တရုတ်နှင့်ကမ္ဘောဒီးယား အအေးခန်းကွန်တိန်နာသင်္ဘောလမ်းကြောင်း နှစ်နိုင်ငံကုန်သွယ်မှုကို မြှင့်တင်ပေးလျက်ရှိ

တရုတ်နိုင်ငံ၏ တောင်ဘက်ဆုံးရှိ Fangchenggang ဆိပ်ကမ်းနှင့် ကမ္ဘောဒီးယားနိုင်ငံ Koh Kong ဆိပ်ကမ်းတို့အကြား အသစ်ဖွင့်လှစ်လိုက်သော "အအေးခန်းကွန်တိန်နာ + အထွေထွေ ကုန်ပစ္စည်းတင်" သယ်ယူပို့ဆောင်ရေးလမ်းကြောင်းသည် ကမ္ဘောဒီးယားနိုင်ငံ၏ ပို့ကုန်စွမ်းရည်ကို မြှင့်တင်ပေးမည်ဖြစ် ကြောင်း သိရှိရသည်။

အအေးခန်းစနစ်သစ်သည် စိုက်ပျိုးရေးကဏ္ဍအတွက် အလွန်အကျိုးရှိမည်ဖြစ်ပြီး ကုန်ပစ္စည်းများကို သတ်မှတ်ထားသောအပူချိန်အတိုင်း တင်ပို့နိုင်မည်ဖြစ်ကြောင်း Cambodia Chinese Commerce Association ၏ ဒုတိယဥက္ကဋ္ဌ Lor Vichet က ပြောကြားခဲ့သည်ဟု သိရှိရသည်။

အအေးခန်းစနစ်သည် လယ်ယာထွက်ကုန်များ၏ အရည်အသွေးကို ထိန်းသိမ်းပေးနိုင်သည့်အပြင် Fangchenggang ဆိပ်ကမ်းမှ Koh Kong ဆိပ်ကမ်းသို့ တိုက်ရိုက်ပို့ဆောင်မှုသည် ပို့ဆောင်ချိန်ကိုလျှော့ချနိုင်ခြင်း၊ တစ်ဆင့်ပို့ဆောင်ရန်မလိုအပ်ခြင်းနှင့် ကုန်ကျစရိတ်သက်သာခြင်းကဲ့သို့သော အခြားအကျိုးကျေးဇူးများစွာကိုလည်း ရရှိမည်ဖြစ်ကြောင်းနှင့် ကမ္ဘောဒီးယားနိုင်ငံ၏ လယ်ယာထွက်ကုန်များ၏ အထွက်နှုန်းသည် နှစ်စဉ်တိုးတက်နေသဖြင့် ယခုလမ်းကြောင်း သည် အလွန်အထောက်အကူပြုကြောင်း ၎င်းက ပြောကြားခဲ့သည်။

အဆိုပါလမ်းကြောင်းသစ်ကို မတ် ၁၅ ရက်နေ့တွင် ကြေညာခဲ့ပြီး နောက်တစ်နေ့တွင် ကမ္ဘောဒီးယားနိုင်ငံဆိုင်ရာ တရုတ်သံအမတ်ကြီး Wang Wenbin က တရုတ်နိုင်ငံအနောက် တောင်ပိုင်းရှိ Fangchenggang ဆိပ်ကမ်းမှ ကမ္ဘောဒီးယားနိုင်ငံ Koh Kong ဆိပ်ကမ်းသို့ ‘အအေး ကွင်းဆက်+အထွေထွေကုန်ပစ္စည်းတင်’ လမ်းကြောင်း၏ ပထမဆုံးသောခရီးစဉ်အတွက် ဂုဏ်ယူကြောင်းနှင့် တစ်ဆင့်သယ်ယူပို့ဆောင်ရေးစနစ်နှင့် နှိုင်းယှဉ်ပါက ၇ ရက်သာ ကြာမြင့်မည့် တိုက်ရိုက်သင်္ဘောလိုင်းသည် ပို့ဆောင်ချိန်ကို ၅၀ ရာခိုင်နှုန်းနှင့် သယ်ယူပို့ဆောင်စရိတ်ကို ၂၀ ရာခိုင်နှုန်းကျော် လျှော့ချနိုင်သည်ဟု ၎င်း၏ ဆိုရှယ်မီဒီယာ၌ ရေးသားထားခဲ့ကြောင်း သိရှိရသည်။

လမ်းကြောင်းသစ်သည် ကမ္ဘောဒီးယားနှင့် တရုတ်နိုင်ငံတို့အကြား သံတမန်ဆက်ဆံရေးနှင့် ကုန်သွယ်မှုပူးပေါင်းဆောင်ရွက်ရေးအား ကောင်းလာမှုကို ပြသနေခြင်းဖြစ်ပြီး အထူးသဖြင့် တရုတ်နိုင်ငံသို့ ကမ္ဘေ ဒီးယား လယ်ယာထွက်ကုန်များ တင်ပို့မှုအားကောင်းလာမည်ဖြစ်ကြောင်း သိရှိရသည်။

