိကန်ဒေါ်လာ ၈၅၀ ဘီလီယံ အထိ မြင့်တက်လာမည်ဖြစ်ပါသည်” ဟု ၎င်းက ပြောကြားခဲ့သည်။

ထို့အပြင် ပြင်ပဝန်းကျင် အခြေ အနေများသည် လျင်မြန်စွာ ဆိုးရွားလာနေကြောင်းနှင့် ဥရောပတိုက်သည်လည်း ကုန်ကျစရိတ်ကြီးမား သော စိန်ခေါ်မှုတစ်ရပ်ဖြစ်လာနိုင်ကြောင်း ၎င်းက ထပ်လောင်းပြောကြားခဲ့သည်။ ဥရောပသမဂ္ဂ (EU) သည် ၎င်း၏ ကာဗွန်နယ်စပ် ညှိနှိုင်းမှုယန္တရား (Carbon Border Adjustment Mechanism- CBAM) ကို ၂၀၂၆ ခုနှစ် ဇန်နဝါရီလ ၁ ရက်နေ့တွင် စတင်မည်ဖြစ်ပြီး သွင်းကုန်များအပေါ် ကာဗွန်အခွန်ကို ထိရောက်စွာ ကောက်ခံသွားမည်ဖြစ် ကြောင်း သိရသည်။

ယင်းသို့ အခွန်ပေးဆောင်မှုများ မစတင်မီအချိန်၌ပင် လိုက်နာရမည့် စည်းမျဉ်းများနှင့် အစီ ရင်ခံတင်ပြရမည့် လိုအပ်ချက်များကြောင့် အိန္ဒိယနိုင်ငံ၏ EU သို့ သံမဏိတင်ပို့မှုမှာ ၂၄ ရာခိုင်နှုန်း ခန့် ကျဆင်းသွားခဲ့ပြီဖြစ်ကြောင်း ၎င်းက မှတ်ချက်ပြုခဲ့သည်။

“၂၀၂၆ ခုနှစ်မှစ၍ EU သွင်းကုန်လုပ်ငန်းရှင်များသည် အိန္ဒိယကုန် ပစ္စည်းများ၏ ဈေးနှုန်းတွင် CBAM ကုန်ကျစရိတ်များကိုပါ ထည့်သွင်းတွက်ချက်မည်ဖြစ်ပြီး ၂၀၂၇ ခုနှစ်တွင် လက်မှတ်များ အပ်နှံခြင်းဖြင့် ငွေပေးချေမှုများကို အပြီးသတ်ဆောင်ရွက်မည်ဖြစ်သည်” ဟု ၎င်းက ထပ်လောင်း ပြောကြားသည်။

လွတ်လပ်စွာကုန်သွယ်ရေးသဘော တူညီချက်များ (FTAs) သည် အသုံးမဝင်သော သံတမန်ရေးရာ အထိမ်း အမှတ်များအဖြစ်သာ ရှိမနေဘဲ ပို့ကုန်တင်ပို့မှုကို အမှန်တကယ်တိုးမြှင့်ပေးနိုင်ရန်၊ အိန္ဒိယကုမ္ပဏီများကို ကမ္ဘာလုံးဆိုင်ရာ တန်ဖိုးကွင်းဆက် များအတွင်း ပေါင်းစည်းနိုင်ရန်နှင့် တိုင်း တာ၍ရသော ကုန်သွယ်မှုအကျိုးအမြတ်များ ရရှိစေရန်အတွက် အစိုးရအနေဖြင့် ကဏ္ဍအလိုက် အဆိုပါ FTAs များ၏ စွမ်းဆောင်ရည်ကို အရေးပေါ် ပြန်လည်သုံးသပ်ရန် GTRI က အကြံပြုထားကြောင်း သိရသည်။

ဥရောပသမဂ္ဂ၏ CBAM ကဲ့သို့သော ရာသီဥတုဆိုင်ရာ ကုန်သွယ်မှုအတားအဆီးများသည် အိန္ဒိယ၏ သံမဏိပို့ကုန်ကို သိသိသာသာ ထိခိုက်စေခဲ့ကြောင်း တွေ့ရှိရသည်။ ၎င်းသည် မြန်မာနိုင်ငံမှ ပို့ကုန်လုပ်ငန်းရှင်များအတွက်လည်း သတိပေးချက်တစ်ခုဖြစ်ပြီး၊ နောင်တွင် နိုင်ငံတကာသို့ တင်ပို့ရာ၌ အစိမ်းရောင်စံနှုန်းများ (Green Standards) နှင့် ကိုက်ညီရန် ကြို တင်ပြင်ဆင်ထားဖို့ လိုအပ် ကြောင်း 
ပြသလျက်ရှိပါသည်။ 

အိန္ဒိယအစိုးရက ၎င်း၏ FTAs များကို ပြန်လည်သုံးသပ်ရန် စီစဉ်နေခြင်းကြောင့် အာဆီယံ-အိန္ဒိယ လွတ်လပ်စွာကုန်သွယ်ရေးသဘော တူညီချက် (AIFTA) တွင်လည်း အပြောင်းအလဲများ ရှိလာနိုင်ကြောင်း တွေ့ရှိရသည်။ မြန်မာနိုင်ငံအနေဖြင့် အဆိုပါ ပြန်လည်သုံးသပ်မှုများအတွင်း မိမိတို့၏ ပို့ကုန်ကဏ္ဍ အတွက် ပိုမိုအကျိုးရှိစေမည့် အချက် များကို စောင့်ကြည့်ဖော်ဆောင်သွားသင့် ကြောင်း သုံးသပ်ရပါသည်။

အိန္ဒိယကုမ္ပဏီများသည် ကမ္ဘာလုံးဆိုင်ရာ တန်ဖိုးကွင်းဆက်များ (Global Value Chains) တွင် ပိုမိုပေါင်းစည်းရန် ကြိုးပမ်းလာသည်နှင့်အမျှ၊ အိမ်နီးချင်းနိုင်ငံဖြစ်သော မြန်မာနိုင်ငံအနေဖြင့် လည်း အိန္ဒိယ၏ ထုတ်လုပ်မှုကွင်းဆက်တွင် အစိတ်အပိုင်းတစ်ခုအဖြစ် ပါဝင်နိုင်မည့် အလားအလာများကို ရှာဖွေဖော်ထုတ်သင့်ပါကြောင်း အကြံပြုလိုက်ရပါသည်။

ကောင်းထွဋ်အောင်   

Economic Times, Exports likely to grow by 3% to $850 billion this fiscal: GTRI, December 25, 2025.