အဆိုပါသယ်ယူပို့ဆောင်ရေးလမ်းကြောင်းသည် ကမ္ဘောဒီးယား လယ်ယာထွက်ကုန်များကို တရုတ်ဈေးကွက်သို့ ပိုမိုဝင်ရောက်နိုင်စေရန် ကူညီပေးမည်ဖြစ်ပြီး ထုတ်ကုန်အရည်အသွေးကို ကြာရှည်ထိန်း သိမ်းထားနိုင်သည့်အပြင် သယ်ယူပို့ဆောင်ချိန်ကို လျှော့ချပေးသဖြင့် ကုန်ကျစရိတ် ကိုလည်း လျှော့ချပေးနိုင်ပြီး ကမ္ဘောဒီးယား၏ ထုတ်ကုန်များကို နိုင်ငံတကာဈေးကွက်၌ ပိုမို ယှဉ်ပြိုင်နိုင်စေမည်ဟု ၎င်းက ပြောကြားခဲ့သည်ဟု သိရှိရပါသည်။

ကမ္ဘောဒီးယားနိုင်ငံ၏ ဆေးဝါးထုတ်လုပ်မှု ဆက်လက်တိုးတက်လာပြီး ပို့ကုန်များတိုးလာပါက အအေးကွင်းဆက်သယ်ယူပို့ဆောင်ရေး လိုအပ်ချက်လည်း မြင့်တက်လာမည်ဖြစ်ကြောင်း ၎င်းက အလေး ပေးပြောကြားခဲ့ကြောင်းသိရှိရသည်။

ကမ္ဘောဒီးယားစိုက်ပျိုးရေး၊ သစ်တောနှင့် ရေလုပ်ငန်းဝန်ကြီး ဌာန၏ အစီရင်ခံချက်အရ ၂၀၂၄ ခုနှစ်တွင် လယ်ယာထွက်ကုန် တန်ချိန် ၁၁ ဒသမ ၇ သန်း တင်ပို့ခဲ့ပြီး ၂၀၂၃ ခုနှစ်ကထက် ၃၉ ရာခိုင်နှုန်း တိုးမြင့်လာခဲ့ကာ အဆိုပါကုန်စည်များမှဝင်ငွေသည် ခန့်မှန်းခြေ အမေရိကန်ဒေါ်လာ ၄ ဒသမ ၈ ဘီလီယံ ရှိ
ကြောင်း သိရှိရသည်။

ကမ္ဘောဒီးယားနိုင်ငံ၏ လယ်ယာ ထွက်ကုန် ထုတ်လုပ်မှုသည် နှစ်စဉ်တိုးတက်နေပြီး အထူးသဖြင့် တရုတ်နိုင်ငံနှင့် လွတ်လပ်သော ကုန်သွယ်မှုသဘောတူညီချက်နှင့် RCEP သဘော တူညီချက်တို့ကိုဆက်လက်အကောင် အထည်ဖော်ခြင်းဖြင့် ၎င်း၏ ပို့ကုန်တိုးမြှင့်ရန် အခွင့်အ လမ်းများကို ဖန်တီးပေးခဲ့ကြောင်း ကမ္ဘောဒီးယားနိုင်ငံ ကုန်သည်ကြီးများအသင်း၏ ဒုတိယဥက္ကဋ္ဌ Lim Heng က ပြောကြားခဲ့သည်။

ဆန်၊ ပြောင်း၊ သရက်သီး၊ ငှက်ပျော သီးစသည့် ပို့ကုန်ဈေးကွက် လိုအပ် ချက်များကို ဖြည့် ဆည်းပေးနိုင်ရန် လယ်ယာထွက်ကုန်များ ပိုမိုထုတ် လုပ်လာသည်ဟု ၎င်းက ပြောကြားခဲ့ကြောင်း သိရှိရသည်။

ကမ္ဘောဒီးယားနိုင်ငံ အကောက်ခွန်နှင့် ယစ်မျိုးဌာန (GDCE) ၏ အစီရင် ခံစာအရ ၂၀၂၅ ခုနှစ်၊ ပထမနှစ်လအတွင်း ကမ္ဘောဒီးယားနိုင်ငံ၏ စုစု ပေါင်း နိုင်ငံတကာကုန်သွယ်မှုတန်ဖိုးသည် အမေရိကန် ဒေါ်လာ ၉ ဒသမ ၄၄၇ ဘီလီယံရှိကြောင်း၊ တရုတ်နိုင်ငံသည် ကမ္ဘောဒီးယား၏ အကြီးဆုံး ကုန်သွယ်ဖက်အဖြစ် ဆက်လက်တည်ရှိနေပြီး စုစုပေါင်းကုန်သွယ်မှု၏ ၂၈ ဒသမ ၁၈ ရာခိုင်နှုန်းရှိကြောင်း သိရှိရသည်။

၂၀၂၅ ခုနှစ်၊ ပထမနှစ်လအတွင်း တရုတ်နှင့် ကမ္ဘောဒီးယားနှစ်နိုင်ငံကြား ကုန်သွယ်မှု စုစုပေါင်းသည် အမေရိကန်ဒေါ်လာ ၂ ဒသမ ၆၆၂ ဘီလီယံအထိ ရှိလာခဲ့ပြီး ယခင်နှစ် အလားတူကာလထက် ၂၁ ဒသမ ၁ ရာခိုင်နှုန်း တိုးလာသည်ဟု GDCE မှ ပြောကြားခဲ့ကြောင်း သိရှိရပါသည်။

ကေခိုင်ကျော်

https://www.chinadaily.com.cn/a/202504/03/WS67ee2fafa 3104d9fd381d862.html